Temples: పూర్వపు ఆలయాలకు ఇప్పటి ఆలయాలకు ఇదే తేడా...అందుకే అక్కడ నవగ్రహాల ఏర్పాటు

Temples: హిందూ ఆధ్యాత్మిక సాంప్రదాయంలో ఆలయ దర్శనానికి ఒక విశిష్టమైన అంతరార్థం ఉంది. శివాలయాలు, ఇతర శైవ, శక్తి క్షేత్రాలకు వెళ్లినప్పుడు మనకు తప్పక నవగ్రహ మండపాలు దర్శనమిస్తాయి. కానీ, వైష్ణవ ఆలయాలకు వెళితే మాత్రం అక్కడ నవగ్రహాలు కనిపించవు. అసలు విష్ణు ఆలయాల్లో నవగ్రహ ప్రతిష్ఠ ఎందుకు ఉండదు? నవగ్రహ ప్రదక్షిణల తర్వాత కాళ్లు కడుక్కోవాలా? అనే విషయాలపై ఆధ్యాత్మికవేత్తలు ఏం చెబుతున్నారో తెలుసుకుందాం.

విష్ణు ఆలయాల్లో నవగ్రహాలు ఎందుకు ఉండవు?

శ్రీమద్భగవద్గీతలో శ్రీకృష్ణ పరమాత్మ స్వయంగా "నేను గ్రహములలో ఆదిత్యుడను" అని స్పష్టం చేశారు. విష్ణుమూర్తి సాక్షాత్తు నవగ్రహ స్వరూపుడే! శ్రీమహావిష్ణువు కొలువైన దివ్య క్షేత్రంలో స్వామివారిని దర్శిస్తే నవగ్రహాలను ఆరాధించిన ఫలితం లభిస్తుంది. అందుకే ప్రాచీన వైష్ణవ ఆలయాల్లో ప్రత్యేకంగా నవగ్రహ మండపాలను ఏర్పాటు చేసే ఆచారం లేదు. ఈ ఆచారం అనాదికాలం నుండి వస్తున్నది.

పూర్వపు ఆలయాలకు.. ఇప్పటి ఆలయాలకు వ్యత్యాసం

ప్రాచీన కాలంలో ఆలయ వ్యవస్థ అత్యంత నియమబద్ధంగా ఉండేది. విష్ణు ఆలయం అంటే కేవలం స్వామివారి విగ్రహం మాత్రమే ఉండేది. శైవ లేదా ఇతర ఆలయాల్లోనే నవగ్రహ మండపాలు ఉండేవి. కానీ కాలక్రమేణా ఆధునిక సమాజంలో భక్తుల సౌకర్యార్థం ఒకే ప్రాంగణంలో ప్రధాన దైవంతో పాటు సకల ఉప ఆలయాలు, నవగ్రహ మండపాలను ప్రతిష్ఠించే సంస్కృతి పెరిగింది. మానవుడిలో సడలిపోతున్న మానసిక నిగ్రహాన్ని తిరిగి పెంచడానికే ఈ నవగ్రహ ఆరాధన ఉపయోగపడుతుంది.

నవగ్రహ ప్రదక్షిణల తర్వాత కాళ్లు కడుక్కోవాలా?

చాలామంది భక్తులలో నవగ్రహాల చుట్టూ ప్రదక్షిణలు చేసిన వెంటనే కాళ్లు కడుక్కోవాలా వద్దా అనే సందేహం ఉంటుంది. ధర్మశాస్త్రాల ప్రకారం నవగ్రహ దర్శనం చేసిన ప్రతిసారీ కాళ్లు కడుక్కోవాలనే కఠిన నియమమేదీ లేదు. శనిదేవుడికి ప్రత్యేక పూజలు లేదా తైలాభిషేకాలు చేసినప్పుడు, లేదా అర్చకులు ప్రత్యేక నవగ్రహ శాంతి హోమాలు చేయించినప్పుడు మాత్రమే కాళ్లు కడుక్కోవాలి. దీనిని ఆధునిక శాస్త్రీయ కోణంలో చూసుకుంటే....నవగ్రహ మండపంలో తైలాభిషేకాలు జరగడం వల్ల నేల జిడ్డుగా మారుతుంది. ఆ జిడ్డు కాళ్లతో ప్రధాన ఆలయంలో ప్రదక్షిణలు చేస్తే జారిపడే ప్రమాదం ఉంది కాబట్టి, శుభ్రత, భద్రత కోసం కాళ్లు కడుక్కోవడం మంచిదని వేద పండితులు సూచిస్తున్నారు. నవగ్రహాల ఆరాధన అంటే చాలా మంది భయపడుతుంటారు. కానీ, నవగ్రహాల చుట్టూ ప్రదక్షిణ చేయడం వలన మనలోని వికారాలు తొలగిపోయి అసలైన ఆత్మజ్ఞానం కలుగుతుందని పండితులు చెబుతున్నారు.