Viral Story : జొమాటో బాయ్ నుంచి MBA టాపర్ వరకు.. కన్నీళ్లు తెప్పించే స్టోరీ.!

Viral Story : జీవితం మనల్ని ఎన్ని కష్టాల వైపు నెట్టినా, మనసులో బలమైన సంకల్పం ఉంటే సాధించలేనిది ఏదీ లేదని నిరూపించాడు హర్యానాకు చెందిన ఒక సామాన్య యువకుడు. ఒకప్పుడు పొట్టకూటి కోసం రోడ్లపై తిరుగుతూ జొమాటో (Zomato) డెలివరీ రైడర్‌గా పనిచేసిన ఆ యువకుడు, నేడు దేశంలోనే అత్యంత ప్రతిష్టాత్మకమైన ఢిల్లీ విశ్వవిద్యాలయం పరిధిలోని ‘ఫ్యాకల్టీ ఆఫ్ మేనేజ్‌మెంట్ స్టడీస్’ (FMS) లో సీటు సాధించి సరికొత్త చరిత్ర సృష్టించాడు. గిరీష్ శర్మ అనే ఈ యువకుడు “జొమాటో డెలివరీ రైడర్ నుండి ఎఫ్ఎంఎస్ ఢిల్లీ వరకు” అనే శీర్షికతో లింక్డ్‌ఇన్ (LinkedIn) వేదికగా పంచుకున్న తన కథ ప్రస్తుతం ఇంటర్నెట్‌ను షేక్ చేస్తోంది. అతను సంవత్సరాల తరబడి పడిన కష్టాలు, అనిశ్చితి, అవమానాలు , చివరికి సాధించిన విద్యా విజయం ప్రతి ఒక్కరినీ భావోద్వేగానికి గురిచేస్తున్నాయి.

ఆశలు కోల్పోయిన రోజులు.. కోవిడ్ తెచ్చిన మార్పు

గిరీష్ శర్మ తన పోస్ట్‌లో గత చేదు జ్ఞాపకాలను గుర్తుచేసుకుంటూ.. ఆరేళ్ల క్రితం రోజువారీ బతుకు గడవడం కోసం తన ఆశయాలన్నీ పూర్తిగా కోల్పోయానని ఎంతో ఆవేదనగా రాశారు. ప్రపంచాన్ని కోవిడ్-19 మహమ్మారి వణికించడానికి కొద్దికాలం ముందు, గిరీష్ తీవ్ర ఆర్థిక ఇబ్బందుల్లో ఉన్నాడు. ఆ సమయంలో బతకడం కోసం జొమాటో డెలివరీ రైడర్‌గా పార్ట్ టైమ్ ఉద్యోగం చేస్తూ, ఖాళీ సమయంలో విద్యార్థులకు ట్యూషన్లు బోధిస్తూ, దొరికిన చిన్న చిన్న పనులన్నీ చేసేవాడు.

అయితే, కరోనా మహమ్మారి కాలంలో విధించిన లాక్‌డౌన్ అతని జీవితంలో ఒక పెద్ద మలుపుగా మారింది. ఆ ఖాళీ సమయం తన భవిష్యత్తును, లక్ష్యాలను పునఃసమీక్షించుకోవడానికి అతనికి ఒక మంచి అవకాశం ఇచ్చింది. ఈ డెలివరీ బాయ్ జీవితాన్ని తాను ఎప్పటికీ కొనసాగించకూడదని, తనలోని ప్రతిభకు తగిన స్థానాన్ని సంపాదించుకోవాలని ఆ సమయంలోనే గిరీష్ బలంగా నిర్ణయించుకున్నాడు.

బిజినెస్ స్కూల్ కల.. క్యాట్ పరీక్షతో పోరాటం

వ్యాపార రంగం (బిజినెస్) పై క్రమంగా ఆసక్తి పెరగడంతో, దేశంలోని ఏదైనా ఒక అగ్రశ్రేణి బిజినెస్ స్కూల్ నుండి ఎంబీఏ (MBA) చేయాలని గిరీష్ లక్యం పెట్టుకున్నాడు. అయితే, నిరుపేద కుటుంబం నుండి వచ్చిన అతనికి ఐఐటీలు, ఐఐఎంలు రాసే అత్యంత కఠినమైన ప్రవేశ పరీక్షల (CAT) గురించి గానీ, ఆ తర్వాత జరిగే పర్సనల్ ఇంటర్వ్యూల ప్రక్రియ గురించి గానీ మొదట్లో ఎలాంటి అవగాహన లేదు. అయినా సరే పట్టువదలకుండా ఒంటరిగానే ప్రిపరేషన్ ప్రారంభించాడు.

