Nandi Temple Mystery: శివుడి తలపై నందీశ్వరుడు... ఈ విచిత్రం వెనుక రహస్యమేంటో తెలుసా?
నంది నోటి నుంచి నిరంతరం జలం వచ్చి శివలింగంపై అభిషేకం చేసే అద్భుత క్షేత్రం ఇది. 1997లో వెలుగులోకి వచ్చిన నంది తీర్థ కణ్యాణి ఆలయ విశేషాలు, జలధార రహస్యం గురించి తెలుసుకుందాం.
Nandi Temple Mystery: శివాలయం అంటే ముందుగా గుర్తొచ్చేది శివలింగం.. ఆ తర్వాత శివుడికి ఎదురుగా ప్రశాంతంగా కూర్చునే నందీశ్వరుడు. సాధారణంగా ప్రతి శివాలయంలోనూ శివలింగానికి ఎదురుగా నందిని దర్శించుకుంటాం. కానీ కర్ణాటకలోని ఓ పురాతన క్షేత్రంలో మాత్రం నంది కేవలం శివుడిని చూస్తూ ఉండడు. ఏకంగా శివుడి తలపై కొలువై ఉండి, తన నోటి నుంచి వచ్చే నీటితో స్వామికి నిరంతరం అభిషేకం చేస్తుంటాడు. ఇదే ఈ క్షేత్రంలోని అత్యంత ఆసక్తికరమైన విశేషం.
కాడు మల్లేశ్వర స్వామి ఆలయం
బెంగళూరులోని కాడు మల్లేశ్వర స్వామి ఆలయానికి సమీపంలో ఉన్న దక్షిణాముఖ నందీశ్వరుడు, నంది తీర్థ కణ్యాణి క్షేత్రం ఈ ప్రత్యేకతకు ప్రసిద్ధి చెందింది. ఇక్కడ నందీశ్వరుడి నోటి నుంచి నిరంతరం జలం వస్తూ ఉంటుంది. ఆ నీరు నేరుగా గర్భగుడిలోని శివుడిపై పడుతుంది. స్వామికి అభిషేకం చేసిన తర్వాత అదే నీరు ఆలయం ఎదురుగా ఉన్న కళ్యాణి తీర్థంలోకి చేరుతుంది. ఈ క్షేత్రంలో మరో విశేషం ఏమిటంటే.. ఈ ఆలయం సాధారణంగా నిర్మించిన ఆలయం కాదు. దాదాపు 1997లో జరిగిన పురావస్తు తవ్వకాల సమయంలో ఇది వెలుగులోకి వచ్చింది. కాడు మల్లేశ్వర స్వామి ఆలయానికి ఎదురుగా ఉన్న ఖాళీ స్థలంలో ఓ నిర్మాణం చేపట్టేందుకు పురావస్తు శాఖ ఆధ్వర్యంలో తవ్వకాలు చేపట్టారు. ఆ సమయంలో భూమిలో నుంచి నందీశ్వరుడి విగ్రహం బయటపడింది. దాని కింద మరింత పరిశీలన చేయగా భూగర్భంలో దాగి ఉన్న శివాలయం బయటపడింది.
నందీశ్వరుడి నోటి నుంచి నీరు
ఆలయం వెలుగులోకి వచ్చిన తర్వాత అందరినీ ఆశ్చర్యపరిచిన విషయం నంది నోటి నుంచి వస్తున్న నీరు. ఆలయం భూమిలో కప్పబడి ఉన్న కాలంలో కూడా నంది నోటి నుంచి జలం ప్రవహిస్తూనే ఉండేదని స్థానిక పండితులు, భక్తులు చెబుతుంటారు. ఆలయం బయటపడిన తర్వాత కూడా ఆ జలధార ఆగలేదు. ఇప్పటికీ నంది నోటి నుంచి వచ్చే నీరు శివలింగంపై పడుతూనే ఉంటుంది. అయితే ఇక్కడే అసలు ఆసక్తికరమైన ప్రశ్న మొదలవుతుంది. నంది నోటి నుంచి నిరంతరం వస్తున్న ఈ నీరు ఎక్కడి నుంచి వస్తోంది? దీనికి ఇప్పటివరకు స్పష్టమైన సమాధానం దొరకలేదు. భూగర్భ జల ప్రవాహాలకు సంబంధించిన నిర్మాణం ఉండొచ్చనే అభిప్రాయాలు ఉన్నప్పటికీ, నీటి మూలం పూర్తిగా ఇదేనని నిర్ధారించే విషయం మాత్రం స్పష్టంగా తెలియదు.
