రికార్డుల్లో తోపు ఈ టీమిండియా బౌలర్.. బద్దలు కొట్టడం కష్టమే భయ్యో.. ఎవరంటే?

Mohammed Shami Records: టీమ్‌ఇండియా వెటరన్‌ పేసర్‌ మహ్మద్‌ షమీ 36వ పుట్టినరోజు సందర్భంగా అతడి కెరీర్‌లోని అరుదైన రికార్డులు మరోసారి చర్చనీయాంశంగా మారాయి. ముఖ్యంగా వన్డే ప్రపంచకప్‌, వన్డేల్లో షమీ నెలకొల్పిన కొన్ని ఘనతలను భవిష్యత్‌లో మరో భారత బౌలర్‌ అధిగమించడం అంత సులువు కాదనే అభిప్రాయాలు వ్యక్తమవుతున్నాయి.

వన్డేల్లో ఆరు సార్లు ఐదు వికెట్లు..

భారత్‌ తరపున వన్డే ఇన్నింగ్స్‌లో అత్యధికసార్లు ఐదు వికెట్లు తీసిన బౌలర్‌గా షమీ కొనసాగుతున్నాడు. అతడు ఇప్పటివరకు ఆరు సార్లు ఐదు వికెట్ల ప్రదర్శన నమోదు చేశాడు. ఈ జాబితాలో జవగళ్‌ శ్రీనాథ్‌, హర్భజన్‌ సింగ్‌ చెరో మూడు ఐదు వికెట్ల ప్రదర్శనలతో తర్వాతి స్థానాల్లో ఉన్నారు.

షమీ అత్యుత్తమ దశ 2023లో కనిపించింది. ఆ ఏడాది ఒక్క 12 నెలల వ్యవధిలోనే నాలుగు సార్లు ఐదు వికెట్లు పడగొట్టాడు. అందులో న్యూజిలాండ్‌తో జరిగిన ప్రపంచకప్‌ సెమీఫైనల్‌లో అతడి ప్రదర్శన ప్రత్యేకంగా నిలిచింది.

సెమీఫైనల్లో 7 వికెట్లు.. అద్భుత రికార్డు..

2023 వన్డే ప్రపంచకప్‌ సెమీఫైనల్లో న్యూజిలాండ్‌పై షమీ సంచలన బౌలింగ్‌ చేశాడు. ముంబయిలోని వాంఖడే స్టేడియంలో 9.5 ఓవర్లు వేసి 57 పరుగులిచ్చి 7 వికెట్లు పడగొట్టాడు. అతడి ధాటికి న్యూజిలాండ్‌ 327 పరుగులకు ఆలౌటైంది. భారత్‌ 70 పరుగుల తేడాతో విజయం సాధించి ఫైనల్‌కు చేరింది.

ప్రపంచకప్‌ నాకౌట్‌ చరిత్రలో ఒక సెమీఫైనల్‌లో అత్యుత్తమ బౌలింగ్‌ గణాంకాలు షమీ పేరిటే ఉన్నాయి. అంతేకాదు.. ప్రపంచకప్‌ మ్యాచ్‌లో భారత బౌలర్‌ నమోదు చేసిన అత్యుత్తమ బౌలింగ్‌ గణాంకాల రికార్డునూ 7/57తో అతడే సొంతం చేసుకున్నాడు. గతంలో ఈ రికార్డు 2003లో ఇంగ్లాండ్‌పై 6/23తో ఆశిష్‌ నెహ్రా పేరిట ఉండేది.

17 మ్యాచ్‌ల్లోనే 50 వికెట్లు..

వన్డే ప్రపంచకప్‌లలో అత్యంత వేగంగా 50 వికెట్లు పూర్తి చేసిన బౌలర్‌ కూడా షమీయే. కేవలం 17 మ్యాచ్‌ల్లోనే అతడు ఈ మైలురాయిని అందుకున్నాడు. గతంలో ఆస్ట్రేలియా పేసర్‌ మిచెల్‌ స్టార్క్‌ 19 మ్యాచ్‌ల్లో 50 వికెట్లు తీసిన రికార్డును షమీ అధిగమించాడు.

2023 ప్రపంచకప్‌ సెమీఫైనల్లో న్యూజిలాండ్‌తో జరిగిన మ్యాచ్‌లోనే షమీ ఈ ఘనత సాధించాడు. మూడు ప్రపంచకప్‌లలో భారత్‌కు ప్రాతినిధ్యం వహించిన అతడు ఇప్పటివరకు ప్రపంచకప్‌లలో 55 వికెట్లు పడగొట్టి భారత బౌలర్లలో అగ్రస్థానంలో ఉన్నాడు.

షమీ.. ఓ ప్రపంచకప్‌ స్పెషలిస్ట్‌..

2013లో అంతర్జాతీయ క్రికెట్‌లో అడుగుపెట్టిన షమీ.. కొన్నేళ్లుగా భారత పేస్‌ దళంలో కీలక సభ్యుడిగా కొనసాగాడు. కొత్త బంతితో స్వింగ్‌, పాత బంతితో రివర్స్‌ స్వింగ్‌, అద్భుతమైన సీమ్‌ మూవ్‌మెంట్‌తో ప్రత్యర్థి బ్యాటర్లను ఇబ్బంది పెట్టడంలో అతడికి ప్రత్యేక గుర్తింపు ఉంది.

వన్డేల్లో భారత్‌ తరపున వేగంగా 100, 150, 200 వికెట్ల మైలురాళ్లను అందుకున్న బౌలర్‌గానూ షమీ రికార్డుల్లో ఉన్నాడు. 2023 ఐపీఎల్‌లో 28 వికెట్లతో పర్పుల్‌ క్యాప్‌ సైతం దక్కించుకున్నాడు. అందుకే.. షమీ ఖాతాలో ఉన్న ఈ మూడు రికార్డులు భవిష్యత్‌ భారత బౌలర్లకు పెద్ద సవాలుగా మారనున్నాయి.