MI vs PBKS : తిలక్ వర్మ తుపాన్ ఇన్నింగ్స్.. పంజాబ్‌పై ముంబై ఇండియన్స్ అద్భుత విజయం

MI vs PBKS : ఐపీఎల్ 2026 సీజన్‌లో ముంబై ఇండియన్స్ మళ్ళీ గాడిలో పడింది. ధర్మశాల వేదికగా పంజాబ్ కింగ్స్‌తో జరిగిన ఉత్కంఠభరిత పోరాటంలో ముంబై 6 వికెట్ల తేడాతో ఘనవిజయం సాధించింది. పంజాబ్ నిర్దేశించిన 201 పరుగుల భారీ లక్ష్యాన్ని ముంబై ఇంకా ఒక బంతి మిగిలి ఉండగానే ఛేదించింది. యువ సంచలనం తిలక్ వర్మ తన విధ్వంసకర బ్యాటింగ్‌తో మ్యాచ్ స్వరూపాన్నే మార్చేశాడు. ఈ విజయంతో ముంబై ఈ సీజన్‌లో నాలుగో విజయాన్ని తన ఖాతాలో వేసుకోగా, పంజాబ్‌కు ఇది ఐదో ఓటమి.

టాస్ ఓడి మొదట బ్యాటింగ్ చేసిన పంజాబ్ కింగ్స్ నిర్ణీత 20 ఓవర్లలో 8 వికెట్ల నష్టానికి 200 పరుగులు చేసింది. ఓపెనర్ ప్రభ్‌సిమ్రాన్ సింగ్ (57 పరుగులు, 32 బంతుల్లో) ఆరంభం నుంచే ముంబై బౌలర్లపై విరుచుకుపడ్డాడు. అతనికి తోడుగా అజ్మతుల్లా ఒమర్జాయ్ (38) మెరుపులు మెరిపించాడు. మధ్యలో వికెట్లు పడి స్కోరు తగ్గుతుందనుకున్న సమయంలో విష్ణు వినోద్, జేవియర్ బార్ట్లెట్ ఆఖరి 3 ఓవర్లలో ఏకంగా 53 పరుగులు సాధించి జట్టు స్కోరును 200 మార్కుకు చేర్చారు. ముంబై బౌలర్లలో శార్దూల్ ఠాకూర్ 4 వికెట్లతో రాణించగా, బుమ్రాకు ఈ మ్యాచ్‌లో వికెట్లు దక్కకపోవడం గమనార్హం.

201 పరుగుల లక్ష్యంతో బరిలోకి దిగిన ముంబైకి ఓపెనర్లు మంచి ఆరంభాన్ని ఇచ్చారు. రయాన్ రికెల్టన్ (48) తృటిలో హాఫ్ సెంచరీ మిస్ చేసుకోగా, రోహిత్ శర్మ 25 పరుగులు చేసి నిష్క్రమించాడు. ఈ దశలో క్రీజులోకి వచ్చిన తిలక్ వర్మ మ్యాచ్ బాధ్యతను భుజానికెత్తుకున్నాడు. కేవలం 33 బంతుల్లోనే 6 ఫోర్లు, 6 భారీ సిక్సర్లతో అజేయంగా 75 పరుగులు చేసి ముంబైని విజయతీరాలకు చేర్చాడు. విల్ జాక్స్‌తో కలిసి కీలకమైన భాగస్వామ్యం నెలకొల్పి, పంజాబ్ బౌలర్లను ముప్పుతిప్పలు పెట్టాడు. ముంబై బ్యాటర్ల ధాటికి పంజాబ్ బౌలర్లు చేతులెత్తేయడంతో 19.5 ఓవర్లలోనే లక్ష్యం పూర్తయింది.

మ్యాచ్ ఒక దశలో పంజాబ్ వైపు మొగ్గుతున్నట్లు కనిపించినా, తిలక్ వర్మ ఎదురుదాడి చేయడంతో ముంబై పట్టు బిగించింది. ముఖ్యంగా డెత్ ఓవర్లలో తిలక్ బాదిన సిక్సర్లు మ్యాచ్‌కే హైలెట్‌గా నిలిచాయి. పంజాబ్ బౌలర్ల వ్యూహాలను చిత్తు చేస్తూ మైదానం నలుమూలలా షాట్లు బాదిన తిలక్, ముంబై అభిమానులకు కన్నుల పండువ చేశాడు. ఈ విజయంతో ముంబై పాయింట్ల పట్టికలో తన స్థానాన్ని మెరుగుపరుచుకోగా, పంజాబ్ ప్లే ఆఫ్స్ అవకాశాలు మరింత క్లిష్టంగా మారాయి.