IPL 2026 : చెపాక్‌లో సన్‌రైజర్స్ పంజా.. చెన్నై పై గెలిచి ప్లేఆఫ్స్‌కు దూసుకెళ్లిన కమిన్స్ సేన

IPL 2026 : ఐపీఎల్ 2026లో అత్యంత కీలకమైన పోరులో సన్‌రైజర్స్ హైదరాబాద్ (SRH) అదరగొట్టింది. చెన్నై సూపర్ కింగ్స్ (CSK) సొంతగడ్డపై జరిగిన ఉత్కంఠభరిత పోరులో 5 వికెట్ల తేడాతో ఘనవిజయం సాధించింది. ఈ గెలుపుతో హైదరాబాద్ అధికారికంగా ప్లేఆఫ్స్ బెర్తును ఖరారు చేసుకుంది. కేవలం ఎస్‌ఆర్‌హెచ్ మాత్రమే కాదు, ఈ ఫలితంతో గుజరాత్ టైటాన్స్ కూడా ప్లేఆఫ్స్‌లోకి ఎంట్రీ ఇచ్చింది. మరోవైపు ఈ ఓటమి చెన్నైకి కోలుకోలేని దెబ్బ తీసింది. ఆ జట్టు ప్లేఆఫ్స్ అవకాశాలు ఇప్పుడు చాలా క్లిష్టంగా మారాయి.

సాధారణంగా ఈ సీజన్‌లో చెపాక్ పిచ్‌పై భారీ స్కోర్లు నమోదవుతున్నాయి. కానీ ఈ మ్యాచ్‌లో మాత్రం పిచ్ పాత రోజులను గుర్తుచేసింది. బంతి ఆగుతూ రావడం, స్పిన్నర్లకు సహకరించడంతో బ్యాటర్లు పరుగులు తీయడానికి చెమటోడ్చారు. చెన్నై ఓపెనర్ సంజూ శామ్సన్ (27) మెరుపు ఆరంభం ఇచ్చినా, కెప్టెన్ రుతురాజ్ గైక్వాడ్ (15) ఘోరంగా విఫలమయ్యాడు. మధ్యలో కార్తీక్ శర్మ (32) వేగంగా ఆడినా, సీఎస్‌కేను ఆదుకుంది మాత్రం డెవాల్డ్ బ్రెవిస్ (44). ఆయన పట్టుదలతో ఆడటంతో చెన్నై నిర్ణీత ఓవర్లలో 180 పరుగుల గౌరవప్రదమైన స్కోరు చేయగలిగింది. హైదరాబాద్ కెప్టెన్ పాట్ కమిన్స్ అద్భుతమైన బౌలింగ్‌తో 3 వికెట్లు తీసి చెన్నైని భారీ స్కోరు చేయకుండా అడ్డుకున్నాడు.

181 పరుగుల లక్ష్యంతో బరిలోకి దిగిన హైదరాబాద్‌కు ఆరంభంలో షాక్ తగిలింది. స్టార్ ఓపెనర్ ట్రావిస్ హెడ్ (6) త్వరగానే పెవిలియన్ చేరాడు. పిచ్ కండిషన్స్ వల్ల పవర్ ప్లేలో పరుగులు రావడం గగనమైంది. అభిషేక్ శర్మ (26) కూడా అవుట్ కావడంతో హైదరాబాద్ 56 పరుగులకే 2 వికెట్లు కోల్పోయి కష్టాల్లో పడింది. అయితే ఆ సమయంలో ఇషాన్ కిషన్ తన అనుభవాన్నంతా ఉపయోగించి ఇన్నింగ్స్‌ను చక్కదిద్దాడు. హెన్రిచ్ క్లాసెన్ జతకలవడంతో మ్యాచ్ మలుపు తిరిగింది. క్లాసెన్ (47) తన స్టైల్‌లో సిక్సర్లతో విరుచుకుపడి చెన్నై బౌలర్లపై ఒత్తిడి పెంచాడు.

ఇషాన్ కిషన్ 70 పరుగులతో జట్టును గెలుపు తీరాలకు చేర్చాడు. 5 వికెట్లు కోల్పోయినప్పటికీ, క్లిష్టమైన సమయంలో ఇషాన్ చూపిన తెగువ హైదరాబాద్‌కు ప్లేఆఫ్స్ టికెట్ అందించింది. ఈ ఓటమితో చెన్నై అభిమానులు తీవ్ర నిరాశలో మునిగిపోయారు. ముఖ్యంగా ఎంఎస్ ధోనీ జట్టులో లేకపోవడం, ఫినిషింగ్ దశలో ఆయన మెరుపులు లేకపోవడం సీఎస్‌కేను దెబ్బతీశాయి. ప్రస్తుతం చెన్నై పాయింట్ల పట్టికలో వెనుకబడి ఉంది. ఇతర జట్ల ఫలితాలపై ఆధారపడితే తప్ప సీఎస్‌కే ముందుకు వెళ్లడం సాధ్యం కాదు.