Viral Video: శివుడిలా ఫీలయ్యాడు.. కోబ్రాతో స్టంట్లు చేసి షాకిచ్చాడు!

Viral Video: ఈమధ్య కాలంలో సోషల్ మీడియా రీల్స్, వ్యూస్ పిచ్చి జనాలను ఏ స్థాయికి తీసుకెళ్తోందో చెప్పడానికి అనేక ఘటనలు నిదర్శనంగా నిలుస్తున్నాయి. ఒకప్పుడు నాగుపాము కనిపిస్తే భయంతో పరుగు తీసేవారు, కానీ ఇప్పుడు కొందరు ప్రాణాలకు తెగించి వాటితో రీల్స్, వీడియోలు చేస్తూ వార్తల్లో నిలుస్తున్నారు. తాజాగా ఓ రైతు పొలంలో కనిపించిన విషపూరితమైన నాగుపాముతో చేసిన డేరింగ్ స్టంట్స్ ప్రస్తుతం నెట్టింట తీవ్ర చర్చనీయాంశంగా మారాయి.

వర్షాకాలం కావడంతో జనావాసాలు, పొలాల్లోకి పాముల సంచారం గణనీయంగా పెరిగింది. ఈ క్రమంలోనే ఓ రైతు పొలంలో పని చేసుకుంటుండగా భారీ నాగుపాము (కోబ్రా) ఎదురైంది. సాధారణంగా పామును చూస్తే దూరంగా పారిపోవడం లేదా స్నేక్ క్యాచర్‌కు సమాచారం ఇవ్వడం చేస్తారు. కానీ ఈ రైతు మాత్రం దాన్ని ఏమాత్రం భయం లేకుండా చేతులతో పట్టుకున్నాడు. అంతటితో ఆగకుండా శివుడి అవతారంలో ఉన్నట్లు ఫీలవుతూ ఆ విష సర్పాలను తన మెడలో వేసుకున్నాడు.

అక్కడున్న తోటి కూలీలు, గ్రామస్థులు భయంతో అరిచినా, వద్దని వారించినా ఆ రైతు మాత్రం వెనక్కి తగ్గలేదు. తన ఫోన్‌ను అక్కడున్న వారికి ఇచ్చి, తన విన్యాసాలను ఫోటోలు, వీడియోలు తీయాలని కోరాడు. ఆ నాగుపాము పదే పదే తీవ్రంగా బుసలు కొడుతూ, కాటు వేసేందుకు ప్రయత్నించినప్పటికీ, రైతు దాన్ని డైవర్ట్ చేస్తూ రకరకాల స్టంట్లు చేశాడు.

ఈ విన్యాసాలకు సంబంధించిన వీడియో ప్రస్తుతం సోషల్ మీడియాలో విపరీతంగా వైరల్ అవుతోంది. ఈ వీడియో చూసిన నెటిజన్లు తీవ్ర దిగ్భ్రాంతి వ్యక్తం చేస్తున్నారు. "పొరపాటున అది కాటు వేస్తే పరిస్థితి ఏంటి? ప్రాణాలతో చెలగాటం అవసరమా?" అని నెటిజన్లు ప్రశ్నిస్తున్నారు. లైక్స్, వ్యూస్ కోసం ఇలాంటి పిచ్చి పనులు చేసి ప్రాణాల మీదకు తెచ్చుకోవద్దని సెటైర్లు వేస్తూ హెచ్చరిస్తున్నారు. విష సర్పాలతో ఇలాంటి ప్రాణసంకటమైన విన్యాసాలు చేయడం చట్టరీత్యా నేరమే కాకుండా, ప్రాణాలకే ప్రమాదమని వన్యప్రాణి నిపుణులు హెచ్చరిస్తున్నారు.