Viral Video: ప్రొఫెషనల్ బిచ్చగాడని అనుకునేరు.. ఆస్కార్ లెవెల్ యాక్టింగ్ చూస్తే స్టన్ అవ్వాల్సిందే.!

Viral Video: సమాజంలో కొందరు కష్టపడి పనిచేయడానికి బద్ధకించి, సులభంగా డబ్బు సంపాదించేందుకు అడ్డదారులు తొక్కుతున్నారు. అమాయక ప్రజల జాలి, దయను ఆసరాగా చేసుకుని వారిని నిలువునా మోసం చేస్తున్నారు. తాజాగా కర్ణాటక రాష్ట్రంలో వెలుగుచూసిన ఒక ఘటన అందరినీ తీవ్ర విస్మయానికి గురిచేస్తోంది. బెంగళూరు నగరంలోని ఆర్ఆర్ నగర్ వీధుల్లో ఒక యువకుడు తనకు రెండు కాళ్లు పడిపోయినట్లు, నడుము వంగిపోయినట్లు నటిస్తూ భిక్షాటనకు దిగాడు. అతడి దయనీయ స్థితిని చూసిన స్థానికులు 'అయ్యో పాపం' అంటూ జాలిపడి తమకు తోచినంత ఆర్థిక సాయం చేస్తూ వచ్చారు. ఈ విధంగా దారివెంట వెళ్లే వారిని బురిడీ కొట్టిస్తూ ఆ యువకుడు విపరీతంగా డబ్బు కూడబెట్టాడు.

రోజులు గడుస్తున్న కొద్దీ స్థానికులకు అతడి ప్రవర్తనపై అనుమానం రావడం మొదలైంది. ఒకవైపు దివ్యాంగుడిగా నటిస్తూనే, మరోవైపు ఏకంగా ఖరీదైన ఐఫోన్ వాడుతుండటం పలువురి కంటపడింది. దీంతో నిఘా పెట్టిన యువకులు అతడి బండారాన్ని ఆధారాలతో సహా పట్టుకున్నారు. నడిరోడ్డుపై నిలదీసిన వెంటనే అతడు ఎలాంటి శారీరక లోపం లేకుండా సాధారణ మనిషిలాగా తన రెండు కాళ్లపై నిలబడటం చూసి అక్కడున్న వారంతా ఒక్కసారిగా షాక్‌కు గురయ్యారు. ఉదయం పూట వికలాంగుడి అవతారం ఎత్తి, సాయంత్రానికి జేబులు నింపుకుని జల్సాలు చేస్తున్నట్లు విచారణలో తేలింది. ఇలా కేవలం యాక్టింగ్ చేస్తూ రోజుకు ఏకంగా రూ.5 వేల వరకు సంపాదిస్తున్నాడని తెలుసుకుని ప్రజలు నోరెళ్లబెట్టారు.

కాగా, ఈ తతంగానికి సంబంధించిన దృశ్యాలను అక్కడున్న కొందరు యువకులు తమ మొబైల్ ఫోన్లలో రికార్డ్ చేసి సోషల్ మీడియాలో పోస్ట్ చేశారు. ప్రస్తుతం ఈ వీడియో ఇంటర్నెట్‌లో విపరీతంగా వైరల్ అవుతోంది. ఈ నకిలీ బిచ్చగాడి నటన చూసిన నెటిజన్లు ఆశ్చర్యం వ్యక్తం చేస్తున్నారు. 'వీడి నటనకు ఏకంగా ఆస్కార్ అవార్డు ఇచ్చేయొచ్చు' అంటూ సెటైర్లు పేలుస్తున్నారు. ఇలాంటి మోసగాళ్ల పట్ల ప్రజలు అత్యంత అప్రమత్తంగా ఉండాలని, నిజంగా కష్టాల్లో ఉన్నవారిని మాత్రమే గుర్తించి సాయం చేయాలని పోలీసులు సూచిస్తున్నారు. శారీరక దారుఢ్యం ఉండి కూడా పని చేయకుండా భిక్షాటనను వృత్తిగా ఎంచుకునే ఇలాంటి కేటుగాళ్లపై కఠిన చర్యలు తీసుకోవాలని పలువురు డిమాండ్ చేస్తున్నారు.