England: ఇంగ్లండ్ క్రికెట్‌లో భారీ మార్పులు.. కొత్త కెప్టెన్, కొత్త కోచ్.. సీఎస్‌కే దిగ్గజంకు కీలక బాధ్యతలు!

England: ఇంగ్లండ్ టెస్టు క్రికెట్‌లో భారీ మార్పులు చోటుచేసుకున్నాయి. మాజీ కెప్టెన్ బెన్ స్టోక్స్ అంతర్జాతీయ క్రికెట్‌కు రిటైర్మెంట్ ప్రకటించడంతో పాటు హెడ్ కోచ్ బ్రెండన్ మెక్‌కల్లమ్ పదవి నుంచి తప్పుకోవడంతో.. ఇంగ్లండ్ అండ్ వేల్స్ క్రికెట్ బోర్డు (ఈసీబీ) కొత్త నాయకత్వాన్ని ప్రకటించింది. స్టార్ బ్యాటర్ జో రూట్‌ను మరోసారి టెస్టు జట్టు కెప్టెన్‌గా ఈసీబీ నియమించింది. ఇక న్యూజిలాండ్ మాజీ కెప్టెన్, చెన్నై సూపర్ కింగ్స్ (సీఎస్‌కే) సక్సెస్ ఫుల్ కోచ్ స్టీఫెన్ ఫ్లెమింగ్‌కు టెస్టు జట్టు హెడ్ కోచ్‌ బాధ్యతలు అప్పగించింది.

జో రూట్ 2017 నుంచి 2022 వరకు ఇంగ్లండ్ టెస్టు జట్టుకు కెప్టెన్‌గా వ్యవహరించాడు. ఇటీవల న్యూజిలాండ్‌తో జరిగిన టెస్టు సిరీస్‌లో ఓవల్ వేదికగా జరిగిన మ్యాచ్‌లో తాత్కాలిక కెప్టెన్‌గా బాధ్యతలు నిర్వహించాడు. ఇప్పుడు పూర్తిస్థాయి కెప్టెన్‌గా రెండోసారి పగ్గాలు చేపట్టనున్నాడు. ఈ సందర్భంగా రూట్ మాట్లాడుతూ.. 'మరోసారి ఇంగ్లండ్ టెస్టు జట్టుకు నాయకత్వం వహించే అవకాశం రావడం గౌరవంగా భావిస్తున్నాను. టెస్టు కెప్టెన్సీ ఎంతో సవాలుతో కూడుకున్నది. అదే సమయంలో ఎంతో సంతృప్తిని కూడా ఇస్తుంది. ఈ కొత్త తరం ఆటగాళ్లను ముందుకు నడిపించేందుకు ఆసక్తిగా ఎదురుచూస్తున్నాను' అని తెలిపాడు.

కొత్త హెడ్ కోచ్‌గా నియమితుడైన స్టీఫెన్ ఫ్లెమింగ్ ప్రపంచ క్రికెట్‌లో అత్యంత విజయవంతమైన కోచ్‌లలో ఒకరిగా గుర్తింపు పొందాడు. ఇండియన్ ప్రీమియర్ లీగ్‌లో చెన్నై సూపర్ కింగ్స్‌కు ఐదు టైటిళ్లు అందించిన ఫ్లెమింగ్.. తన వ్యూహాత్మక ఆలోచనలతో ప్రత్యేక గుర్తింపు పొందాడు. ఇంగ్లండ్ టెస్టు జట్టుకు విజయాలతో పాటు దీర్ఘకాలికంగా బలమైన జట్టుగా తీర్చిదిద్దడమే తన లక్ష్యమని ఫ్లెమింగ్ స్పష్టం చేశాడు. 'ప్రస్తుతం విజయాలు సాధించడం ఎంత ముఖ్యమో.. భవిష్యత్తు కోసం బలమైన జట్టును నిర్మించడం కూడా అంతే ముఖ్యం. జో రూట్ వంటి గొప్ప ఆటగాడితో కలిసి పనిచేసే అవకాశం రావడం ఆనందంగా ఉంది. అతడు ఇప్పటికే ఎన్నో ఘనతలు సాధించినా.. ఇంకా చాలా సాధించే సామర్థ్యం ఉంది. రూట్ కెప్టెన్‌గా మరింత విజయవంతం అయ్యేలా నా వంతు సహకారం అందిస్తాను' అని ఫ్లెమింగ్ పేర్కొన్నాడు.

స్టీఫెన్ ఫ్లెమింగ్ నియామకంపై ఇంగ్లండ్ పురుషుల క్రికెట్ మేనేజింగ్ డైరెక్టర్ రాబ్ కీ మాట్లాడుతూ.. 'ప్రపంచ క్రికెట్‌లో అత్యంత అద్భుత కోచ్‌లలో ఫ్లెమింగ్ ఒకరు. ప్రతిభావంతులైన ఈ జట్టును ప్రపంచ స్థాయి విజయవంతమైన జట్టుగా తీర్చిదిద్దేందుకు అతడే సరైన వ్యక్తి. అతడు ఇందుకు ఒప్పుకోవడం చాలా సంతోషం. అతడిపై మాకు పూర్తి నమ్మకం ఉంది' అని ప్రశంసించాడు. ఇక ఇంగ్లండ్ జట్టు ఆగస్టు 19 నుంచి పాకిస్థాన్‌తో మూడు టెస్టుల సిరీస్ ఆడనుంది. అయితే స్టీఫెన్ ఫ్లెమింగ్ ఈ ఏడాది చివర్లో బాధ్యతలు స్వీకరించనున్నాడు. అప్పటి వరకు మార్కస్ ట్రెస్కోతిక్ తాత్కాలిక హెడ్ కోచ్‌గా కొనసాగనున్నాడు. మరోవైపు బ్రెండన్ మెక్‌కల్లమ్ మాత్రం పరిమిత ఓవర్ల జట్ల హెడ్ కోచ్‌గా తన బాధ్యతలను కొనసాగిస్తాడు.