బీసీసీఐ చీఫ్ సెలెక్టర్ పదవికి వీడ్కోలు.. అజిత్ అగార్కర్ వివాదాస్పద నిర్ణయాలు ఇవే..!

Ajit Agarkar: జూలై 4, 2023 తేదీన పురుషుల సెలక్షన్ కమిటీ ఛైర్మన్‌గా బాధ్యతలు చేపట్టిన అజిత్ అగార్కర్ (Ajit Agarkar) పదవీకాలం ముగింపు దశకు చేరింది. ఆయన హయాంలో భారత క్రికెట్ జట్టు (Team India) 2024 టీ20 ప్రపంచకప్ (T20 World Cup), 2025 ఛాంపియన్స్ ట్రోఫీ (Champions Trophy) విజయాలను సొంతం చేసుకుంది. అయితే ఈ కాలంలో జట్టు ఎంపిక విషయంలో తీసుకున్న కొన్ని కీలక నిర్ణయాలు తీవ్రమైన విమర్శలకు కేంద్రబిందువుగా మారాయి. ప్రస్తుత టర్మ్ ముగిసిన తరువాత కొనసాగేది లేదని ఆయన బీసీసీఐకి (BCCI) స్పష్టం చేసినట్లు తెలుస్తోంది. కొత్త చీఫ్ సెలెక్టర్ ఎంపికపై బోర్డు త్వరలోనే నిర్ణయం తీసుకోనుంది.

అక్టోబర్ 2025లో సీనియర్ ఆటగాళ్లు రోహిత్ శర్మ (Rohit Sharma), విరాట్ కోహ్లీల (Virat Kohli) భవిష్యత్తు గురించి అగార్కర్ చేసిన వ్యాఖ్యలు పెను దుమారం రేపాయి. 2027 ప్రపంచకప్ టోర్నీపై ఆ ఇద్దరు ఆటగాళ్లు ఇంకా స్పష్టమైన హామీ ఇవ్వలేదని, సమయం వచ్చినప్పుడు నిర్ణయం తీసుకుంటామని ఆయన పేర్కొన్నారు. దీనిపై అభిమానుల్లో పెద్ద ఎత్తున చర్చ నడిచింది. అలాగే వన్డే భవిష్యత్తు ప్రణాళికల విషయంలోనూ రకరకాల వార్తలు వెలువడ్డాయి. ఇటీవల వెస్టిండీస్ పర్యటనకు ఎంపిక చేసిన వన్డే జట్టులో రోహిత్, కోహ్లీలకు చోటు దక్కడం గమనార్హం.

మరోవైపు జూన్ 2026లో అనూహ్య నిర్ణయాలు వెలువడ్డాయి. టీ20 ప్రపంచకప్ టైటిల్ సాధించిపెట్టిన సూర్యకుమార్ యాదవ్ (Suryakumar Yadav) స్థానంలో శ్రేయాస్ అయ్యర్ (Shreyas Iyer) కొత్త టీ20 కెప్టెన్‌గా బాధ్యతలు చేపట్టడం క్రీడా ప్రపంచాన్ని ఆశ్చర్యపరిచింది. జట్టు ప్రయోజనాలను దృష్టిలో ఉంచుకునే ఈ మార్పు చేసినట్లు అగార్కర్ వివరణ ఇచ్చారు. ఇక స్టార్ పేసర్ మహమ్మద్ షమీ (Mohammed Shami) ఫిట్‌నెస్ వివాదం కూడా తీవ్ర చర్చనీయాంశమైంది. 2025 ఛాంపియన్స్ ట్రోఫీ తరువాత షమీ జట్టుకు దూరంగా ఉండగా, తన ఫిట్‌నెస్ నిరూపించుకున్నానని ఆ ఆటగాడు వాదించడం విశేషం. ఇదే రీతిలో సీనియర్ పేసర్ భువనేశ్వర్ కుమార్ (Bhuvneshwar Kumar) సుదీర్ఘకాలం పాటు జట్టుకు దూరమవడంపై కూడా అనేక ప్రశ్నలు వ్యక్తమయ్యాయి.