CSK Head Coach: హెడెన్ మాస్టర్ ప్లాన్.. చెన్నై కొత్త కోచ్‌గా భారత మాజీ వికెట్ కీపర్?

CSK Head Coach Dinesh Karthik: చెన్నై సూపర్ కింగ్స్ ప్రధాన కోచ్ బాధ్యతల నుంచి స్టీఫెన్ ఫ్లెమింగ్ తప్పుకోవడంతో కొత్త కోచ్ వేట వేగవంతమైంది. పలువురు విదేశీ దిగ్గజాల పేర్లు వినిపిస్తున్న తరుణంలో, ఆస్ట్రేలియా మాజీ ఓపెనర్ మాథ్యూ హెడెన్ సరికొత్త ప్రతిపాదనను తెరపైకి తెచ్చారు. తమిళనాడుకే చెందిన దినేష్ కార్తీక్ ఈ పదవికి అత్యంత సరైన ఎంపికని ఆయన అభిప్రాయపడ్డారు.

చెన్నైకి లోకల్ టచ్ కావాలన్న హెడెన్..

దాదాపు 18 ఏళ్ల పాటు ఎంఎస్ ధోనితో కలిసి చెన్నై సూపర్ కింగ్స్ విజయాల్లో ఫ్లెమింగ్ కీలక పాత్ర పోషించారని హెడెన్ గుర్తుచేశారు. ఆ స్థానాన్ని భర్తీ చేయాలంటే స్థానిక వాతావరణం, పరిస్థితులపై పూర్తి అవగాహన ఉన్న వ్యక్తి అవసరమని స్పష్టం చేశారు. ఇయాన్ మోర్గాన్, బ్రెండన్ మెకల్లమ్ వంటి అంతర్జాతీయ పేర్లు ప్రచారంలో ఉన్నప్పటికీ, చెన్నైకి చెందిన దినేష్ కార్తీక్ సరైన ఎంపికవుతారని తెలిపారు. కార్తీక్ కోచింగ్ అనుభవం, స్థానిక పరిస్థితుల పరిజ్ఞానం చెన్నై ఫ్రాంచైజీకి సరికొత్త దిశానిర్దేశం చేస్తాయని, అందుకే ఆయనకు మద్దతు ఇస్తున్నట్లు హెడెన్ వివరించారు.

ఐపీఎల్‌లో డీకే అద్భుతమైన కోచింగ్ ట్రాక్ రికార్డ్..

భారత్ తరఫున 180 మ్యాచ్‌లు ఆడిన కార్తీక్, అంతర్జాతీయ, దేశవాళీ స్థాయిలలో అపారమైన అనుభవాన్ని గడించారు. 2024 ఐపీఎల్ సీజన్ తర్వాత మైదానంలో ఆటకు వీడ్కోలు పలికిన ఆయన, రాయల్ ఛాలెంజర్స్ బెంగళూరు మెంటార్, బ్యాటింగ్ కోచ్‌గా బాధ్యతలు స్వీకరించారు. ఐపీఎల్‌లో కోచ్‌గా ఆయన రికార్డు విశేషంగా నిలిచింది. 31 మ్యాచులలో 22 విజయాలు సాధించి, కేవలం 9 ఓటములతో 2.444 విన్-లాస్ నిష్పత్తి నమోదు చేశారు. ఆయన మార్గదర్శకత్వంలో ఆర్సీబీ వరుసగా రెండేళ్లు ట్రోఫీ సాధించడం విశేషం.

గ్లోబల్ అనుభవం.. విభిన్న లీగ్‌లలో పాత్ర..

ఐపీఎల్‌తో పాటు అంతర్జాతీయ లీగ్‌లలోనూ ఆయన తన ముద్ర వేశారు. 'ది హండ్రెడ్' టోర్నీలో లండన్ స్పిరిట్ జట్టుకు మార్గదర్శకత్వం వహించిన కార్తీక్, ఇంగ్లండ్ లయన్స్ భారత పర్యటన సమయంలోనూ సలహాదారుగా పనిచేశారు.

కోచ్‌గా నిరూపితమైన ట్రాక్ రికార్డు, తమిళనాడు క్రికెట్‌తో ఉన్న అనుబంధం దినేష్ కార్తీక్‌ను చెన్నై జట్టుకు బలమైన అభ్యర్థిగా నిలబెడుతున్నాయి. ఫ్లెమింగ్ వదిలిన స్థానాన్ని భర్తీ చేయడానికి యాజమాన్యం లోకల్ బలాన్ని ఎంచుకుంటుందో లేదో చూడాలి.