Ashadha Amavasya 2026: అషాఢం చివరి అమావాస్య ఎందుకు ప్రత్యేకమైనదో తెలుసా? పితృదేవతల ఆశీర్వాదం ఎలా పొందాలంటే

Ashadha Amavasya 2026: హిందూ ధర్మంలో అమావాస్య తిథికి, ప్రత్యేకించి ఆషాఢ మాసంలో వచ్చే చివరి అమావాస్యకు ఆధ్యాత్మికంగా ఎంతో విశిష్టమైన స్థానం ఉంది. దీనిని ఉత్తరాదిలో 'హరియాలీ అమావాస్య' అని, మన వద్ద ఆషాఢ అమావాస్య అని పిలుస్తారు. ఈ పవిత్ర రోజున ఆచరించే పితృ తర్పణాలు, శ్రాద్ధ కర్మలు, దానధర్మాలు పితృదేవతలకు సద్గతిని అందించడమే కాకుండా మన కుటుంబానికి వారి పరిపూర్ణ ఆశీస్సులను అందిస్తాయి. 2026 సంవత్సరంలో ఈ పవిత్ర అమావాస్య తిథి ఆగస్టు 12న వస్తోంది.

తిథి వివరాలు ... ఆగస్టు 12 ప్రాధాన్యత

పంచాంగం ప్రకారం, అమావాస్య తిథి ఆగస్టు 12వ తేదీ రాత్రి 01:52 నిమిషాలకు ప్రారంభమై, అదే రోజు రాత్రి 11:06 నిమిషాలకు ముగుస్తుంది. ఉదయ తిథి మహత్యాన్ని ప్రామాణికంగా తీసుకుని ఆగస్టు 12వ తేదీ రోజంతా అమావాస్య వ్రతం, పితృ పూజలు, దేవతారాధనలు నిర్వహించుకోవాలని ధర్మశాస్త్రాలు చెబుతున్నాయి. ఈ దివ్యమైన రోజున పూర్వీకులను తృప్తి పరచడానికి కొన్ని నియమాలను, పూజా విధానాలను పాటించాలని పండితులు చెబుతున్నారు. ఉదయమే సూర్యోదయానికి ముందే మేల్కొని తలస్నానం ఆచరించి, పవిత్రమైన తెల్లటి లేదా ఉతుక్కున్న వస్త్రాలు ధరించాలి. ఇంటి ఆవరణలో లేదా పవిత్ర ప్రదేశంలో దక్షిణ దిశ వైపు ముఖం చేసి కూర్చోవాలి. ఒక పాత్రలోని నీటిలో నల్ల నువ్వులు, గరిక, సుగంధ పుష్పాలు వేసుకోవాలి. మన పూర్వీకుల గోత్ర నామాలను స్మరిస్తూ, భక్తితో నీటిని తర్పణంగా వదలాలి. అయితే, శాస్త్రోక్తమైన మంత్రాలు లేదా సంపూర్ణ విధివిధానాలు తెలియనివారు, దక్షిణ దిశగా నిలబడి మనస్ఫూర్తిగా "ఓం పితృదేవతాభ్యో నమః" అని స్మరిస్తూ దోసిలితో నీటిని అర్ఘ్యంగా సమర్పించినా పితృదేవతలు శాంతిస్తారు.

పితృదోష నివారణకు ముఖ్యమైన పరిహారాలు

పితృదేవతల అనుగ్రహం పొంది వంశాభివృద్ధి, ఐశ్వర్యాన్ని పొందడానికి మూడు పరిహారాలు ఆచరించడం శ్రేయస్కరమని పండితులు చెబుతున్నారు. పేదలకు అన్నదానం, బ్రాహ్మణులకు లేదా నిరుపేదలకు పండ్లు, ధాన్యాలు, వస్త్రాలు దానం చేయడం వల్ల అక్షయ పుణ్యఫలం లభిస్తుంది. అంతేకాదు, కాకులకు, ఆవులకు, కుక్కలకు ఆహారం లేదా గ్రాసం అందించాలి. మన సంప్రదాయంలో కాకులు పితృదేవతల స్వరూపంగా భావిస్తారు. ఇక సాయంత్రం వేళ రావి చెట్టు మొదట్లో ఆవనూనెతో దీపం వెలిగించి ఏడు ప్రదక్షిణలు చేయడం ద్వారా జాతకంలో ఉన్న తీవ్ర పితృదోషాల ప్రభావం తొలగిపోతుంది. ఈ అమావాస్య నాడు పితృ పూజతో పాటు ఈశ్వరనామ స్మరణ చేయడం వల్ల సకల పాపాలు తొలగి ఇంట శాంతి, సౌభాగ్యాలు వెల్లివిరుస్తాయని పండితులు చెబుతున్నారు.