IPL 2026 : గుజరాత్‌ను ఉతికేసి వరుసగా రెండోసారి ఐపీఎల్ కప్ కొట్టిన బెంగళూరు

IPL 2026 : క్రికెట్ అభిమానులు ఎప్పుడెప్పుడా అని ఎదురుచూసిన ఐపీఎల్ 2026 మహాసంగ్రామం ముగిసింది. అహ్మదాబాద్‌లోని నరేంద్ర మోదీ స్టేడియం వేదికగా జరిగిన హై-వోల్టేజ్ ఫైనల్ మ్యాచ్‌లో రాయల్ ఛాలెంజర్స్ బెంగళూరు (RCB) సంచలన విజయం సాధించింది. శుభ్‌మన్ గిల్ సారథ్యంలోని గుజరాత్ టైటాన్స్ (GT)ను 5 వికెట్ల తేడాతో దారుణంగా ఓడించి, వరుసగా రెండోసారి ఐపీఎల్ ట్రోఫీని ముద్దాడింది. రజత్ పాటిదార్ కెప్టెన్సీలో బెంగళూరు టీమ్ అటు బౌలింగ్, ఇటు బ్యాటింగ్‌లో అదరగొట్టి వన్-సైడెడ్ మ్యాచ్‌గా మార్చేసింది. గత ఏడాది (2025)లో తన తొలి టైటిల్ గెలుచుకున్న ఆర్సీబీ, ఈసారి కూడా కప్‌ను డిఫెండ్ చేసుకుని హిస్టరీ క్రియేట్ చేసింది.

టాస్ గెలిచిన బెంగళూరు

ఈ మ్యాచ్‌లో టాస్ గెలిచిన ఆర్సీబీ కెప్టెన్ రజత్ పాటిదార్ మొదట బౌలింగ్ ఎంచుకున్నాడు. కెప్టెన్ నమ్మకాన్ని బెంగళూరు బౌలర్లు వంద శాతం నిజం చేసి చూపించారు. గుజరాత్ ఇన్నింగ్స్ ఆరంభంలోనే ఆర్సీబీ పేసర్ జోష్ హేజిల్‌వుడ్ కోలుకోలేని దెబ్బ కొట్టాడు. గుజరాత్ కెప్టెన్, ఆ జట్టు మెయిన్ పిల్లర్ అయిన శుభ్‌మన్ గిల్‌ను కేవలం 10 పరుగులకే అవుట్ చేసి పంపించాడు. ఆ వెంటనే డేంజరస్ బ్యాటర్ సాయి సుదర్శన్ కూడా 12 రన్స్ చేసి పెవిలియన్ చేరాడు. దీంతో గుజరాత్ టైటాన్స్ పీకల్లోతు కష్టాల్లో పడిపోయింది.

క్రునాల్ పాండ్యా వైడ్ యార్కర్ మ్యాజిక్

ఒకవైపు వికెట్లు పడుతున్నా జోస్ బట్లర్ క్రీజులో నిలబడి ఇన్నింగ్స్‌ను చక్కదిద్దే ప్రయత్నం చేశాడు. అయితే ఆర్సీబీ ఆల్‌రౌండర్ క్రునాల్ పాండ్యా ఒక పర్ఫెక్ట్ వైడ్ యార్కర్‌తో బట్లర్‌ను అవుట్ చేసి గుజరాత్ ఆశలపై నీళ్లు చల్లాడు. ఈ స్మార్ట్ డెలివరీకి సాక్షాత్తూ క్రికెట్ గాడ్ సచిన్ టెండూల్కర్ సైతం ఫిదా అయిపోయి, సోషల్ మీడియాలో క్రునాల్‌ను మెచ్చుకోవడం విశేషం.

