Viral News : పాము ఉన్న రాళ్ల సందులో ఇరుక్కున్న బాలుడు తల.. చివరికి..!

Viral News : ఒకవైపు కదలనివ్వని రాళ్ల సందు.. మరోవైపు కాటు వేయడానికి సిద్ధంగా ఉన్న విష సర్పం.. మధ్యలో ఎనిమిది గంటల పాటు సాగిన ప్రాణ సంకటం.. ఒడిశాలోని నయాగఢ్ జిల్లాలో జరిగిన ఈ సంఘటన నాగరిక ప్రపంచాన్ని ఉలిక్కిపడేలా చేసింది. తేనె కోసం వెళ్లిన ఒక బాలుడు, మృత్యువు అంచుదాకా వెళ్లి ప్రాణాలతో తిరిగి వచ్చిన హృదయ విదారక గాథ ఇది.

నయాగఢ్ జిల్లా కనిపాడ అటవీ ప్రాంతానికి చెందిన షిబా ప్రధాన్ అనే బాలుడు, తన బాబాయ్‌తో కలిసి అడవిలోకి వెళ్లాడు. అడవిలో సహజంగా లభించే తేనెను సేకరించడం వారి ఉద్దేశ్యం. ఈ క్రమంలో ఒక పెద్ద కొండ రాళ్ల మధ్య ఉన్న సందులో వారికి తేనె పట్టు కనిపించింది. ఆ ఆశే ఆ బాలుడిని ప్రమాదంలోకి నెట్టింది. తేనెను తీయాలనే ఆత్రుతతో ఆ సందులోకి తల పెట్టగా, అది కాస్తా లోపలికి ఇరుక్కుపోయింది.

బంధీగా మారిన బాలుడు..

బాలుడి తల ఇరుక్కుపోవడంతో అతని బాబాయ్ బయటకు తీయడానికి తీవ్రంగా ప్రయత్నించాడు. కానీ, రాళ్ల సందు చాలా ఇరుగ్గా ఉండటంతో ఎంత లాగినా ఫలితం లేకపోయింది. పైగా బాలుడు నొప్పితో అరుస్తుండటంతో చేసేదేమీ లేక, బాబాయ్ పరుగున వెళ్లి గ్రామస్తులకు , స్థానిక పోలీసులకు సమాచారం అందించాడు.

రాళ్ల సందులో అసలైన ముప్పు.. పొంచి ఉన్న విష సర్పం

సమాచారం అందుకున్న పోలీసులు, అగ్నిమాపక సిబ్బంది హుటాహుటిన సంఘటనా స్థలానికి చేరుకున్నారు. రక్షణ చర్యలు ప్రారంభిద్దామనుకున్న తరుణంలో వారికి ఊహించని షాక్ తగిలింది. బాలుడి తల ఇరుక్కున్న చోటే, అతనికి అతి సమీపంలో ఒక పెద్ద విషపూరితమైన పాము పొంచి ఉంది. బాలుడు కొద్దిగా కదిలినా ఆ పాము కాటు వేసే ప్రమాదం పొంచి ఉండటంతో, సిబ్బంది ఒక క్షణం స్తంభించిపోయారు. అటు రాళ్ల బిగింపు.. ఇటు పాము భయం.. బాలుడి పరిస్థితి వర్ణనాతీతంగా మారింది.

ఎనిమిది గంటల ఉత్కంఠ.. చివరికి విజయం..

ప్రమాద తీవ్రతను గుర్తించిన అగ్నిమాపక సిబ్బంది అత్యంత జాగ్రత్తగా పామును అక్కడి నుంచి పక్కకు మళ్లించే ప్రయత్నం చేస్తూనే, రాళ్లను తొలగించే పని మొదలుపెట్టారు. దాదాపు ఎనిమిది గంటల పాటు ఈ రెస్క్యూ ఆపరేషన్ కొనసాగింది. కాలం గడుస్తున్న కొద్దీ అందరిలోనూ ఆందోళన పెరిగింది. కానీ, సిబ్బంది పట్టుదలతో శ్రమించి ఎట్టకేలకు బాలుడిని ఆ మృత్యు గొయ్యి నుంచి సురక్షితంగా బయటకు తీశారు.

ఊపిరిపీల్చుకున్న స్థానికులు..

అదృష్టవశాత్తూ ఆ విష సర్పం బాలుడిని ఏమీ చేయలేదు. అలాగే రాళ్ల మధ్య ఇరుక్కున్నప్పటికీ అతనికి ఎటువంటి పెద్ద గాయాలు కాకపోవడం గమనార్హం. చావు అంచుల్లో ఎనిమిది గంటల పాటు పోరాడి, క్షేమంగా బయటకు వచ్చిన షిబా ప్రధాన్‌ను చూసి గ్రామస్తులు , అధికారులు ఊపిరి పీల్చుకున్నారు. సాహసోపేతంగా వ్యవహరించి బాలుడి ప్రాణాలు కాపాడిన అగ్నిమాపక సిబ్బందిని అందరూ ప్రశంసిస్తున్నారు.