FIFA World Cup: అర్జెంటీనాను ముంచిన రెడ్ కార్డ్..ప్రపంచ ఛాంపియన్‌గా స్పెయిన్ సంచలనం

FIFA World Cup: స్పెయిన్ vs ఆర్జెంటినా ప్రపంచవ్యాప్తంగా కోట్ల మంది క్రీడాభిమానులు శ్వాస బిగబట్టి చూసిన ఫిఫా ప్రపంచకప్ 2026 క్లైమాక్స్ ఊహించని మలుపులతో ముగిసింది. డిఫెండింగ్ ఛాంపియన్ అర్జెంటీనా, యూరోపియన్ దిగ్గజం స్పెయిన్ జట్ల మధ్య జరిగిన ఈ హై-వోల్టేజ్ ఫైట్‌లో స్పెయిన్ 1-0 గోల్ తేడాతో చారిత్రాత్మక విజయం సాధించింది.

దాదాపు 16 ఏళ్ల సుదీర్ఘ నిరీక్షణ తర్వాత స్పానిష్ ఆర్మీ మళ్లీ ఫుట్‌బాల్ ప్రపంచాన్ని శాసిస్తూ విశ్వవిజేతగా అవతరించింది.మ్యాచ్ ఆరంభం నుంచే స్పెయిన్ ఆటగాళ్లు పూర్తి ఆధిపత్యాన్ని ప్రదర్శిస్తూ అర్జెంటీనాను గట్టి ఒత్తిడిలోకి నెట్టారు. నిర్ణీత 90 నిమిషాల ఆట ముగిసే సమయానికి ఇరు జట్లు ఒక్క గోల్ కూడా చేయకపోవడంతో మ్యాచ్ ఉత్కంఠ భరితంగా ఎక్స్‌ట్రా టైమ్‌కు దారితీసింది.

అయితే, మ్యాచ్ 106వ నిమిషంలో అసలైన ట్విస్ట్ ఎదురైంది. స్పెయిన్ స్టార్ ఫార్వర్డ్ ఫెర్రాన్ తోర్రెస్ మైండ్ బ్లోయింగ్ నైపుణ్యాన్ని ప్రదర్శించాడు. అర్జెంటీనా డిఫెన్స్ లైన్‌ను ఒంటరిగా చీల్చుకుంటూ వెళ్లి ఆయన కొట్టిన పవర్ ఫుల్ షాట్ నేరుగా గోల్ పోస్ట్‌లోకి దూసుకెళ్లింది. ఈ ఒక్క గోల్‌తో స్పెయిన్ క్యాంప్‌లో సంబరాలు అంబరాన్నంటగా, మ్యాచ్‌ను సమం చేసేందుకు అర్జెంటీనా చేసిన ప్రయత్నాలేవీ ఫలించలేదు.

ఈ మ్యాచ్‌లో అర్జెంటీనా జట్టుకు మొదటి నుంచి అదృష్టం కలిసిరాలేదు. మ్యాచ్ మధ్యలో ఆ జట్టు కీలక ఆటగాడు ఎంజో ఫెర్నాండెజ్ తీవ్రమైన ఫౌల్ చేయడంతో రెఫరీ అతనికి రెడ్ కార్డ్ చూపించి మైదానం నుంచి బయటకు పంపించేశారు. దీంతో అర్జెంటీనా కేవలం 10 మంది ఆటగాళ్లతోనే మ్యాచ్‌ను కొనసాగించాల్సి వచ్చింది. ఇదే స్పెయిన్‌కు వరంగా మారింది.

మైదానంలో స్పెయిన్ ఆటగాళ్లు ఏకంగా 20 సార్లు గోల్ పోస్ట్‌ను లక్ష్యంగా చేసుకుని దాడులు చేయగా, అర్జెంటీనా మాత్రం కేవలం 2 సార్లు మాత్రమే అలాంటి ప్రయత్నం చేయగలిగింది. అర్జెంటీనా గోల్‌కీపర్ మార్టినెజ్ అద్భుతమైన సేవ్‌లతో మొదటి 90 నిమిషాలు జట్టును కాపాడినప్పటికీ, ఎక్స్‌ట్రా టైమ్‌లో స్పెయిన్ ధాటికి లొంగక తప్పలేదు.

దిగ్గజ ఆటగాడు లియోనెల్ మెస్సీకి ఈ ఫైనల్ మ్యాచ్ తీవ్ర నిరాశను మిగిల్చింది. ఈ టోర్నమెంట్‌లో అంతకుముందు వరకు 8 గోల్స్ చేసి అద్భుత ఫామ్‌లో ఉన్న మెస్సీని, ఫైనల్లో మాత్రం స్పెయిన్ డిఫెండర్లు పూర్తిగా లాక్ చేసేశారు. మెస్సీ ప్రభావం చూపలేకపోవడంతో అర్జెంటీనా ప్రపంచకప్‌ను నిలబెట్టుకోలేకపోయింది.

దీంతో పాటు మెస్సీ గోల్డెన్ బూట్ రేస్ నుండి కూడా తప్పుకున్నాడు. మొత్తం టోర్నీలో 10 గోల్స్ సాధించిన ఫ్రాన్స్ సంచలనం కిలియన్ ఎంబాప్పే అత్యధిక గోల్స్ చేసిన వీరుడిగా నిలిచి గోల్డెన్ బూట్ అవార్డును ముద్దాడాడు. ఈ మ్యాచ్‌లో అర్జెంటీనా గెలిచి ఉంటే ప్రపంచ ఫుట్‌బాల్ చరిత్రలోనే ఒక అరుదైన మైలురాయిని అందుకునేది. ఇప్పటివరకు ఫుట్‌బాల్ చరిత్రలో కేవలం ఇటలీ , బ్రెజిల్ జట్లు మాత్రమే వరుసగా రెండుసార్లు ప్రపంచకప్ టైటిల్స్ గెలుచుకున్నాయి.

2022 ఫైనల్లో ఫ్రాన్స్‌ను ఓడించిన అర్జెంటీనా, ఈసారి స్పెయిన్ చేతిలో భంగపాటుకు గురవ్వడంతో ఇటలీ, బ్రెజిల్ సరసన నిలిచే ఆ సువర్ణ అవకాశాన్ని తృటిలో చేజార్చుకుంది. ఏది ఏమైనా, ఈ 2026 ఫైనల్ మ్యాచ్ ఫుట్‌బాల్ చరిత్రలో నిలిచిపోయే ఒక క్లాసిక్ పోరాటంగా మిగిలిపోయింది. డిఫెండింగ్ ఛాంపియన్లను ఓడించి సరికొత్త చరిత్ర సృష్టించిన స్పెయిన్ జట్టుకు ప్రపంచవ్యాప్తంగా ప్రశంసలు వ్యక్తమవుతున్నాయి.