Rohit Sharma Future: రోహిత్ శర్మ ఎప్పటికీ ఆడలేడు.. ఆసీస్ మాజీ స్టార్ సంచలన వ్యాఖ్యలు!

Rohit Sharma Future: భారత స్టార్ ఓపెనర్ రోహిత్ శర్మ భవిష్యత్తుపై మరోసారి చర్చ మొదలైంది. 2027 వన్డే ప్రపంచకప్‌లో రోహిత్ ఆడతాడా? లేదా? అనే ప్రశ్నలకు ఇంకా స్పష్టత రాలేదు. ఈ నేపథ్యంలో ఆస్ట్రేలియా మాజీ ఓపెనర్ మాథ్యూ హేడెన్ కీలక వ్యాఖ్యలు చేశాడు. హిట్‌మ్యాన్ ఎంతకాలం అంతర్జాతీయ క్రికెట్‌లో కొనసాగాలనేది పూర్తిగా అతడి నిర్ణయమేనని.. అయితే అత్యున్నత స్థాయిలో క్రికెట్ ఆడేందుకు యువకుడి స్థాయిలో శక్తి, ఆకలి, అంకితభావం అవసరమని పేర్కొన్నాడు. రోహిత్ ఇప్పటికే టెస్టు, టీ20 అంతర్జాతీయ క్రికెట్‌కు వీడ్కోలు పలికాడు. ప్రస్తుతం అతడు వన్డే క్రికెట్‌కు మాత్రమే అందుబాటులో ఉన్నాడు. ఈ క్రమంలో 2027 ప్రపంచకప్ వరకు రోహిత్ కొనసాగుతాడా అనే అంశం క్రికెట్ వర్గాల్లో ఆసక్తిని రేకెత్తిస్తోంది.

39 ఏళ్ల వయసులోనూ రోహిత్ శర్మ అద్భుత బ్యాటింగ్‌తో విమర్శకులకు సమాధానం ఇస్తున్నాడు. అయినప్పటికీ వయసు, ఫిట్‌నెస్, క్రికెట్ షెడ్యూల్ వంటి అంశాలు అతడి భవిష్యత్తులో కీలకంగా మారనున్నాయి. 'ఒక ఆటగాడు రోహిత్ వయసుకు చేరుకున్నప్పుడు ఇలాంటి ప్రశ్నలు సహజంగానే ఎదురవుతాయి. అంతకుముందు విరాట్ కోహ్లీ, అంతకుముందు గౌతమ్ గంభీర్ విషయంలోనూ ఇదే జరిగింది. ఎవరూ ఆటను ఎప్పటికీ ఆడలేరు. కెరీర్‌లో ఒక దశకు చేరుకున్నప్పుడు ఐపీఎల్ లేదా అంతర్జాతీయ క్రికెట్‌లో ఏది ముందుగా ముగించాలనే ప్రశ్న ఎదురవుతుంది. రోహిత్ ఇప్పటికే టెస్టులకు రిటైర్మెంట్ ప్రకటించాడు. కాబట్టి ఇక ఎంతకాలం కొనసాగాలో అతడే నిర్ణయించుకోవాలి' అని హేడెన్ అన్నాడు.

'అత్యున్నత స్థాయిలో క్రికెట్ ఆడాలంటే యువకుడి స్థాయిలో శక్తి, ఉత్సాహం, నిరంతరం పోరాడే తపన రోహిత్ శర్మకు అవసరం. బిజీ అంతర్జాతీయ షెడ్యూల్‌తో పాటు ఐపీఎల్ వంటి టోర్నీల్లోనూ ఆడాల్సి ఉండటంతో ఆటగాళ్లపై శారీరకంగా, మానసికంగా ఒత్తిడి పెరుగుతుంది. అందువల్ల రోహిత్ తన శరీరం, మానసిక స్థితి, ఆటపై ఉన్న ఆసక్తిని బట్టి నిర్ణయం తీసుకోవాల్సి ఉంటుంది' అని హేడెన్ పేర్కొన్నాడు. ఇంగ్లండ్‌తో ఇటీవల జరిగిన వన్డే సిరీస్‌లో రోహిత్ తనపై వస్తున్న విమర్శలకు బ్యాట్‌తోనే సమాధానం ఇచ్చాడు. మూడు వన్డేల సిరీస్‌లో భారత్ 2-1తో ఓడిపోయినప్పటికీ.. రోహిత్ అద్భుతంగా రాణించాడు. మూడు మ్యాచ్‌ల్లో 175 పరుగులు చేశాడు. అతడు 58.33 సగటుతో, 98.31 స్ట్రైక్‌రేట్‌తో రన్స్ చేశాడు.

సిరీస్ నిర్ణయాత్మక మూడో వన్డేలో రోహిత్ ఆడిన ఇన్నింగ్స్ క్రికెట్ అభిమానులను మంత్రముగ్ధులను చేసింది. 388 పరుగుల భారీ లక్ష్యాన్ని ఛేదించే క్రమంలో కేవలం 110 బంతుల్లోనే 138 పరుగులు చేశాడు. అతడి ఇన్నింగ్స్‌లో 17 ఫోర్లు, ఐదు సిక్సర్లు ఉన్నాయి. విరాట్ కోహ్లీతో కలిసి భారీ భాగస్వామ్యం నెలకొల్పి భారత విజయంపై ఆశలు రేకెత్తించాడు. అయితే చివరికి భారత్ 27 పరుగుల తేడాతో ఓటమి పాలైంది. అంతర్జాతీయ వన్డేల్లో రోహిత్ ఇప్పటికే అత్యుత్తమ బ్యాటర్లలో ఒకడిగా ఉన్నాడు. ఇప్పటివరకు 288 మ్యాచ్‌ల్లో 280 ఇన్నింగ్స్‌లు ఆడిన రోహిత్.. 11,895 పరుగులు చేశాడు. అతడి బ్యాటింగ్ సగటు 48.95 కాగా.. స్ట్రైక్‌రేట్ 93.04గా ఉంది. ఇందులో 34 సెంచరీలు, 62 అర్ధ సెంచరీలు ఉన్నాయి. వన్డేల్లో అతడి అత్యధిక స్కోరు 264 పరుగులు.

ఈ ఏడాది ఇప్పటివరకు తొమ్మిది వన్డేలు ఆడిన రోహిత్ 379 పరుగులు చేశాడు. 42.11 సగటుతో పరుగులు చేశాడు. అతడి ఖాతాలో ఒక సెంచరీ, ఒక అర్ధ సెంచరీ ఉన్నాయి. అత్యధిక స్కోరు 138. ఈ గణాంకాలు చూస్తే వయసు పెరిగినా తనలోని బ్యాటింగ్ సామర్థ్యం ఏమాత్రం తగ్గలేదని రోహిత్ మరోసారి నిరూపించాడు. 2027 వన్డే ప్రపంచకప్‌కు ఇంకా సమయం ఉండటంతో రోహిత్ తన భవిష్యత్తుపై ఎలాంటి నిర్ణయం తీసుకుంటాడన్నది ఆసక్తికరంగా మారింది. 2027 ప్రపంచకప్‌లో ‘హిట్‌మ్యాన్’ను చూడాలని అభిమానులు కోరుకుంటున్నారు.