Navaratrulu 2026: నవరాత్రులకు సిద్ధ‌మ‌వుతోన్న భ‌క్త‌జ‌నం.. ఏ రోజు ఏ రూపాన్ని పూజించాలో తెలుసా?

Navaratrulu 2026: శక్తి ఆరాధనకు ప్రత్యేకమైన పర్వదినాలుగా భావించే శారదీయ నవరాత్రులు 2026లో అక్టోబర్ 11 నుంచి ప్రారంభం కానున్నాయి. తొమ్మిది రోజుల పాటు అమ్మవారిని వివిధ రూపాల్లో భక్తులు పూజించనున్నారు. అక్టోబర్ 19న మహానవమి నిర్వహించగా.. అక్టోబర్ 20న విజయదశమితో నవరాత్రి ఉత్సవాలు ముగుస్తాయి.

అక్టోబర్ 11న ఘటస్థాపనతో నవరాత్రులకు శ్రీకారం

ఆశ్వయుజ శుక్ల పక్ష ప్రతిపద తిథిని నవరాత్రుల ప్రారంభానికి ప్రాతిపదికగా తీసుకుంటారు. 2026లో ప్రతిపద తిథి అక్టోబర్ 10 రాత్రి ప్రారంభమై అక్టోబర్ 11 రాత్రి వరకు కొనసాగుతుంది. ఉదయ తిథి ప్రకారం అక్టోబర్ 11న నవరాత్రుల తొలిరోజుగా పరిగణిస్తారు. ఈ రోజున ఇళ్లలో శుభ్రత పూర్తి చేసి పూజా స్థలాన్ని సిద్ధం చేసుకుని ఘటస్థాపన చేస్తారు. కలశాన్ని ఏర్పాటు చేసి అమ్మవారిని ఆహ్వానించి ప్రత్యేక పూజలు ప్రారంభిస్తారు.

నవరాత్రుల ప్రారంభ రోజున శక్తి స్వరూపిణి అమ్మవారిని భక్తితో కొలవడం ముఖ్యమైన ఆచారంగా భావిస్తారు. కొన్ని ప్రాంతాల్లో స్థానిక సంప్రదాయాలకు అనుగుణంగా అమ్మవారి రూపంలో స్వల్ప మార్పులు కనిపిస్తాయి. పూజా మందిరంలో అఖండ దీపాన్ని వెలిగించి నవరాత్రులు పూర్తయ్యే వరకు దీపారాధన కొనసాగించే సంప్రదాయం కూడా అనేక కుటుంబాల్లో ఉంది. ఘటస్థాపనకు సంబంధించిన సమయాన్ని మాత్రం ఆయా ప్రాంతాల పంచాంగం ఆధారంగా నిర్ణయించుకోవడం మంచిది.

తొమ్మిది రోజులు.. అమ్మవారి ప్రత్యేక రూపాల ఆరాధన

నవరాత్రుల్లో ప్రతి రోజూ అమ్మవారిని ఒక ప్రత్యేక రూపంలో పూజించడం ఆనవాయితీ. ఆయా ప్రాంతాల్లో పాటించే సంప్రదాయాన్ని అనుసరించి పూజా క్రమం ఇలా ఉంటుంది. అక్టోబర్ 11న బాల త్రిపుర సుందరి దేవి, అక్టోబర్ 12న గాయత్రీ దేవి, అక్టోబర్ 13న అన్నపూర్ణాదేవిని పూజిస్తారు. అక్టోబర్ 14న లలితా దేవి, అక్టోబర్ 15న చండీ దేవి, అక్టోబర్ 16న మహాలక్ష్మీదేవి ఆరాధన జరుగుతుంది.

అక్టోబర్ 17న సరస్వతీదేవి, అక్టోబర్ 18న దుర్గాదేవి, అక్టోబర్ 19న మహిషాసుర మర్దిని రూపంలో అమ్మవారిని కొలుస్తారు. చివరి రోజు మహానవమి కావడంతో భక్తులు ప్రత్యేక పూజలు, నైవేద్యాలు, హోమాలు నిర్వహిస్తారు. అయితే దేశంలోని వివిధ ప్రాంతాల్లో నవరాత్రి పూజా క్రమం, అమ్మవారి అలంకరణల్లో స్థానిక సంప్రదాయాల ప్రభావం ఉండొచ్చు.

అష్టమి, నవమి రోజుల్లో ప్రత్యేక పూజలు

అక్టోబర్ 18న దుర్గాష్టమి పర్వదినాన్ని నిర్వహించనున్నారు. ఈ రోజున అమ్మవారికి ప్రత్యేక పూజలు చేయడంతో పాటు కొందరు భక్తులు హోమాలు, కన్యా పూజలు నిర్వహిస్తారు. చిన్నారులను అమ్మవారి స్వరూపంగా భావించి పూజించే సంప్రదాయం కూడా ఉంది. నవరాత్రి వ్రతాన్ని పాటించే వారు తమ కుటుంబ ఆచారం, పంచాంగ విధానాన్ని బట్టి ఉపవాస నియమాలను అనుసరిస్తారు.

అక్టోబర్ 19న మహానవమి జరుపుకుంటారు. ఈ రోజుతో నవరాత్రి పూజలు ముగింపు దశకు చేరుకుంటాయి. వ్రతం ఆచరించిన భక్తులు నవమి రోజున కన్యా పూజ పూర్తి చేసి వ్రత పారణ చేయడం కొన్ని సంప్రదాయాల్లో కనిపిస్తుంది. ఈ సందర్భంగా అమ్మవారికి ప్రత్యేక నైవేద్యాలు సమర్పించి కుటుంబ సభ్యుల శ్రేయస్సు కోసం ప్రార్థనలు చేస్తారు.

అక్టోబర్ 20న విజయదశమితో ఉత్సవాలకు ముగింపు

నవరాత్రుల అనంతరం అక్టోబర్ 20న దసరా పండుగను జ‌రుపుకుంటారు. చెడుపై మంచి సాధించిన విజయానికి ప్రతీకగా ఈ పర్వదినాన్ని భావిస్తారు. శ్రీరాముడు రావణుడిపై సాధించిన విజయంతో పాటు దుర్గాదేవి మహిషాసురుడిని సంహరించిన ఘటనలను కూడా విజయదశమి సందర్భంగా స్మరించుకుంటారు.

దేశంలోని పలు ప్రాంతాల్లో ఈ రోజున అమ్మవారి విగ్రహాల నిమజ్జనం నిర్వహిస్తారు. మరికొన్ని ప్రాంతాల్లో శమీ పూజ, ఆయుధ పూజ, విద్యారంభం వంటి ప్రత్యేక ఆచారాలు ఉంటాయి. నవరాత్రుల్లో భక్తితో అమ్మవారిని ఆరాధించిన అనంతరం విజయదశమి రోజున విజయాన్ని, శుభాన్ని కోరుకుంటూ పూజలు ముగించడం సంప్రదాయంగా కొనసాగుతోంది.