అనేక అడ్డంకులు, వైఫల్యాలను దాటుకుంటూ ఎట్టకేలకు క్యాట్ (CAT) పరీక్షలో అద్భుతమైన పర్సంటైల్ సాధించాడు. ఆ తర్వాత దేశంలోని పలు ప్రముఖ మేనేజ్‌మెంట్ సంస్థల నుండి ఇంటర్వ్యూ కాల్స్ అందుకున్నాడు. కానీ, దురదృష్టవశాత్తూ చాలా సంస్థలు అతన్ని వెయిట్‌లిస్ట్‌లో పెట్టడం లేదా తిరస్కరించడం చేశాయి. చేతిలో ఒక సాధారణ కాలేజీ అడ్మిషన్ ఆఫర్ ఉన్నప్పటికీ, గిరీష్ దానికి సంతృప్తి పడలేదు. మళ్లీ పట్టుదలతో ప్రయత్నించి, చివరకు దేశ రాజధానిలోనే టాప్ బి-స్కూల్ అయిన ఎఫ్ఎంఎస్ ఢిల్లీలో ఈ ఏడాది ప్రతిష్టాత్మకమైన సీటును కైవసం చేసుకున్నాడు.

సహాయం చేసిన వారికి కృతజ్ఞతలు

ఈ సుదీర్ఘమైన , కష్టతరమైన ప్రిపరేషన్ ప్రయాణంలో తనకు అండగా నిలిచిన ప్రతి ఒక్కరికీ గిరీష్ తన పోస్ట్‌లో హృదయపూర్వక కృతజ్ఞతలు తెలిపాడు. ముఖ్యంగా తన ఆత్మవిశ్వాసాన్ని నిరంతరం పెంపొందించిన ఆన్‌లైన్ కోచింగ్ ప్లాట్‌ఫారమ్‌ల ఫ్యాకల్టీ సభ్యులకు, ఇంటర్వ్యూ మెంటర్‌లకు , మార్గదర్శకులకు ప్రత్యేక ధన్యవాదాలు చెప్పాడు. ఈ సుదీర్ఘ పోరాటంలో పేరుపేరునా ప్రతి ఒక్కరినీ ప్రస్తావించలేకపోయినా, స్నేహితులు, సహోద్యోగులు చూపిన మద్దతు తనను ఇక్కడి దాకా తీసుకువచ్చిందని భావోద్వేగానికి లోనయ్యాడు. చివరగా, జీవితంలో ఎదురుదెబ్బలు తింటూ నిరాశలో ఉన్న తోటి యువతకు సందేశమిస్తూ.. ప్రయాణంలో ఎలాంటి కష్టాలు వచ్చినా పట్టువదలకుండా ముందుకు సాగాలని పిలుపునిచ్చాడు.

నెటిజన్ల ఫిదా.. ఇంటర్నెట్‌లో ప్రశంసల వర్షం

గిరీష్ శర్మ రాసిన ఈ పోస్ట్ లింక్డ్‌ఇన్‌లో అప్‌లోడ్ చేసిన కొద్దిసేపటికే ప్రపంచవ్యాప్తంగా ఉన్న నెటిజన్లను విపరీతంగా ఆకట్టుకుంది. కార్పొరేట్ దిగ్గజాల నుండి సామాన్యుల వరకు అందరూ అతని పట్టుదలను, అంకితభావాన్ని కొనియాడుతున్నారు. ఒక నెటిజన్ స్పందిస్తూ.. ఇది కేవలం ఒక విజయం మాత్రమే కాదని, సంకల్పం , కష్టపడే తత్వానికి నిలువెత్తు నిదర్శనమని, ఒక మనిషి ఉన్న ప్రస్తుత పరిస్థితులు అతని అసలు సామర్థ్యాన్ని ఎప్పటికీ నిర్వచించలేవని కామెంట్ చేశారు.