Joe Root: జో రూట్ సంచలనం.. సచిన్ టెండూల్కర్ ఆల్‌టైమ్ టెస్ట్ రికార్డ్ సమం!

Joe Root: ఆధునిక క్రికెట్ ప్రపంచంలో టెస్టు ఫార్మాట్‌కు బ్రాండ్ అంబాసిడర్‌లా దూసుకుపోతున్న ఇంగ్లాండ్ స్టార్ బ్యాటర్ జో రూట్ తన ఖాతాలో మరో అరుదైన, సంచలనాత్మక ఘనతను వేసుకున్నాడు.

పాకిస్తాన్‌తో జరుగుతున్న తొలి టెస్ట్ మ్యాచ్‌లో అద్భుత అర్ధ సెంచరీతో రాణించిన రూట్.. క్రికెట్ దేవుడు సచిన్ టెండూల్కర్ నెలకొల్పిన సుదీర్ఘకాలపు ఆల్‌టైమ్ రికార్డును సమం చేశాడు. పాకిస్తాన్‌పై 68వ అర్ధ సెంచరీ (50) సాధించడం ద్వారా టెస్టు క్రికెట్ చరిత్రలోనే అత్యధిక అర్ధ శతకాలు చేసిన బ్యాటర్లలో సచిన్ టెండూల్కర్‌ సరసన ప్రథమ స్థానంలో నిలిచాడు.

టెస్టుల్లో అత్యధిక అర్ధ సెంచరీలు సాధించిన టాప్ బ్యాటర్ల లిస్ట్‌ను ఓసారి పరిశీలిస్తే...

సచిన్ టెండూల్కర్ (భారత్): 68 అర్ధ సెంచరీలు

జో రూట్ (ఇంగ్లాండ్): 68 అర్ధ సెంచరీలు

శివనారాయణ్ చందర్‌పాల్ (వెస్టిండీస్): 66 అర్ధ సెంచరీలు

అలన్ బోర్డర్ (ఆస్ట్రేలియా): 63 అర్ధ సెంచరీలు

రాహుల్ ద్రవిడ్ (భారత్): 63 అర్ధ సెంచరీలు

ప్రస్తుతం ఊపుమీదున్న రూట్, త్వరలోనే మరొక హాఫ్ సెంచరీ సాధిస్తే సచిన్ రికార్డును తుడిచిపెట్టేసి, టెస్టుల్లో అత్యధిక హాఫ్ సెంచరీలు చేసిన ఏకైక బ్యాటర్‌గా సరికొత్త చరిత్ర సృష్టించడం ఖాయంగా కనిపిస్తోంది.

కేవలం ఒక బ్యాటర్‌గానే కాకుండా, ఇంగ్లాండ్ కెప్టెన్‌గా బాధ్యతలు నిర్వర్తించిన సమయంలోనూ రూట్ అద్భుతమైన నిలకడను ప్రదర్శించాడు. కెప్టెన్‌గా అత్యధిక అర్ధ సెంచరీలు (50+) చేసిన ప్రపంచ కెప్టెన్ల జాబితాలో రూట్ తాజాగా 5వ స్థానానికి చేరుకున్నాడు. కెప్టెన్‌గా రూట్‌కి ఇది 42వ అర్ధ శతకం.

కెప్టెన్‌గా అత్యధిక అర్ధ సెంచరీలు సాధించిన ఆటగాళ్ల లిస్ట్‌ను గమనిస్తే..

గ్రేమ్ స్మిత్ (సౌతాఫ్రికా): 61 అర్ధ సెంచరీలు

రికి పాంటింగ్ (ఆస్ట్రేలియా): 54 అర్ధ సెంచరీలు

అలన్ బోర్డర్ (ఆస్ట్రేలియా): 51 అర్ధ సెంచరీలు

మిస్బా ఉల్ హక్ (పాకిస్తాన్): 43 అర్ధ సెంచరీలు

జో రూట్ (ఇంగ్లాండ్): 42 అర్ధ సెంచరీలు

ఫామ్‌తో సంబంధం లేకుండా నిలకడగా పరుగులు సాధిస్తూ ముందుకు సాగుతున్న జో రూట్, రెడ్ బాల్ క్రికెట్‌లో ఫాబ్-4 ఆటగాళ్లలోనే అగ్రస్థానంలో కొనసాగుతున్నాడు. రాబోయే రోజుల్లో రూట్ ఇంకెన్ని కొత్త రికార్డులు క్రియేట్ చేస్తాడో వేచి చూడాలి.