Duryodhana Chose Krishna Army: కురుక్షేత్రంలో దుర్యోధనుడికే ముందుగా అవకాశం...అలా చేసుంటే ఫలితం ఎలా ఉండేదో

Duryodhana Chose Krishna Army: మహాభారత యుద్ధంలో పాండవుల విజయం వెనుక కేవలం వారి వీరత్వం మాత్రమే లేదు, పరమాత్ముడైన శ్రీకృష్ణుని వ్యూహం ఉంది. యుద్ధానికి ముందు శ్రీకృష్ణుడు తనను, తన 'నారాయణీ సేన'ను పంచుకునేలా కురుపాండవులకు ఒక అద్భుతమైన అవకాశం ఇచ్చారు. ఈ ఎంపికలో దుర్యోధనుడికి మొదటి అవకాశం లభించినప్పటికీ, అతడు భగవంతుడిని వదిలి సైన్యాన్ని కోరుకున్నాడు. ఒకవేళ దుర్యోధనుడు సైన్యానికి బదులు కృష్ణుడినే ఎంచుకుని ఉంటే, కురుక్షేత్ర ఫలితం ఎలా ఉండేదో తెలుసుకుందాం.

ఆ రాత్రి ద్వారకలో ఏం జరిగింది?

కురుక్షేత్ర యుద్ధం ఖాయమయ్యాక, సహాయం కోరడం కోసం దుర్యోధనుడు, అర్జునుడు ఇద్దరూ ఒకే రోజు ద్వారకకు చేరుకున్నారు. శ్రీకృష్ణుడు అప్పుడు నిద్రిస్తున్నారు. అహంకారంతో దుర్యోధనుడు కృష్ణుడి తల వైపు ఉన్న సింహాసనంపై కూర్చోగా, వినయంతో అర్జునుడు స్వామి పాదాల చెంత నిలబడ్డాడు. కృష్ణుడు కళ్లు తెరవగానే మొదట పాదాల చెంత ఉన్న అర్జునుడు కనిపించాడు. కానీ, తాను ముందే వచ్చానని దుర్యోధనుడు వాదించడంతో, కృష్ణుడు ఇద్దరికీ సమాన అవకాశం ఇవ్వాలని నిర్ణయించారు.

ఒకవైపు 1,00,000 మంది వీరులు గల అత్యంత బలమైన 'నారాయణీ సేన', మరోవైపు ఆయుధం పట్టని నిరాయుధుడైన తాను ఒంటరిగా ఉంటానని కృష్ణుడు ప్రకటించారు. వయసులో చిన్నవాడైన అర్జునుడికి మొదటి ఎంపిక అవకాశం ఇచ్చారు. అర్జునుడు ఏమాత్రం ఆలోచించకుండా, "స్వామి! మాకు నీవే కావాలి" అని కృష్ణుడిని కోరుకున్నాడు. లోపల భయపడుతున్న దుర్యోధనుడు, అర్జునుడి నిర్ణయానికి ఎంతో సంతోషించి, ఆ బలమైన నారాయణీ సేనను తన సొంతం చేసుకున్నాడు.

దుర్యోధనుడు కృష్ణుడిని ఎంచుకుని ఉంటే?

నిజానికి, దుర్యోధనుడికి మొదటి నుంచీ సంఖ్యాబలం, శారీరక బలంపైనే నమ్మకం ఎక్కువ. అందుకే 11 అక్షౌహిణుల మహా సైన్యాన్ని కూడగట్టాడు. ఒకవేళ దుర్యోధనుడు కృష్ణుడిని తన వైపు తిప్పుకుని ఉంటే ఏమయ్యేదో ఊహించడం ఎంతో ఆసక్తికరం. పాండవులకు శ్రీకృష్ణుడే సర్వస్వం. ఆయన తనతో లేరని తెలిస్తే పాండవులు కురుక్షేత్ర యుద్ధానికి ముందే మానసికంగా సగం ఓటమిపాలయ్యేవారు. ఇక ఈ యుద్ధంలో భీష్మ, ద్రోణ, కర్ణుల పతనానికి శ్రీకృష్ణుడి వ్యూహాలే కారణం. కృష్ణుడు కౌరవుల వైపు ఉంటే ఆ వ్యూహాలు పాండవులపై ప్రయోగించేవారేమో.

అయితే, ఇక్కడే ఒక సూక్ష్మ ఆధ్యాత్మిక సత్యం ఉంది. కృష్ణుడు ఎక్కడ ఉంటే అక్కడే ధర్మం ఉంటుంది, ఎక్కడ ధర్మం ఉంటే అక్కడే విజయం ఉంటుంది. ఒకవేళ దుర్యోధనుడు కృష్ణుడిని కోరుకుని ఉంటే, భగవంతుడి సాన్నిహిత్యం వల్ల అతనిలోని అహంకారం నశించి, యుద్ధం జరగకుండానే పాండవులకు సగౌరవంగా రాజ్యం ఇచ్చేసే సద్బుద్ధి దుర్యోధనుడికి కలిగేదేమో! అంతిమంగా, మానవ మాత్రుడైన దుర్యోధనుడు కేవలం బాహ్య బలాన్ని అంటే తనపక్కన ఉన్న భారీ సైన్యాన్ని మాత్రమే నమ్మాడు. కానీ ఆత్మబలమైన భగవంతుడిని నమ్మిన అర్జునుడు రథసారథిగా కృష్ణుడిని పొంది విజేతగా నిలిచాడు. బాహ్య శక్తుల కంటే అంతర్గత దైవబలమే గొప్పదనేదే ఈ కథ మనకు నేర్పే పరమార్థం.