Guru Purnima: గురుపౌర్ణమి విశిష్టత...వ్యాసమహర్షిని ఎందుకు ఆరాధిస్తారో తెలుసా?

Guru Purnima: మానవాళికి జ్ఞానదీపాన్ని వెలిగించి, సనాతన ధర్మానికి మూలస్తంభంగా నిలిచిన పవిత్రమైన రోజు 'గురుపౌర్ణమి'. అజ్ఞానమనే అంధకారాన్ని తొలగించి భగవత్ ప్రాప్తికి మార్గం చూపే గురువును సాక్షాత్తు త్రిమూర్తుల స్వరూపంగా భావించడం మన సంప్రదాయం. ప్రతి ఏటా ఆషాఢ మాసంలో వచ్చే పౌర్ణమిని 'వ్యాస పౌర్ణమి'గా, 'గురుపౌర్ణమి'గా ఎంతో భక్తిశ్రద్ధలతో జరుపుకుంటాం. అసలు ఈ రోజున వ్యాసభగవానుడినే ఆదిగురువుగా ఎందుకు ఆరాధిస్తారో, దీని వెనుక ఉన్న దివ్యమైన చారిత్రక ఆధ్యాత్మిక ఆంతర్యమేమిటో తెలుసుకుందాం.

వేదవ్యాస మహర్షి జననం ... వేదాల వర్గీకరణ

హిందూ విశ్వాసాల ప్రకారం, ద్వాపర యుగంలో పరాశర మహర్షి , సత్యవతి దేవిల దివ్య దంపతులకు ఆషాఢ పౌర్ణమి నాడు వ్యాస మహర్షి జన్మించారు. మానవాళికి అత్యంత పవిత్రమైన విజ్ఞానాన్ని అందించిన మహోన్నత మహర్షి ఆయన. అపరిమితమైన జ్ఞానరాశిగా ఉన్న వేదాలను సామాన్యులకు సైతం అందుబాటులోకి తేవాలనే సంకల్పంతో ఆయన వాటిని విశ్లేషించారు. ఋగ్వేదం, యజుర్వేదం, సామవేదం, అధర్వణవేదం అనే నాలుగు విభాగాలుగా వర్గీకరించడం ఆషాఢ పౌర్ణమి నాడే పూర్తయింది. వేదాలను వ్యాప్తి చేసినందుకే ఆయనకు 'వేదవ్యాసుడు' అనే పవిత్ర నామం స్థిరపడింది. అంతేకాదు, వ్యాసభగవానుడు కేవలం వేదాలనే కాక, పంచమ వేదంగా పిలువబడే 18 పర్వాల 'మహాభారతం', 18 అష్టాదశ పురాణాలు, 'శ్రీమద్భాగవతం'లను మానవాళి శ్రేయస్సు కోసం అందించారు.

ఆదిగురువుగా వ్యాస మహర్షి ప్రాశస్త్యం

సనాతన ధర్మంలో లభించే సమస్త ఆధ్యాత్మిక విజ్ఞానానికి, ధర్మ సూత్రాలకు వేదవ్యాసుడే మూలకారణం. అందుకే "వ్యాసో నారాయణో హరిః" అని వ్యాసుడిని సాక్షాత్తు శ్రీమహావిష్ణువు అవతారంగా కీర్తిస్తారు. మనకు విద్యను, జ్ఞానాన్ని బోధించే ప్రతి గురువులోనూ వ్యాస మహర్షి అంశ భాసిల్లుతుంది. అందుకే గురు పరంపరలో వేదవ్యాసుడిని 'ఆదిగురువు'గా పూజిస్తారు.

గురుపూజ ... ఆచరించాల్సిన నియమాలు

ఈ పవిత్ర రోజున భక్తులు, శిష్యులు తమ ఆధ్యాత్మిక గురువులను, ఇష్ట దైవాలను దర్శించుకుని పవిత్రమైన పూజలు నిర్వహిస్తారు. ఈ రోజున గురువులకు పాదపూజ చేసి, వస్త్రాలు, ఫలాలు సమర్పించి వారి దివ్యాశీస్సులు పొందుతారు. అదేవిధంగా గురువులు అందుబాటులో లేనివారు వేదవ్యాస భగవానుడి పటాన్ని లేదా శివ, దత్తాత్రేయ స్వరూపాలను అష్టోత్తర శతనామావళితో అర్చిస్తారు. వ్యాస పౌర్ణమి నాడు గురుకృపను పొంది, వారు చూపిన జ్ఞాన మార్గంలో నడవడమే మనం వ్యాసభగవానునికి ఇచ్చే నిజమైన గురుదక్షిణ. ఈ గురు పౌర్ణమినాడు కనీసం స్వామివారి చిత్రపటానికి మనఃస్పూర్తిగా దణ్ణం పెట్టుకున్నా పుణ్యం లభిస్తుంది.