Rudranath Temple: అదృష్టం ఉన్నవారికే దర్శనం... పాండవులకు ఇక్కడే మోక్షం

Rudranath Temple: భారత పురాణాల్లో అత్యంత పవిత్రమైన హిమాలయ క్షేత్రాల్లో రుద్రనాథ్ ఒకటి. పంచకేదారాల్లో నాల్గవదిగా వెలుగొందుతున్న ఈ పుణ్యక్షేత్రంలో పరమశివుని "నీలకంఠ ముఖ స్వరూపాన్ని" ఆరాధిస్తారు. కురుక్షేత్ర సంగ్రామం అనంతరం బంధువధ పాపం నుండి విముక్తి పొందేందుకు పాండవులు ఈ ఆలయాన్ని నిర్మించి, స్వామివారి అనుగ్రహంతో మోక్షాన్ని పొందినట్లు శైవ పురాణాలు చెబుతున్నాయి.

ఆలయ విశేషాలు ... భౌగోళిక ప్రాధాన్యత

ఉత్తరాఖండ్‌లోని చమోలీ జిల్లాలో సముద్ర మట్టానికి దాదాపు 3,600 మీటర్ల అంటే 11,800 అడుగుల ఎత్తులో దట్టమైన ఆల్పైన్ అడవుల నడుమ ఈ సహజసిద్ధ గుహాలయముంది. తీవ్రమైన మంచు ప్రభావ పరిస్థితుల వల్ల ఈ ఆలయం సంవత్సరానికి ఆరు నెలలు మాత్రమే తెరుచుకుంటుంది. వాతావరణం, క్లిష్టమైన బాట కారణంగా రోజుకు కేవలం 140 మందికి మాత్రమే దర్శనానికి అనుమతి లభిస్తుంది. ఆలయ గర్భగుడిలో ప్రధాన రుద్రనాథునితో పాటు పంచపాండవులు, కుంతీదేవి, ద్రౌపదితో పాటు స్థానిక అటవీ దేవతలైన 'జఖ్ దేవతల' విగ్రహాలు దర్శనమిస్తాయి.

పంచకేదారాల వైశిష్ట్యం

పురాణాల ప్రకారం పాండవుల నుండి తప్పించుకునేందుకు ఈశ్వరుడు వృషభ రూపాన్ని ధరించగా, ఆయన శరీర భాగాలు ఐదు వేర్వేరు ప్రదేశాల్లో ఆవిర్భవించాయి. కేదార్నాథ్‌లో పృష్టభాగం, మధ్యమహేశ్వర్‌లో నాభి భాగం, తుంగనాథ్‌లో బాహువులు, రుద్రనాథ్‌లో ముఖం, కల్పేశ్వర్‌లో జటాజూటం లింగాలుగా ఆవిర్భవించాయి. ఇక హిమాలయాల్లోని ఈ దుర్గమ మార్గంలో చేసే ప్రయాణానికి అచంచలమైన విశ్వాసం కావాలి. స్వామివారిపై పరిపూర్ణ భక్తి శ్రద్ధలు ఉన్నవారికే ఈ పుణ్యక్షేత్రాన్ని దర్శించుకునే దివ్య భాగ్యం దక్కుతుంది. భౌతిక బంధాలను వీడి అంతర్ముఖ సాధన చేసే భక్తులకు రుద్రనాథ్ దర్శనం సాక్షాత్తూ కైలాస ప్రాప్తిని ప్రసాదిస్తుందని నమ్మకం. చార్‌ధామ్‌ యాత్ర చేసేవారు ఈ పంచకేదారాల యాత్రలను కూడా చేపడుతుంటారు. అదృష్టం ఉన్నవారు, స్వామివారిని అత్యంత భక్తి శ్రద్ధలతో ఆరాధించేవారు, నిత్యం శివపంచాక్షరిని జపించే వారికి రుద్రనాథుడి దర్శనం లభిస్తుంది. ప్రతి హైందవుడు జీవితంలో ఒక్కసారైనా ఈ రుద్రనాథ్‌ని దర్శించుకోవాలని పెద్దలు చెబుతారు.