IPL 2026: ఆర్సీబీ పై ప్రతీకారం తీర్చుకున్న గుజరాత్ టైటాన్స్.. 4 వికెట్ల తేడాతో బెంగళూరు చిత్తు

IPL 2026: ఐపీఎల్ 2026 సీజన్‌లో భాగంగా అహ్మదాబాద్‌లోని నరేంద్ర మోదీ స్టేడియం వేదికగా జరిగిన ఉత్కంఠ పోరులో గుజరాత్ టైటాన్స్ ఘనవిజయం సాధించింది. రాయల్ ఛాలెంజర్స్ బెంగళూరు (RCB)తో జరిగిన ఈ మ్యాచ్‌లో గుజరాత్ 4 వికెట్ల తేడాతో విజయం సాధించి, గత ఓటమికి ప్రతీకారం తీర్చుకుంది. సొంత గడ్డపై బెంగళూరును మట్టికరిపించి గుజరాత్ ప్లేఆఫ్స్ దిశగా మరో అడుగు ముందుకు వేసింది. టాస్ గెలిచిన గుజరాత్ టైటాన్స్ కెప్టెన్ ముందుగా బౌలింగ్ ఎంచుకుని సరైన నిర్ణయం తీసుకున్నాడు. బ్యాటింగ్‌కు దిగిన బెంగళూరుకు ఆదిలోనే ఎదురుదెబ్బ తగిలింది. జాకబ్ బెథెల్ కేవలం 5 పరుగులకే సిరాజ్ బౌలింగ్‌లో అవుట్ అయ్యాడు. విరాట్ కోహ్లీ (28) రబడా వేసిన ఒకే ఓవర్లో ఐదు ఫోర్లు కొట్టి జోరు మీద కనిపించినా, అదే రబడా వేసిన బౌన్సర్‌కు చిక్కి పెవిలియన్ చేరాడు. రజత్ పాటిదార్ (40) కొంత సేపు పోరాడినా, మిగిలిన బ్యాటర్లు జితేష్ శర్మ (1), టిమ్ డేవిడ్ (9) దారుణంగా విఫలమయ్యారు. దీనితో ఆర్సీబీ 20 ఓవర్లు కూడా ఆడకుండానే 155 పరుగులకే కుప్పకూలింది. జేసన్ హోల్డర్, రషీద్ ఖాన్ అద్భుతమైన బౌలింగ్‌తో బెంగళూరును కట్టడి చేశారు.

స్వల్ప లక్ష్యంతో బరిలోకి దిగిన గుజరాత్‌కు కూడా ఆరంభం అంత బాగా లేదు. సాయి సుదర్శన్ (6) త్వరగానే అవుట్ అయ్యాడు. కానీ కెప్టెన్ శుభ్‌మన్ గిల్ మాత్రం ఆకాశమే హద్దుగా చెలరేగిపోయాడు. జోష్ హాజిల్‌వుడ్ వేసిన తొలి ఓవర్లోనే 24 పరుగులు పిండుకుని స్టేడియాన్ని హోరెత్తించాడు. గిల్ కేవలం 18 బంతుల్లో 3 సిక్సర్లు, 4 ఫోర్లతో 43 పరుగులు చేసి విజయానికి పునాది వేశాడు. జోస్ బట్లర్ (39) కూడా ధాటిగా ఆడి స్కోరు బోర్డును పరిగెత్తించాడు.

మిడిల్ ఓవర్లలో బెంగళూరు బౌలర్లు పుంజుకుని కొన్ని వికెట్లు తీసినా, చివరిలో రాహుల్ తెవాటియా తనదైన శైలిలో కూల్‌గా ఆడి జట్టును విజయతీరాలకు చేర్చాడు. 4 వికెట్ల తేడాతో గుజరాత్ గెలుపును ఖాయం చేసుకుంది. ఈ సీజన్‌లో ఆడిన 9 మ్యాచ్‌ల్లో గుజరాత్‌కు ఇది ఐదో విజయం. మరోవైపు బెంగళూరుకు ఇది తొమ్మిదో మ్యాచ్ కాగా, అందులో మూడో ఓటమి. తమ హోమ్ గ్రౌండ్‌లో గుజరాత్‌ను ఓడించిన ఆర్సీబీకి, ఇప్పుడు అహ్మదాబాద్‌లో గుజరాత్ తన ప్రతీకారాన్ని తీర్చుకుంది. ఈ విజయంతో గుజరాత్ టైటాన్స్ పాయింట్ల పట్టికలో టాప్-5లో నిలిచింది. రషీద్ ఖాన్ మ్యాజిక్ స్పిన్, హోల్డర్ కచ్చితమైన బౌలింగ్ గుజరాత్ గెలుపులో కీలక పాత్ర పోషించాయి.