Sri Krishna Leela : శ్రీకృష్ణ లీలలుః ఈ ఒక్క విషయం తెలిస్తే...ఆయన్ను అస్సలు వదలం

Sri Krishna Leela : శ్రీకృష్ణుడి లీలల్లో ప్రతి చిన్న సంఘటన వెనుక ఒక పెద్ద ఆధ్యాత్మిక సందేశం దాగి ఉంటుంది. ఆయన చేసే పనులు మొదట చూస్తే చిలిపితనంగా అనిపించినా.. కాస్త లోతుగా ఆలోచిస్తే జీవితానికి సంబంధించిన గొప్ప సత్యం కనిపిస్తుంది. అలాంటి కృష్ణలీలల్లో ఒకటి గోకులంలో జరిగిన ఈ చిన్న సంఘటన. ఇందులో కృష్ణుడు చెప్పిన ఒక్క మాట మనిషి జీవితంలోని పెద్ద భారాన్ని ఎలా దించుకోవాలో చెబుతుంది.

బావి దగ్గర గోపికకు ఎదురైన అనుభవం

ఒకరోజు గోకులంలో ఓ గోపిక బావి దగ్గరకు వెళ్లి నీళ్లు తోడుతోంది. కుండను నీటితో నింపి, దాన్ని తలపై పెట్టుకుని ఇంటికి తీసుకెళ్లాలి. కానీ కుండ నిండిన తర్వాత దాన్ని ఎత్తి నెత్తిన పెట్టడం అంత సులభం కాదు. ఎవరైనా వచ్చి తనకు సహాయం చేస్తే బాగుంటుందని ఆమె మనసులో అనుకుంటుంది. అదే సమయంలో అటువైపు శ్రీకృష్ణుడు కనిపిస్తాడు. కృష్ణుడిని చూడగానే ఆమెకు ఆశ కలుగుతుంది. “కృష్ణా.. ఒక్కసారి ఇటు వచ్చి ఈ కుండను నా నెత్తిన పెట్టవా?” అని ప్రేమగా అడుగుతుంది. కానీ కన్నయ్య మాత్రం ఆమె మాటను పట్టించుకోనట్టుగా అక్కడి నుంచి వెళ్లిపోతాడు. గోపికకు కాస్త ఆశ్చర్యంగా అనిపిస్తుంది. ఎప్పుడూ గోపికలతో సరదాగా ఉండే కృష్ణుడు తనను ఎందుకు పట్టించుకోలేదని అనుకుంటుంది. చివరకు మరో మార్గం లేకపోవడంతో తానే కుండను ఎత్తుకుని తలపై పెట్టుకుని ఇంటివైపు బయలుదేరుతుంది.

ఇంటి దగ్గర ఎదురుచూపు

ఆమె ఇంటికి చేరుకునే సమయానికి మరో ఆశ్చర్యం ఎదురవుతుంది. ఇంటి దగ్గర శ్రీకృష్ణుడు ఆమె కోసం ఎదురుచూస్తూ ఉంటాడు. గోపికను చూడగానే చిరునవ్వుతో.. “రా.. కుండను దించుతాను” అంటాడు. అప్పుడు గోపికకు కోపం వస్తుంది. “కుండను నెత్తిన పెట్టమని అడిగినప్పుడు రాలేదు. ఇప్పుడు ఇంటికి వచ్చాక దించుతానంటావేంటి?” అని ప్రశ్నిస్తుంది. కృష్ణుడు మాత్రం ఎంతో ప్రశాంతంగా ఆమెకు సమాధానం ఇస్తాడు. “నేను భారం ఎక్కించేవాడిని కాదు.. భారం దించేవాడిని.” కన్నయ్య చెప్పిన ఈ మాటే ఈ చిన్న లీలలోని అసలు సందేశం.

కృష్ణుడు భారం ఎక్కించడు.. దించుతాడు

మనిషి జీవితంలో ఎన్నో రకాల బరువులు ఉంటాయి. డబ్బు గురించి ఆందోళన, కుటుంబ సమస్యలు, ఉద్యోగ ఒత్తిడి, ఆరోగ్యం గురించి భయం, భవిష్యత్తుపై ఆలోచనలు.. ఇలా ప్రతి ఒక్కరి మనసులో కనిపించని ఒక కుండ ఉంటుంది. ఆ కుండను మనమే నింపుకుంటాం. సమస్యలు వస్తే వాటిని మనసులోనే దాచుకుంటాం. బాధలను ఎవరితోనూ చెప్పుకోకుండా మోస్తుంటాం. చివరకు ఆ భారం తట్టుకోలేనంతగా మారుతుంది. ఇక్కడే కృష్ణుడి లీల మనకు ఒక విషయం గుర్తు చేస్తుంది. మన భారం మనం కృష్ణుడి ముందు ఉంచితే.. దాన్ని మోసేది ఆయనే. అందుకే భక్తుడు కృష్ణుడిని కేవలం కోరికలు తీర్చే దేవుడిగా చూడడు. తన బాధను వినే వాడిగా, తన కష్టాన్ని అర్థం చేసుకునే వాడిగా, చివరికి మనసులోని భారాన్ని దించే వాడిగా చూస్తాడు. గోపిక కుండను ఇంటి వరకు తానే మోసుకెళ్లింది. కానీ ఇంటి దగ్గరికి వచ్చిన తర్వాత కృష్ణుడు దాన్ని దించాడు. ఇందులోని అంతరార్థం ఏమిటంటే.. మనిషి తన వంతు ప్రయత్నం చేయాలి. కానీ ప్రతి భారాన్ని జీవితాంతం తానే మోసుకెళ్లాల్సిన అవసరం లేదు. దైవంపై నమ్మకం పెట్టుకుని మనసులోని బాధను ఆయనకు అప్పగించినప్పుడు ఒక రకమైన ప్రశాంతత కలుగుతుంది. అందుకే కృష్ణుడి ఈ చిన్న లీలను అర్థం చేసుకున్న తర్వాత ఆయనను ఎందుకు వదలాలని అనిపించదు. ఎందుకంటే మనం ఎన్ని కష్టాలు చెప్పినా.. కన్నయ్య చివరికి చెప్పేది ఒక్కటే అన్న భావన కలుగుతుంది. నీ భారం నువ్వు ఒంటరిగా మోయాల్సిన అవసరం లేదు.. నాకు అప్పగించు. ఇదే ఈ కృష్ణలీలలో దాగి ఉన్న అసలైన ఆధ్యాత్మిక సందేశం.