Navratri 2026: దేవి నవరాత్రులు 2026ః దుర్గాదేవి వాహన విశేషాలు...గజ, కోడి వాహనాల విశిష్టతలు ఇవే

Navratri 2026: శారదీయ నవరాత్రులు అంటే అమ్మవారి ఆరాధనతో పాటు ఎన్నో సంప్రదాయాలు, విశ్వాసాలకు ప్రత్యేకమైన సమయం. తొమ్మిది రోజుల పాటు దుర్గాదేవి వివిధ రూపాల్లో పూజలందుకునే ఈ పర్వదినాల్లో అమ్మవారి ఆగమన, గమన వాహనాలకు కూడా ప్రత్యేక ప్రాధాన్యత ఉంది. నవరాత్రులు ఏ రోజు ప్రారంభమవుతున్నాయి, ఏ వారంలో ముగుస్తున్నాయి అనే దానిని బట్టి దుర్గాదేవి వాహనాన్ని నిర్ణయిస్తారని ధార్మిక, జ్యోతిష్య సంప్రదాయాలు చెబుతున్నాయి. 2026లో శారదీయ నవరాత్రులు అక్టోబర్ 11న ప్రారంభమై, అక్టోబర్ 20న విజయదశమితో ముగియనున్నాయి. ఈ ఏడాది అమ్మవారు గజ వాహనంపై అంటే ఏనుగుపై భూమిపైకి వస్తారని, తిరుగు ప్రయాణంలో చరణాయుధం అని పిలిచే కోడి వాహనాన్ని అధిరోహిస్తారని సంప్రదాయ విశ్వాసం. ఈ రెండు వాహనాలకు భిన్నమైన సంకేతార్థాలు ఉండటం ఇప్పుడు ఆసక్తికరంగా మారింది.

ఏ రోజును బట్టి అమ్మవారి వాహనం నిర్ణయిస్తారు?

నవరాత్రుల ప్రారంభ రోజును బట్టి దుర్గాదేవి వాహనం మారుతుందని జ్యోతిష్య సంప్రదాయంలో చెబుతారు. నవరాత్రులు ఆదివారం లేదా సోమవారం ప్రారంభమైతే అమ్మవారి వాహనం ఏనుగు. మంగళవారం లేదా శనివారం ప్రారంభమైతే గుర్రాన్ని వాహనంగా పరిగణిస్తారు. గురువారం లేదా శుక్రవారం ప్రారంభమైతే పల్లకి లేదా డోలీ వాహనంగా భావిస్తారు. ఇక బుధవారం నవరాత్రులు మొదలైతే పడవ వాహనంగా చెబుతారు. ఈ ఏడాది నవరాత్రులు ఆదివారం, అక్టోబర్ 11న ప్రారంభమవుతున్నాయి. అందువల్ల దుర్గాదేవి గజ వాహనంపై వస్తారని చెబుతున్నారు.

ఏనుగుపై దుర్గమ్మ రావడం అంటే ఏమిటి?

దుర్గాదేవి ఏనుగుపై రావడాన్ని సాధారణంగా శుభసూచకంగా పరిగణిస్తారు. ఏనుగు భారతీయ సంప్రదాయంలో శాంతి, జ్ఞానం, సౌభాగ్యం, ఐశ్వర్యానికి ప్రతీకగా నిలుస్తుంది. అందుకే అమ్మవారి గజ వాహన ఆగమనాన్ని ప్రజలకు అనుకూలమైన సంకేతంగా భావిస్తారు. ఈ విశ్వాసం ప్రకారం వర్షాలు సమృద్ధిగా కురిసి వ్యవసాయానికి మేలు జరగడం, ధాన్య సంపద పెరగడం, ఆర్థిక ఇబ్బందులు కొంత తగ్గడం వంటి ఫలితాలను గజ వాహనంతో అనుసంధానిస్తారు. వ్యక్తిగత జీవితంలోనూ ప్రశాంతత, సానుకూల ఆలోచనలు పెరుగుతాయని నమ్మకం ఉంది. అయితే ఇవన్నీ జ్యోతిష్య, ధార్మిక విశ్వాసాల ఆధారంగా చెప్పే ఫలితాలు మాత్రమే. వాటిని శాస్త్రీయంగా నిర్ధారించిన అంశాలుగా చూడకూడదు.

కోడి వాహనంపై అమ్మవారి తిరుగు ప్రయాణం ఎందుకు ప్రత్యేకం?

ఈ ఏడాది నవరాత్రులు అక్టోబర్ 20న విజయదశమితో ముగుస్తాయి. ఆ రోజు మంగళవారం కావడంతో అమ్మవారి తిరుగు ప్రయాణ వాహనాన్ని చరణాయుధంగా పేర్కొంటారు. చరణాయుధాన్ని సంప్రదాయంగా కోడితో అనుసంధానిస్తారు. అమ్మవారి కోడి వాహన గమనం మాత్రం శుభప్రదంగా పరిగణించబడదు. ధార్మిక విశ్వాసాల ప్రకారం ఇది ప్రకృతి వైపరీత్యాలు, సంఘర్షణలు, అశాంతి, విషాద పరిస్థితులకు సంకేతంగా భావిస్తారు. అందుకే ఈ వాహనం గురించి నవరాత్రుల్లో ప్రత్యేకంగా చర్చ జరుగుతుంది.

అక్టోబర్ 11న ఘటస్థాపన

నవరాత్రుల మొదటి రోజైన అక్టోబర్ 11న ఘటస్థాపన లేదా కలశ స్థాపన నిర్వహిస్తారు. ఈ కార్యక్రమానికి కూడా ప్రత్యేక ముహూర్తం ఉంది. ఘటస్థాపన ముహూర్తం ఉదయం 6:19 నుంచి 10:12 గంటల వరకు అదేవిధంగా, అభిజిత్ ముహూర్తం ఉదయం 11:44 నుంచి మధ్యాహ్నం 12:31 గంటల వరకు ఉంటుంది. ఇక అక్టోబర్ 19న మహానవమి, అక్టోబర్ 20న విజయదశమి జరుపుకుంటారు. దీంతో తొమ్మిది రోజుల శారదీయ నవరాత్రి ఉత్సవాలకు ముగింపు పలుకుతుంది. మొత్తంగా చూసుకుంటే 2026 నవరాత్రుల్లో దుర్గాదేవి గజ వాహనంపై రావడం, చరణాయుధంగా భావించే కోడి వాహనంపై తిరిగి వెళ్లడం ఈ ఏడాది ప్రధాన ప్రత్యేకతగా నిలవనుంది. అమ్మవారి ఆరాధనతో పాటు ఈ వాహనాల వెనుక ఉన్న సంప్రదాయ విశ్వాసాలు కూడా భక్తుల్లో ఆసక్తిని కలిగిస్తున్నాయి.