IPL-2027: ఐపీఎల్ 2027కు మరింత స్ట్రాంగ్‌గా SRH బౌలింగ్ లైనప్.. కమిన్స్ లేకపోయినా ఢోకా లేదిక!

SRH: తమ బౌలింగ్ టీమ్‌ను మరింత స్ట్రాంగ్ చేసుకుంటోంది. ఇప్పటికే విధ్వంసక బ్యాటింగ్ లైనప్ ఉన్న జట్టు, ప్రత్యర్థి ప్లేయర్లకు చుక్కలు చూపించే బౌలర్లను సిద్ధం చేసుకుంది. ఖలీల్, నటరాజన్, ఎల్లిస్, మలింగ, సాకిబ్ హుస్సేన్, హింగే వంటి బౌలర్లతో లైనప్ బలోపేతమైంది. కమిన్స్ లేకపోతే ఇషాన్ సారథ్యం వహించే అవకాశముంది. SRH ఇప్పుడు స్ట్రాంగ్ టీమ్‌గా మారిందని విశ్లేషకులు అంటున్నారు.

ఐపీఎల్ 2027 ట్రేడ్ విండోలో SRH రెండు కీలక డీల్స్ పూర్తి చేసింది. చెన్నై సూపర్ కింగ్స్‌తో జరిగిన నలుగురు ఆటగాళ్ల ట్రేడ్‌లో ఎడమచేతి వాటం పేసర్ ఖలీల్ అహ్మద్‌ను రూ. 4.8 కోట్లకు, ఆస్ట్రేలియా పేసర్ నాథన్ ఎల్లిస్‌ను రూ. 2 కోట్లకు దక్కించుకుంది. బదులుగా లియామ్ లివింగ్‌స్టోన్, జాక్ ఎడ్వర్డ్స్‌ను CSKకి ఇచ్చింది. అంతకుముందు ఢిల్లీ క్యాపిటల్స్ నుంచి టీ. నటరాజన్‌ను రూ. 5 కోట్లకు తిరిగి తెచ్చుకుంది. ఇందుకు బదులుగా జీషన్ అన్సారీని ఢిల్లీకి పంపింది. ఖలీల్ 2018 నుంచి 2021 వరకు SRHకి ఆడారు. అప్పుడు 24 మ్యాచుల్లో 32 వికెట్లు తీశారు. 2025లో CSK తరఫున 14 మ్యాచుల్లో 15 వికెట్లు పడగొట్టారు. 2026లో క్వాడ్రిసెప్స్ గాయంతో ఐదు మ్యాచులకే పరిమితమయ్యారు. ఎల్లిస్ డెత్ ఓవర్ల స్పెషలిస్ట్. 2026లో హ్యామ్‌స్ట్రింగ్ గాయంతో ఆయన సీజన్ మొత్తానికి దూరమయ్యారు.

SRH బౌలింగ్ గ్రూప్‌లో ఇప్పటికే ఈషాన్ మలింగ, సాకిబ్ హుస్సేన్, ప్రఫుల్ హింగే ఉన్నారు. గత సీజన్‌లో సాకిబ్ 15 వికెట్లు, హింగే 14 వికెట్లు తీశారు. ఖలీల్ పవర్‌ప్లేలో మూడు ఓవర్లు వేయగలరు. ఎల్లిస్, నటరాజన్ మిడిల్, డెత్ ఓవర్లలో కీలకంగా మారతారు. దీంతో 16 ఓవర్లు కట్టుదిట్టంగా వేసే బౌలింగ్ లైనప్ సిద్ధమైందని విశ్లేషకులు చెబుతున్నారు. పాట్ కమిన్స్ ఐపీఎల్‌లో ఆడతారా లేదా అనే సందేహం ఈ ట్రేడ్‌లకు ఒక కారణమని మాజీ SRH బ్యాటర్ అభిప్రాయపడ్డారు. కమిన్స్ ఆడకపోతే ఖలీల్‌తో కలిసి మలింగ న్యూ బాల్ పంచుకోవచ్చు. ప్రస్తుతం కమిన్స్ SRH కెప్టెన్‌గా ఉన్నారు. ఆయన IPL 2026లో మొదటి 7 మ్యాచులకు దూరమైనప్పుడు ఇషాన్ కిషన్ జట్టును నడిపించారు. కోచ్‌గా డేనియల్ వెటోరి ఉన్నారు.

SRH IPL 2026లో ప్లేఆఫ్స్‌కు చేరింది. కానీ ఎలిమినేటర్‌లో రాజస్థాన్ రాయల్స్ చేతిలో ఓడింది. అభిషేక్ శర్మ, ఇషాన్ కిషన్, ట్రావిస్ హెడ్, హెన్రిచ్ క్లాసెన్, నితీష్ కుమార్ రెడ్డి వంటి విధ్వంసక బ్యాటర్లు జట్టులో ఉన్నారు. బౌలింగ్ లోపాలను సరిదిద్దుకున్న ఈ జట్టుతో SRH టైటిల్ రేసులో బలమైన పోటీదారుగా మారుతుందని అంచనా.