Varun Chakaravarthy: ఐపీఎల్‌లో స్పిన్నర్ల రాజ్యం.. టాప్‌లో ఎవరున్నారో తెలుసా?

Varun Chakaravarthy: ఇండియన్ ప్రీమియర్ లీగ్ (ఐపీఎల్)లో ఫాస్ట్ బౌలర్లతో పాటు స్పిన్నర్ల పాత్ర ఎంత కీలకమో అందరికీ తెలిసిందే. ముఖ్యంగా రిస్ట్ స్పిన్నర్లు (లెగ్ స్పిన్నర్లు, చైనామన్ బౌలర్లు) మ్యాచ్‌ను ఒక్కసారిగా తారుమారు చేసే సామర్థ్యంను కలిగి ఉంటారు. ఈ క్రమంలో ఐపీఎల్ చరిత్రలో అత్యధిక ‘ప్లేయర్ ఆఫ్ ది మ్యాచ్’ అవార్డులు గెలుచుకున్న స్పెషలిస్ట్ రిస్ట్ స్పిన్నర్ల జాబితా ఇప్పుడు ఆసక్తికరంగా ఉంది. ఈ జాబితాలో అగ్రస్థానంలో ఆఫ్గనిస్తాన్ స్టార్ రషీద్ ఖాన్ ఉన్నాడు. రషీద్ మొత్తం 13 ‘ప్లేయర్ ఆఫ్ ది మ్యాచ్’ అవార్డులు గెలుచుకుని తన ప్రభావాన్ని చాటుకున్నాడు. చాలా ఏళ్లుగా సన్‌రైజర్స్ హైదరాబాద్‌ జట్టుకు ఆడిన అతడు... ఇప్పుడు గుజరాత్ తరఫున ఆడుతున్నాడు.

ఈ జాబితాలో రషీద్ ఖాన్ తర్వాత భారత వెటరన్ అమిత్ మిశ్రా 12 అవార్డులతో రెండో స్థానంలో కొనసాగుతున్నాడు. మూడో స్థానంలో వరుణ్ చక్రవర్తి 8 అవార్డులతో నిలిచాడు. తన మిస్టరీ స్పిన్‌తో మ్యాచ్‌లను మలుపు తిప్పుతూ ఈ జాబితాలో స్థానం సంపాదించాడు. నాలుగో స్థానంలో యుజ్వేంద్ర చాహల్, కుల్దీప్ యాదవ్ తలో 7 అవార్డులతో ఉన్నారు. ఈ లిస్టులో ఐదో స్థానంలో లెజెండరీ స్పిన్నర్ షేన్ వార్న్ 4 అవార్డులతో నిలిచాడు. ఐపీఎల్ ప్రారంభంలోనే తన స్పిన్ మాయతో ప్రేక్షకులను ఆకట్టుకున్న వార్న్ ఈ జాబితాలో ప్రత్యేక స్థానాన్ని సంపాదించాడు.

మొత్తం మీద చూస్తే.. రిస్ట్ స్పిన్నర్లు ఐపీఎల్‌లో ఎంత ప్రభావవంతంగా ఉంటారో ఈ గణాంకాలు స్పష్టంగా చూపిస్తున్నాయి. కీలక సమయాల్లో వికెట్లు తీస్తూ మ్యాచ్ ఫలితాన్ని మార్చే సామర్థ్యం ఈ బౌలర్ల ప్రత్యేకత. భవిష్యత్తులో ఈ జాబితాలో మరిన్ని పేర్లు చేరే అవకాశముంది. ఐపీఎల్ 2026లో భాగంగా ఆదివారం సన్‌రైజర్స్ హైదరాబాద్‌ జట్టుతో జరిగిన మ్యాచులో కోల్‌కతా నైట్‌ రైడర్స్ విజయం అందుకుంది. కోల్‌కతా విజయంలో అంగ్‌క్రిష్‌ రఘువంశీ (59; 47 బంతుల్లో 5 ఫోర్లు, 2 సిక్స్‌లు), అజింక్య రహానె (43; 36 బంతుల్లో 4 ఫోర్లు, 1 సిక్స్‌) కీలక పాత్ర పోషించారు.

అత్యధిక ప్లేయర్ ఆఫ్ ది మ్యాచ్ అవార్డులు:

13 రషీద్ ఖాన్

12 అమిత్ మిశ్రా

8 వరుణ్ చక్రవర్తి

7 యుజ్వేంద్ర చాహల్/ కుల్దీప్ యాదవ్

4 షేన్ వార్న్