IPL 2026: మీకో దండం రా సామీ.. గుడ్డిగా నమ్మి చోటిస్తే.. ఫ్రాంచైజీలనే నట్టేట ముంచేసిన ఆ నలుగురు..!

IPL Flop Players: ఐపీఎల్ 2026 లీగ్ దశ ముగింపునకు రావడంతో ప్లేఆఫ్స్ రేసు రసవత్తరంగా మారింది. ఇప్పటికే బెంగళూరు, గుజరాత్, హైదరాబాద్ జట్లు ప్లేఆఫ్స్ బెర్త్‌లను ఖాయం చేసుకోగా, చివరి స్థానం కోసం తీవ్ర పోటీ నెలకొంది. అయితే, ఈ సీజన్‌లో కొందరు స్టార్లు అట్టర్ ఫ్లాప్ అయినా, ఫ్రాంచైజీలు మాత్రం వారిని నమ్మి పదే పదే తుది జట్టులోకి తీసుకోవడం గమనార్హం.

నమ్మకం అంటే వీరిదే.. ఫామ్ లేకున్నా జట్టులోనే స్థానం..!

క్రికెట్‌లో ఫామ్ అనేది తాత్కాలికం, క్లాస్ అనేది శాశ్వతం అంటుంటారు. ఐపీఎల్ 2026 సీజన్‌లో కొందరు అగ్రశ్రేణి ఆటగాళ్ల విషయంలో ఫ్రాంచైజీలు ఇదే సూత్రాన్ని గుడ్డిగా నమ్మినట్లు కనిపిస్తోంది. టోర్నీ ఆరంభం నుంచి వరుస వైఫల్యాలతో విమర్శలు ఎదుర్కొంటున్నా, జట్టు యాజమాన్యాలు మాత్రం వారిని పక్కన పెట్టేందుకు అస్సలు ఇష్టపడలేదు. అలా ఈ సీజన్‌లో తీవ్రంగా నిరాశపరిచినా, తుది జట్టులో సుస్థిర స్థానం సంపాదించుకున్న ఆ నలుగురు ఆటగాళ్లు ఎవరో ఇప్పుడు చూద్దాం.

1. సూర్యకుమార్ యాదవ్ (ముంబై ఇండియన్స్)..

ముంబై ఇండియన్స్ నయా మిస్టర్ 360 డిగ్రీల ఆటగాడు సూర్యకుమార్ యాదవ్‌కు ఈ సీజన్ ఒక పీడకలలా మిగిలిపోయింది. మైదానం నలుమూలలా బౌండరీల వర్షం కురిపించే సూర్య, ఈసారి మాత్రం తీవ్రంగా ఇబ్బంది పడ్డాడు. ఆడిన 11 ఇన్నింగ్స్‌ల్లో కేవలం 17.73 సగటుతో 195 పరుగులు మాత్రమే చేయగలిగాడు. ఇందులో ఒకే ఒక్క అర్ధశతకం (అత్యధికంగా 51 పరుగులు) ఉంది. స్ట్రైక్ రేట్ 144.44 గా ఉన్నప్పటికీ, కీలక సమయాల్లో జట్టును ఆదుకోవడంలో విఫలమయ్యాడు. అయినప్పటికీ ముంబై యాజమాన్యం అతనిపై ఉంచిన నమ్మకాన్ని వీడలేదు.

2. శివమ్ దూబే (చెన్నై సూపర్ కింగ్స్)..

చెన్నై సూపర్ కింగ్స్ విధ్వంసకర ఆల్‌రౌండర్ శివమ్ దూబే సైతం ఈ సీజన్‌లో దారుణంగా నిరాశపరిచాడు. భారీ సిక్సర్లతో విరుచుకుపడే దూబే, ఈసారి 8 మ్యాచ్‌ల్లో కేవలం 150 పరుగులు మాత్రమే సాధించాడు. అతని సగటు 37.50 గా ఉన్నా, జట్టు ఆశించిన స్థాయిలో మ్యాచ్ విన్నింగ్ ఇన్నింగ్స్‌లు ఆడలేకపోయాడు. ఇక బౌలింగ్‌లోనైతే సీజన్ మొత్తంలో ఒకే ఒక్క వికెట్ పడగొట్టి చేతులెత్తేశాడు. అయినప్పటికీ, ధోనీ సేన అతనిపై అపారమైన విశ్వాసాన్ని ప్రదర్శిస్తూ ప్రతి మ్యాచ్‌లోనూ అవకాశం కల్పించింది.

3. జాకబ్ బెథెల్ (రాజస్థాన్ రాయల్స్)..

2026 టీ20 ప్రపంచకప్ సెమీఫైనల్లో భారత జట్టుపై అద్భుత శతకంతో ఒక్కసారిగా వెలుగులోకి వచ్చిన ఇంగ్లాండ్ యువ సంచలనం జాకబ్ బెథెల్‌పై ఈ ఐపీఎల్‌లో భారీ అంచనాలు ఉండేవి. కానీ, ఆ అంచనాలను అందుకోవడంలో అతడు ఘోరంగా విఫలమయ్యాడు. ఆడిన 7 మ్యాచ్‌ల్లో కేవలం 13.71 సగటుతో 96 పరుగులు మాత్రమే చేశాడు. కనీసం ఒక్క అర్ధసెంచరీ కూడా చేయలేకపోయిన బెథెల్ గరిష్ట స్కోరు 27 పరుగులు మాత్రమే. అయినప్పటికీ, అతనిలోని ప్రతిభను నమ్మి యాజమాన్యం వరుసగా అవకాశాలు ఇస్తూనే వచ్చింది.

4. కుల్దీప్ యాదవ్ (ఢిల్లీ క్యాపిటల్స్)..

ఢిల్లీ క్యాపిటల్స్ ప్రధాన స్పిన్ అస్త్రం కుల్దీప్ యాదవ్ ఈ సీజన్‌లో పూర్తిగా లయ తప్పాడు. తన స్పిన్ మాయాజాలంతో ప్రత్యర్థి బ్యాటర్లను వణికించే కుల్దీప్, ఈసారి ధారాళంగా పరుగులు సమర్పించుకున్నాడు. 10 మ్యాచ్‌లు ఆడిన అతడు కేవలం 7 వికెట్లు మాత్రమే తీయగలిగాడు. అన్నింటికంటే ముఖ్యంగా అతని ఎకానమీ రేటు 10.35 గా నమోదవ్వడం అతని స్థాయికి తగని ప్రదర్శన. ప్రత్యర్థులు అతడిని లక్ష్యంగా చేసుకుని పరుగులు రాబడుతున్నా, ఢిల్లీ యాజమాన్యం మాత్రం అతని అనుభవాన్ని నమ్మి తుది జట్టులోనే కొనసాగించింది.

క్రీడల్లో ఆటగాళ్లకు అండగా నిలవడం మంచిదే అయినప్పటికీ, వరుసగా విఫలమవుతున్నా ఫామ్‌లో ఉన్న ఇతర యువ ఆటగాళ్లను పక్కనపెట్టి వీరికి మాత్రమే అవకాశాలు ఇవ్వడంపై సోషల్ మీడియాలో భిన్నాభిప్రాయాలు వ్యక్తమవుతున్నాయి. మరి ఈ నలుగురు ఆటగాళ్లు ప్లేఆఫ్స్ ముగిసేలోపలైనా తమ ఫ్రాంచైజీలు పెట్టుకున్న నమ్మకాన్ని నిలబెట్టుకుంటారో లేదో చూడాలి.