వృషభావతి జన్మస్థానం
ఈ ప్రాంతానికి సమీపంలో ప్రవహించే వృషభావతి నది జన్మస్థానం కూడా నందీశ్వరుడి వద్దనే ఉందని కొందరు పరిశోధకులు చెబుతున్నారు. నంది తీర్థం చుట్టుపక్కల ప్రాంతాలతో పోలిస్తే తక్కువ ఎత్తులో ఉండటంతో కాలక్రమంలో భవనాల నిర్మాణం పెరిగి ఈ ఆలయం భూమిలోకి కూరుకుపోయి ఉండవచ్చని నిపుణుల అభిప్రాయం. ఆలయానికి ప్రత్యేకమైన శిఖరం లేకపోవడం కూడా కాలక్రమంలో ఇది ప్రజల దృష్టికి దూరం కావడానికి ఒక కారణంగా చెబుతారు.
ఆరోగ్యం...సంతాన ప్రాప్తి
ఈ క్షేత్రంలోని కళ్యాణి తీర్థానికి కూడా భక్తుల్లో ప్రత్యేకమైన విశ్వాసం ఉంది. అక్కడి నీటిని స్వీకరిస్తే కఠినమైన అనారోగ్య సమస్యల నుంచి ఉపశమనం లభిస్తుందని, సంతానప్రాప్తి కలుగుతుందని, కోరుకున్న కోరికలు నెరవేరుతాయని స్థానిక పండితులు చెబుతారు. ఇవి భక్తుల విశ్వాసాలకు సంబంధించిన విషయాలే అయినప్పటికీ, ఆ నమ్మకంతో దేశంలోని వివిధ ప్రాంతాల నుంచి భక్తులు ఇక్కడికి వస్తుంటారు. ముఖ్యంగా కార్తీక మాసంలో ఈ ఆలయానికి భక్తుల రద్దీ మరింత పెరుగుతుంది. అయితే ఈ క్షేత్రం ప్రత్యేకత ఒక్క పండుగ రోజుకే పరిమితం కాదు. ఏడాది పొడవునా భక్తులు నందీశ్వరుడిని దర్శించుకుని పూజలు చేస్తుంటారు. శివుడి తలపై నంది.. నంది నోటి నుంచి జలం.. ఆ జలంతో శివుడికి నిత్యాభిషేకం.. ఈ దృశ్యం భక్తులకు ఆధ్యాత్మిక అనుభూతిని కలిగిస్తుంది. ఒకప్పుడు భూమిలో మరుగునపడిపోయిన ఈ ఆలయం 1997లో వెలుగులోకి రావడం, అప్పటి నుంచి నంది జలధారపై ఆసక్తి కొనసాగుతుండటం ఈ క్షేత్రాన్ని మరింత ప్రత్యేకంగా నిలబెట్టింది. భక్తి, పురాతన నిర్మాణం, ప్రకృతి రహస్యం.. ఈ మూడింటి కలయికగా కనిపించే ఈ నందీ తీర్థ క్షేత్రం కర్ణాటకలోని ఆసక్తికరమైన శైవ పుణ్యక్షేత్రాల్లో ఒకటిగా నిలిచింది.
Balachander
బాలచందర్ పెళ్లూరి తెలుగు మీడియా రంగంలో 12 ఏళ్లకు పైగా అనుభవం కలిగిన సీనియర్ న్యూస్, పొలిటికల్, భక్తి కంటెంట్ రైటర్, ఎడిటర్. హైదరాబాద్ కేంద్రంగా టీవీ, డిజిటల్ జర్నలిజంలో పనిచేశారు. పొలిటికల్ విశ్లేషణ, ఆధ్యాత్మిక రచనల్లో నైపుణ్యం కలిగి, పొలిటికోస్, ఎన్టీవీ డిజిటల్, మల్లెమాల ఎంటర్టైన్మెంట్లో సేవలందించారు. ఎడిటోరియల్ లీడర్షిప్, కథనం చెప్పే శైలిలో ప్రత్యేక గుర్తింపు పొందారు.
