Swami Vivekananda Life Lesson: ఈ విషయాల గురించే మనం బాధపడతాం... వివేకానందుకు చెప్పిన జీవిత సత్యం

Swami Vivekananda Life Lesson: మానవ జీవితంలో అనుక్షణం ఆందోళన చెందడానికి, మనశ్శాంతిని కోల్పోవడానికి ప్రధాన కారణం ఎదుటివారు అనే నిందలు, అవమానాలే. అయితే, ఇతరుల వ్యర్థ మాటలు మన మనస్సును తాకకుండా ఎలా నిగ్రహించుకోవాలో యుగపురుషుడు స్వామి వివేకానందుడు ఒక చిన్న దివ్య సంఘటన ద్వారా అత్యంత సులభంగా బోధించారు.

కోల్‌కతా వీధుల్లో భిక్షాటన దివ్య లీల

సన్యాస ఆశ్రమాన్ని స్వీకరించిన ప్రతి సాధకుడూ తన అహంకారాన్ని నిర్మూలించుకోవడానికి భిక్షాటన చేయడం ప్రాథమిక నియమం. ఒకనాడు స్వామి వివేకానందుడు తన నలుగురు శిష్యులతో కలసి కోల్‌కతా నగర వీధుల్లో భిక్షాటనకు బయలుదేరారు. ఇళ్ల ముందుకు వెళ్లి గంట మోగిస్తూ "భవతీ భిక్షాందేహి" అని అర్ధించేవారు. కొందరు గృహస్థులు భక్తితో బియ్యం వేస్తే, మరికొందరు అరటిపండ్లను దానంగా ఇచ్చారు. కానీ, కొందరు అహంకార పూరితులు సన్యాసులను నోటికొచ్చినట్లు దూషిస్తూ శాపనార్థాలు పెట్టారు. స్వామి వివేకానందుడు చిరునవ్వుతో ఆ తిట్లను దాటుకుంటూ, లభించిన అరటిపండ్లను దారిలోని గోవులకు తినిపించి, బియ్యంతో ఆశ్రమానికి తిరిగొచ్చారు.

శిష్యుడి అంతర్మథనం ... వివేకానందుడి దివ్య బోధ

మఠానికి చేరుకున్నాక ఒక శిష్యుడు తీవ్రమైన నిరాశతో, దుఃఖంతో కూర్చుని ఉండటం వివేకానందుడు గమనించారు. "ఏమైంది నాయనా? ఎందుకు అంతగా బాధపడుతున్నావు?" అని ఆప్యాయంగా అడిగారు. దానికి ఆ శిష్యుడు "గురుదేవా! ఈ రోజు భిక్షాటనకు వెళ్లినప్పుడు కొందరు గృహస్థులు మనలను ఎంతో దారుణంగా నిందించారు. ఆ అవమానకరమైన మాటలు నా మనస్సును తొలిచేస్తున్నాయి" అని వాపోయాడు.

దానికి వివేకానందుడు శిష్యుడి తలపై అభయహస్తం ఉంచి.. "మన భిక్షా పాత్రలో ఈరోజు ఏమేమి తెచ్చాం?" అని ప్రశ్నించారు. "కొద్దిగా బియ్యం మాత్రమే వచ్చాయి గురుదేవా" అన్నాడు శిష్యుడు. దానికి వివేకానందుడు చిరుమందహాసం చేస్తూ "ఆ గృహస్థులు నిన్ను తిట్టిన తిట్లు నీ భిక్షా పాత్రలో ఉన్నాయా? మనం మఠానికి తీసుకువచ్చిన మూటలో అవి లేనప్పుడు, అసలు ఇక్కడికి రాని ఆ పాడు మాటలను నీ మనస్సులోకి ఎలా తెచ్చుకున్నావు? తెచ్చుకోని దాని గురించి అకారణంగా శ్రమపడి ఎందుకు బాధపడుతున్నావు?" అని వివరించారు.

మన జీవితానికి అనువర్తనం

ఈనాటి సమాజంలో మన పరిస్థితి కూడా ఆ శిష్యుడిలాగే ఉంది. మనకు లభించిన అనంతమైన దైవ అనుగ్రహాన్ని, కుటుంబ సౌఖ్యాన్ని, నిత్య సంతోషాలను పక్కనబెట్టి... ఎవరో ఎప్పుడో అన్న పనికిరాని మాటలను, విమర్శలను మనస్సులో భద్రపరుచుకుని మనశ్శాంతిని పాడుచేసుకుంటున్నాం. నిందలు అనే వ్యర్థ పదార్థాలను బయటే వదిలేసి, సత్ఫలితాలను మాత్రమే స్వీకరించిన రోజున మానవ జీవితం ఆనందమయమవుతుందని వివేకానందుడి ఈ జీవిత సత్యం మనకు స్పష్టం చేస్తోంది.