వాషింగ్టన్ సుందర్ ఒంటరి పోరాటం

టాప్ ఆర్డర్ మొత్తం కుప్పకూలిన వేళ, వాషింగ్టన్ సుందర్ లోయర్ ఆర్డర్‌లో వచ్చి గుజరాత్ జట్టును ఆదుకున్నాడు. ఆర్సీబీ బౌలర్లను ఎదుర్కొంటూ 37 బంతుల్లో కీలకమైన 50 పరుగులు చేసి నాటౌట్‌గా నిలిచాడు. సుందర్ హాఫ్ సెంచరీ పుణ్యమా అని గుజరాత్ టైటాన్స్ నిర్ణీత 20 ఓవర్లలో 8 వికెట్ల నష్టానికి 155 పరుగులు చేయగలిగింది. బెంగళూరు బౌలర్లలో అన్‌క్యాప్డ్ ప్లేయర్ రసిఖ్ సలాం దార్ కేవలం 27 రన్స్ ఇచ్చి 3 వికెట్లతో అదరగొట్టగా, భువనేశ్వర్ కుమార్, హేజిల్‌వుడ్‌లకు తలా 2 వికెట్లు దక్కాయి.

వెంకటేష్ అయ్యర్ మెరుపులు

156 పరుగుల టార్గెట్‌తో బరిలోకి దిగిన ఆర్సీబీకి ఓపెనర్లు వెంకటేష్ అయ్యర్, విరాట్ కోహ్లీ కలిసి ఊహించని రేంజ్‌లో విధ్వంసకర ఓపెనింగ్ ఇచ్చారు. వెంకటేష్ అయ్యర్ కేవలం 16 బంతుల్లోనే 4 ఫోర్లు, 2 సిక్సర్లతో 32 రన్స్ చేసి త్వరగానే అవుట్ అయ్యాడు. ఆ తర్వాత దేవదత్ పడిక్కల్ (1 రన్) నిరాశపరిచాడు. ఈ దశలో గుజరాత్ స్పిన్నర్ రషీద్ ఖాన్ ఒకే ఓవర్లో కెప్టెన్ రజత్ పాటిదార్, క్రునాల్ పాండ్యాలను అవుట్ చేసి మ్యాచ్‌ను మలుపు తిప్పే ప్రయత్నం చేశాడు.

క్రీజులో పాతుకుపోయిన కింగ్ కోహ్లీ

ఒకవైపు వికెట్లు పడుతున్నా కింగ్ విరాట్ కోహ్లీ మాత్రం పట్టు వదల్లేదు. గుజరాత్ బౌలర్లపై ఎదురుదాడి చేస్తూ క్లాస్ ఇన్నింగ్స్ ఆడాడు. మిడిలార్డర్‌లో అతనికి టోనీ హిట్టర్ టిమ్ డేవిడ్ మంచి సపోర్ట్ ఇచ్చాడు. డేవిడ్ 17 బంతుల్లో 24 రన్స్ చేసి గెలుపును సులువు చేయగా, విరాట్ కోహ్లీ 42 బంతుల్లో 9 ఫోర్లు, 3 సిక్సర్లతో 75 పరుగులు చేసి నాటౌట్‌గా నిలిచి ఒంటిచేత్తో బెంగళూరుకు విజయాన్ని అందించాడు.

సీఎస్‌కే, ముంబై ఇండియన్స్ సరసన ఆర్సీబీ

ఈ అద్భుత విజయంతో రాయల్ ఛాలెంజర్స్ బెంగళూరు ఒక అరుదైన రికార్డును సొంతం చేసుకుంది. ఐపీఎల్ చరిత్రలో తమ టైటిల్‌ను విజయవంతంగా డిఫెండ్ చేసుకున్న (బ్యాక్-టు-బ్యాక్ కప్పులు గెలిచిన) చెన్నై సూపర్ కింగ్స్ (CSK), ముంబై ఇండియన్స్ (MI) ల సరసన ఆర్సీబీ చేరింది. ఈ ఎలైట్ క్లబ్‌లో చేరిన మూడో జట్టుగా బెంగళూరు రికార్డు సృష్టించడంతో దేశవ్యాప్తంగా ఉన్న ఆర్సీబీ ఫ్యాన్స్ ‘ఈసాలా కప్ నమ్దే కాదు.. వచ్చే సాలా కప్ కూడా నమ్దే’ అంటూ పండగ చేసుకుంటున్నారు.