Why Lord Kedarnath Moves to Ukhimath: శీతాకాలంలో కేదారేశ్వరుడు ఊఖీమఠ్‌ ఎందుకు వెళ్తాడు...రహస్యం ఇదే

Why Lord Kedarnath Moves to Ukhimath: హిమాలయ పర్వతాల్లో కొలువైన కేదారనాథ్ క్షేత్రం పేరు వినగానే భక్తులకు పరమశివుడు గుర్తుకొస్తాడు. సముద్ర మట్టానికి సుమారు 3,583 మీటర్ల ఎత్తులో ఉండే ఈ పవిత్ర ఆలయం దర్శనం ప్రతి శివభక్తుడి జీవితంలో ఒక ప్రత్యేకమైన అనుభూతి. అయితే ఇక్కడ ఒక ఆసక్తికరమైన సంప్రదాయం ఉంది. ప్రతి సంవత్సరం శీతాకాలం ప్రారంభం కాగానే కేదారనాథ్ ఆలయ తలుపులు మూసివేస్తారు. ఆ సమయంలో కేదారేశ్వరుడు మాత్రం భక్తులకు దూరం కాడు. స్వామివారి ఉత్సవమూర్తిని ప్రత్యేక పల్లకిలో ఊఖీమఠ్‌లోని ఓంకారేశ్వర్ ఆలయానికి తీసుకెళ్తారు. అక్కడే దాదాపు ఆరు నెలల పాటు నిత్యపూజలు, అభిషేకాలు, ఇతర వైదిక కార్యక్రమాలు కొనసాగుతాయి. అసలు మంచుతో కప్పబడే కేదార్‌నాథ్‌ను వదిలి స్వామివారు ఊఖీమఠ్‌కు ఎందుకు వస్తారు? ఈ సంప్రదాయం వెనుక ఉన్న ఆధ్యాత్మిక విశేషాలు ఏమిటో తెలుసుకుందాం.

కేదారేశ్వరుడి శీతాకాల విడిది ఎక్కడ?

ఉత్తరాఖండ్‌లోని రుద్రప్రయాగ్ జిల్లాలో ఉన్న ఊఖీమఠ్‌కు కేదారనాథుడి శీతాకాల పూజా కేంద్రంగా ప్రత్యేక గుర్తింపు ఉంది. కేదార్‌నాథ్ ఆలయంలో శీతాకాలం కారణంగా దర్శనాలు నిలిపివేసిన తర్వాత స్వామివారి పంచముఖి ఉత్సవమూర్తిని పూలతో అలంకరించిన ప్రత్యేక డోలీ (పల్లకి)లో ఊరేగింపుగా తీసుకువస్తారు. 2026 నవంబర్ 11న ఈ యాత్ర రాంపూర్‌లో ఆగనుండగా, నవంబర్ 12న గుప్తకాశీలోని విశ్వనాథ ఆలయానికి చేరుకుంటుంది. అక్కడి నుంచి నవంబర్ 13న ఊఖీమఠ్‌లోని ఓంకారేశ్వర్ ఆలయానికి చేరుకుంటుంది. అనంతరం అక్కడే భక్తులకు కేదారేశ్వరుడి శీతాకాల దర్శనం లభిస్తుంది.

కేదారనాథ్ ఆలయాన్ని ఎందుకు మూసివేస్తారు?

కేదార్‌నాథ్ ఆలయం సముద్ర మట్టానికి 3,583 మీటర్ల ఎత్తులో హిమాలయ పర్వత ప్రాంతంలో ఉంటుంది. నవంబర్ నుంచి ఏప్రిల్ వరకు ఇక్కడ తీవ్రమైన చలి, భారీ మంచు కురిసే పరిస్థితులు ఉంటాయి. కొన్నిసార్లు ఆలయం చుట్టుపక్కల ప్రాంతమంతా మంచుతో కప్పుకుపోతుంది. రహదారులు, నడక మార్గాలు ప్రయాణానికి అనుకూలంగా ఉండవు. ఇలాంటి పరిస్థితుల్లో భక్తులు, పూజారులు ఆలయానికి చేరుకోవడం కష్టమవుతుంది. అందుకే శీతాకాలం ప్రారంభానికి ముందే ఆలయ ద్వారాలను సంప్రదాయబద్ధంగా మూసివేస్తారు. అయితే స్వామివారి పూజలు నిలిచిపోకుండా ఉండేందుకు ఉత్సవమూర్తిని ఊఖీమఠ్‌కు తరలించే ఏర్పాటు చేశారు. ప్రకృతి పరిస్థితులకు అనుగుణంగా ఏర్పడిన ఈ సంప్రదాయం శతాబ్దాలుగా కొనసాగుతోంది.

ఊఖీమఠ్‌లోనూ అదే వైభవంతో పూజలు

ఊఖీమఠ్‌లోని ఓంకారేశ్వర్ ఆలయం కేవలం శీతాకాల విడిది మాత్రమే కాదు. కేదారనాథుడి ఆరాధనకు సంబంధించిన ముఖ్యమైన ఆధ్యాత్మిక కేంద్రం. ఇక్కడ ప్రతిరోజూ నియమానుసారం పూజలు, అభిషేకాలు, హారతులు నిర్వహిస్తారు. కేదార్‌నాథ్‌కు వెళ్లలేని భక్తులు ఈ సమయంలో ఊఖీమఠ్‌కు చేరుకుని స్వామివారిని దర్శించుకోవచ్చు. ఇక్కడ గమనించాల్సిన మరో విషయం ఏమిటంటే.. కేదారనాథుడి శీతాకాల పూజా సంప్రదాయంలో ఉఖీమఠ్‌కు ఎంతో ప్రాధాన్యత ఉన్నప్పటికీ, ఇది కేవలం ఒక ప్రాంత మార్పు మాత్రమే కాదు. ప్రధాన ఆలయంలో జరిగే ఆరాధనకు విరామం వచ్చినా, భక్తులకు దర్శనం, పూజలు నిరంతరంగా అందుబాటులో ఉండేలా రూపొందించిన ఆధ్యాత్మిక వ్యవస్థ.

2027లో మళ్లీ ఎప్పుడు తెరుచుకుంటుంది?

సాధారణంగా అక్షయ తృతీయ సందర్భంగా కేదార్‌నాథ్ ఆలయ ద్వారాలను తిరిగి తెరుస్తారు. 2027లో కూడా అక్షయ తృతీయ సమయంలో ఆలయం పునఃప్రారంభమయ్యే అవకాశం ఉంది. అయితే ఖచ్చితమైన తేదీని సంప్రదాయ పంచాంగం, ఆలయ కమిటీ నిర్ణయం ప్రకారం అధికారికంగా ప్రకటిస్తారు. అప్పటివరకు భక్తులు ఊఖీమఠ్‌లోని ఓంకారేశ్వర్ ఆలయంలో కేదారేశ్వరుడిని దర్శించుకోవచ్చు.