IPL 2026: రాజ‌స్థాన్ ఓట‌మితో ఆర్సీబీకి బిగ్ షాక్‌.. పాయింట్ల ప‌ట్టిక‌లో భారీ మార్పులు

IPL 2026: ఐపీఎల్ 2026 సీజన్ ప్లేఆఫ్స్ దశకు చేరుకుంటుండగా పాయింట్ల పట్టికలో పోటీ మరింత ఉత్కంఠగా మారింది. శనివారం జరిగిన మ్యాచ్‌లో గుజరాత్ టైటాన్స్, రాజస్థాన్ రాయల్స్‌పై విజయం సాధించడంతో టేబుల్‌లో పెద్ద మార్పులు చోటుచేసుకున్నాయి.

ఈ ఫలితం రాజస్థాన్‌కే కాకుండా రాయల్ ఛాలెంజర్స్ బెంగళూరుకూ ప్రభావం చూపింది. ఇప్పటివరకు ఈ సీజన్‌లో 52 మ్యాచ్‌లు పూర్తయ్యాయి. ప్రతి జట్టు మొత్తం 14 లీగ్ మ్యాచ్‌లు ఆడనుండగా, టాప్-4లో నిలిచిన జట్లు మాత్రమే ప్లేఆఫ్స్‌కు అర్హత సాధిస్తాయి.

గుజరాత్ టైటాన్స్ భారీ జంప్

రాజస్థాన్‌పై గెలుపు సాధించే ముందు గుజరాత్ టైటాన్స్ టాప్-4లో కూడా లేదు. అయితే ఈ విజయంతో శుభ్‌మన్ గిల్ జట్టు నేరుగా రెండో స్థానానికి ఎగబాకింది. గుజరాత్ ఇప్పటివరకు 11 మ్యాచ్‌లు ఆడి 7 విజయాలు నమోదు చేసింది. దీంతో ఆ జట్టు ఖాతాలో 14 పాయింట్లు చేరాయి. ప్రస్తుతం సన్‌రైజర్స్ హైదరాబాద్‌కూ 14 పాయింట్లే ఉన్నాయి. కానీ మెరుగైన నెట్ రన్‌రేట్ కారణంగా హైదరాబాద్ మొదటి స్థానంలో కొనసాగుతోంది. గుజరాత్ రెండో స్థానంలో నిలిచింది.

రాజస్థాన్‌కు నష్టం.. RCB కూడా దిగజారింది

ఈ ఓటమితో రాజస్థాన్ రాయల్స్ టాప్-4 నుంచి బయటకు వెళ్లింది. ఇప్పటివరకు 11 మ్యాచ్‌లు ఆడిన రాజస్థాన్ 5 ఓటములు చవిచూసింది. ముఖ్యంగా చివరి 6 మ్యాచ్‌ల్లో 4 పరాజయాలు ఆ జట్టును తీవ్రంగా దెబ్బతీశాయి.

రాజస్థాన్ ఖాతాలో ప్రస్తుతం 12 పాయింట్లు ఉన్నాయి. దీంతో ఆ జట్టు నాలుగో స్థానం నుంచి ఐదో స్థానానికి పడిపోయింది.

రాజస్థాన్ ఓటమి ప్రభావం రాయల్ ఛాలెంజర్స్ బెంగళూరుపై కూడా పడింది. RCB కూడా ఒక స్థానం దిగజారి నాలుగో స్థానానికి చేరుకుంది. బెంగళూరు ఖాతాలో కూడా 12 పాయింట్లే ఉన్నాయి. అయితే ఆ జట్టు నెట్ రన్‌రేట్ చాలా బలంగా ఉంది. కాగా ఈరోజు (ఆదివారం) ముంబై ఇండియన్స్‌పై RCB విజయం సాధిస్తే నేరుగా మొదటి స్థానానికి చేరుకునే అవకాశం ఉంది.

టాప్-4లో ఎవరు ఉన్నారు?

ప్రస్తుతం పాయింట్ల పట్టికలో సన్‌రైజర్స్ హైదరాబాద్ మొదటి స్థానంలో ఉంది. గుజరాత్ టైటాన్స్ రెండో స్థానంలో నిలిచింది. పంజాబ్ కింగ్స్ 13 పాయింట్లతో మూడో స్థానంలో ఉంది. RCB నాలుగో స్థానంలో కొనసాగుతోంది. ఇంకా ప్లేఆఫ్స్ రేస్ పూర్తిగా ముగియలేదు. చాలా జట్లకు ఇంకా అవకాశాలు ఉన్నాయి. అందుకే ప్రతి మ్యాచ్ కీలకంగా మారుతోంది.

మిగతా జట్ల పరిస్థితి ఎలా ఉంది?

చెన్నై సూపర్ కింగ్స్ ఇప్పటివరకు 10 మ్యాచ్‌ల్లో 5 విజయాలు సాధించి 10 పాయింట్లతో ఆరో స్థానంలో ఉంది. కోల్‌కతా నైట్ రైడర్స్ 9 పాయింట్లతో ఏడో స్థానంలో కొనసాగుతోంది. ఒక మ్యాచ్ రద్దు కావడంతో KKRకి అదనంగా ఒక పాయింట్ లభించింది.

ఢిల్లీ క్యాపిటల్స్ 8 పాయింట్లతో ఎనిమిదో స్థానంలో ఉంది. ముంబై ఇండియన్స్ మాత్రం 10 మ్యాచ్‌ల్లో కేవలం 3 విజయాలతో 6 పాయింట్ల వద్ద నిలిచింది. ఈరోజు RCB చేతిలో ఓడిపోతే ముంబై ప్లేఆఫ్స్ అవకాశాలు దాదాపు ముగిసినట్టే. లక్నో సూపర్ జెయింట్స్ కూడా 6 పాయింట్లతోనే చివరి స్థానంలో ఉంది. ఇక నుంచి ప్రతి మ్యాచ్ ఆ జట్టుకు ‘డూ ఆర్ డై’గా మారింది.