Sankashtahara Chaturthi: సంకష్టహర చతుర్థి రోజున వినాయకుడిని ఇలా పూజిస్తే.. ఎంతటి కష్టమైనా తొలిగిపోవాల్సిందే.!

Sankashtahara Chaturthi: జీవితం అన్నాక కష్టసుఖాలు సహజం. ఆర్థిక ఇబ్బందులు, అనారోగ్య సమస్యలు లేదా మానసిక వ్యధలు ఏదో ఒక రూపంలో మనల్ని బాధిస్తూనే ఉంటాయి. కొన్నిసార్లు ఈ సమస్యలు ఒక దరిదాపు లేకుండా, ఎంత ప్రయత్నించినా తీరని ఒక పెద్ద చిక్కుముడిలా మారిపోతాయి. డాక్టర్లు కూడా చేతులెత్తేసిన అనారోగ్యాలు, ఏ దారీ కనిపించని ఆర్థిక కష్టాలు మనల్ని ఉక్కిరిబిక్కిరి చేస్తాయి. ఇలా మానవ ప్రయత్నం దాటిపోయిన తీవ్రమైన కష్టాలను 'సంకష్టాలు' అంటారు. ఇలాంటి భయంకరమైన సంకష్టాల నుంచి మనల్ని గట్టెక్కించే అద్భుతమైన మార్గమే 'సంకష్టహర చతుర్థి' వ్రతం.

వినాయకుడు విఘ్నాలు తొలగించేవాడు, విజయాలను ప్రసాదించేవాడు. ఆ స్వామిని ఈ చతుర్థి రోజున భక్తి శ్రద్ధలతో పూజిస్తే, ఆయన అనుగ్రహంతో ఎంతటి పెద్ద కష్టమైనా ఇట్టే తొలగిపోతుందని శాస్త్రాలు చెబుతున్నాయి. ఈ వ్రతం ముఖ్య ఉద్దేశ్యం కష్టాలు పోగొట్టి, మన ఇష్టాలను నెరవేర్చడమే. వినాయకుడి వాహనమైన ఎలుకకు 'అనింద్యుడు' అనే పేరు ఉందని కథల్లో ఉంది. అంటే నిందించదగనివాడు, ఎంతో మంచివాడు అని అర్థం.

మన శరీరం ఒక వాహనం లాంటిది. అందులో ప్రయాణించే ప్రాణశక్తి దైవంతో సమానం. మనం ఎప్పుడైతే చెడు పనులకు దూరంగా ఉండి, పవిత్రంగా, నిందలు లేని జీవితం గడుపుతామో, అప్పుడు సాక్షాత్తూ ఆ పరమాత్మే మన శరీరంలో కొలువై ఉంటాడని ఆ ఎలుక వాహనం మనకు ఒక గొప్ప సందేశం ఇస్తోంది. భగవంతుడి కోసం మనం ఎక్కడికో వెళ్లక్కర్లేదు, మన మంచి పనులే ఆయనను మన దగ్గరికి రప్పిస్తాయి. ఎంత టెక్నాలజీ పెరిగినా మన సంప్రదాయాల్లో ఉండే ఆంతర్యం, సైన్స్ మనసుకు ఒక ప్రశాంతతను ఇస్తాయి. కాబట్టి ఎవరైతే తీవ్రమైన కష్టాలతో సతమతమవుతున్నారో, వాళ్ళు ప్రతి నెలా వచ్చే ఈ సంకష్టహర చతుర్థి రోజున ఆ గణనాథుడిని పూజించి చూడండి.