Puri Rath Yatra: ఎన్ని కష్టాలు ఎదరైనా...పూరీలో ఒక్కసారి ఇలా చేయండి చాలు...మీకన్నా అదృష్టవంతులు ఉండరు

Puri Rath Yatra: పూరీ జగన్నాథుని రథయాత్ర అనగానే కోట్లాది మంది భక్తుల గుండెల్లో ఒక అలౌకిక భక్తిభావం ఉప్పొంగుతుంది. ఆషాఢ మాసంలో జరిగే ఈ మహోత్సవంలో పాల్గొనడం, ఆ జగన్నాథుడి రథాన్ని కళ్లారా చూడటం ఒక ఎత్తైతే, ఆ రథాన్ని లాగే తాళ్లను ఒక్కసారి తాకడం జీవితాన్నే మార్చేసే పరమ పవిత్రమైన ఘట్టం. ఎన్ని కష్టాలు ఎదురైనా, పూరీ క్షేత్రానికి వెళ్ళినప్పుడు ఆ రథం తాడును ఒక్కసారి స్పృశిస్తే చాలు... మీకన్నా అదృష్టవంతులు ఎవరూ ఉండరు. ఎందుకంటే, ఆ తాడును తాకడం అంటే ఆ పరమాత్ముని హస్తాన్ని పట్టుకోవడమే!

మూడు రథాలు ... మూడు దివ్యమైన తాళ్లు

ఈ రథయాత్రలో మూడు ప్రధాన రథాలు ఉంటాయి. ప్రతి రథానికి రెండు చొప్పున మొత్తం ఆరు పొడవైన, ధృడమైన తాళ్లను కడతారు. అయితే, మనకు కేవలం తాళ్లుగా కనిపించే ఆ బంధాలకు వెనుక ఒక అద్భుతమైన ఆధ్యాత్మిక రహస్యం, విశిష్టమైన పేర్లు ఉన్నాయి. జగన్నాథుడు కొలువయ్యే రథం పేరు నందిఘోష. ఈ రథానికి కట్టే తాడును శంఖచూడుడు అని పిలుస్తారు. ఇక బలరాముడి రథం పేరు తలధ్వజ. దీనికి కట్టే తాడును వనూలి అని పిలుస్తారు. ఇక సుభద్రాదేవి రథం పేరు దర్పదలన కాగా, ఈ రథానికి కట్టే తాడును స్వర్ణచూడ అని పిలుస్తారు.

తాడును తాకితేనే యాత్ర సంపూర్ణం!

సాధారణంగా దేవుడి గర్భగుడిలోకి అందరికీ ప్రవేశం ఉండదు. కానీ, ఈ రథయాత్ర విశిష్టత ఏమిటంటే, కులమత భేదాలు లేకుండా ప్రతి ఒక్క భక్తుడికీ ఆ స్వామిని సేవించుకునే భాగ్యం దక్కుతుంది. ఈ యాత్రలో రథం తాడును తాకి లాగడం వల్ల మరుజన్మ అంటూ లేకుండా, జనన మరణ చక్రం నుండి విముక్తి లభిస్తుందని పురాణాలు చెబుతున్నాయి. పూరీ జగన్నాథ రథయాత్రకు వెళ్లి, ఆ స్వామి రథం తాడును కనీసం ఒక్కసారైనా తాకకుండా తిరిగి వస్తే... ఆ యాత్ర సంపూర్ణం కానట్లేనని భక్తుల నమ్మకం. జీవితంలో ఎన్ని కష్టాలు, బాధలు ఉన్నా... వాటన్నింటినీ తుడిచిపెట్టే శక్తి ఆ ‘రథ తాడు’ స్పర్శకు ఉంది. ఈ ఏడాది మీరు కూడా పూరీ యాత్రకు సిద్ధమై, ఆ దివ్య తాళ్లను తాకి, జగన్నాథుని పరిపూర్ణ కృపకు పాత్రులు అవ్వండి.