Shiva Temple: ఆ దేవాలయంలో హరహర అంటే చాలు... మహాశివుడు ఇలా శబ్ధం చేస్తాడట

Shiva Temple: మనదేశంలో ఎన్నో పురాతన ఆలయాలు ఆధ్యాత్మిక అద్భుతాలకు నిలయాలుగా భాసిల్లుతున్నాయి. సాధారణ మానవ కంటికి కేవలం రాతి కట్టడాలుగా కనిపించే క్షేత్రాలు, భక్తితో చూసే భక్తులకు శతాబ్దాల నాటి అపూర్వ దివ్య రహస్యాలను ఆవిష్కరిస్తాయి. అటువంటి అరుదైన, ఆశ్చర్యకరమైన ఆధ్యాత్మిక రహస్యాలకు వేదికైంది ఆంధ్రప్రదేశ్‌లోని ఏలూరు జిల్లా, కలిదిండి గ్రామంలో వెలసిన శ్రీ పాతాళ భోగేశ్వర స్వామి దేవాలయం. ఈ దివ్య క్షేత్రంలో భక్తులను పరవశింపజేసే రెండు ప్రధాన ఆధ్యాత్మిక వింతలు కొలువుదీరి ఉన్నాయి.

నిరంతరం నీరు కారే విరిగిన శివలింగం

మట్టి పొరల నుంచి స్వయంభూవుగా ఉద్భవించిన పరమశివుడు కాబట్టి స్వామివారికి 'పాతాళ భోగేశ్వర స్వామి' అనే దివ్య నామం ఏర్పడింది. ఈ ఆలయంలోని శివలింగం అత్యంత విలక్షణమైనది. ఈ శివలింగానికి సంబంధించిన స్థలపురాణం అత్యంత విశిష్టమైనదిగా చెబుతారు. పూర్వం వేంగి రాజు రాజరాజ చోళుడి పరిపాలనా కాలంలో ఒక రైతు పొలాన్ని దున్నుతుండగా, నాగలి కర్ర మట్టిలోని ఒక రాయికి బలంగా తగిలింది. దానితో ఆ శిల రెండు ముక్కలుగా విరిగిపోయి, రక్తం కారడం ప్రారంభమైంది. ఆశ్చర్యపోయిన రైతు రాజుకు సమాచారం అందించగా, రాజాజ్ఞతో ఆ విరిగిన శివలింగాన్ని అతికించి అక్కడే ఆలయాన్ని నిర్మించారు. విశేషమేమిటంటే, ఆ శివలింగంపై అతికించినట్లు ఉండే గీత ఇప్పటికీ స్పష్టంగా కనిపిస్తుంది. అంతేకాదు, ఆ అతికించిన భాగం నుంచే నిరంతరం నీరు స్రవిస్తూ, శివలింగం చుట్టూ చెమ్మగా మారుతుండటం స్వామివారి ప్రత్యక్ష మహత్యానికి నిదర్శనం.

హర హర అంటే స్పందించే పంచబుగ్గల కోనేరు

ఈ ఆలయంలోని రెండవ గొప్ప వింత ఇక్కడి పుష్కరిణి. దీనిని పంచబుగ్గల కోనేరు అని పిలుస్తారు. భక్తులు పాతాళ భోగేశ్వర స్వామిని దర్శించుకున్న అనంతరం ఈ కోనేటి వద్దకు వచ్చి నిష్ఠతో హర హర అని భక్తితో స్మరిస్తే చాలు... వెంటనే నీటి అడుగు భాగం నుంచి బుడబుడమని శబ్దం చేస్తూ నీటి బుడగలు పైకి తేలుతాయి. పరమశివుడు భక్తుల నామస్మరణకు ఈ పంచబుగ్గల రూపంలో స్పందిస్తున్నాడని క్షేత్రవాసులు, భక్తులు విశ్వసిస్తారు. వేంగి చోళుల కాలం నుంచి నేటివరకు కలిదిండి గ్రామానికి రక్షా కవచంగా నిలుస్తున్న పాతాళ భోగేశ్వర స్వామిని దర్శిస్తే సకల పాపాలు తొలగి, మనశ్శాంతి లభిస్తుందని భక్తుల నమ్మకం.