MS Dhoni: అభిమానుల ఆశ‌లు అడియాశ‌లేనా.? ఈసారి ధోనిని స్టేడియంలో చూడ‌లేమా..

Dhoni: ఐపీఎల్ 2026 సీజ‌న్ దాదాపు సగం పూర్తి అయ్యింది. మ్యాచ్‌లు ర‌స‌వ‌త్త‌రంగా సాగుతున్నాయి. కానీ ఒక్క ధోని అభిమానులు మాత్ర‌మే నిరాశ‌గ ఉన్నారు. ఇప్ప‌టి వ‌ర‌కు ధోని ఈ సిరీస్‌లో ఒక మ్యాచ్ ఆడ‌క‌పోవ‌డమే కార‌ణం. అయితే త్వ‌ర‌లోనే ఆడ‌తాడ‌న్న ఆశ‌లు కూడా అడియాశ‌ల‌య్యేలా ఉన్నాయి.

నిరాశ క‌లిగించే వార్త

ధోని అభిమానులకు మరోసారి నిరాశ కలిగించే వార్త వచ్చింది. ఐపీఎల్ 2026లో ఆయన తిరిగి ఎప్పుడు ఆడతారు అన్నదానిపై అనుమానాలు పెరిగాయి. చెన్నై జట్టు కోచ్ స్టీఫెన్ ఫ్లెమింగ్ ఇచ్చిన తాజా సమాచారం చూస్తే పరిస్థితి ఇంకా క్లిష్టంగా మారింది.

ధోనీకి మరో గాయం షాక్

స్టీఫెన్ ఫ్లెమింగ్ తెలిపిన వివరాల ప్రకారం, ధోనీకి ఉన్న కాలి గాయం పూర్తిగా తగ్గకముందే ప్రాక్టీస్ సమయంలో మళ్లీ తీవ్రమైంది. మొదట ఈ గాయాన్ని చిన్న సమస్యగా భావించారు. కానీ ఇప్పుడు అది మరింత పెరిగి పరిస్థితి కాస్త క్లిష్టంగా మారింది.

ఐపీఎల్ రీ-ఎంట్రీ ఇంకా ఆలస్యం

ధోనీ టోర్నమెంట్ ప్రారంభంలో రెండు వారాలు మిస్ అయిన తర్వాత తిరిగి ఆడతారని అభిమానులు ఆశించారు. కానీ ఇప్పటికే ఒక నెల గడిచిపోయినా ఆయన ఇంకా మైదానంలోకి దిగలేదు. ఈలోగా చెన్నై సూపర్ కింగ్స్ ఇప్పటికే ఎనిమిది మ్యాచ్‌లు ఆడేసింది. అయినా ధోనీ ఒక్క మ్యాచ్ కూడా ఆడలేకపోయారు.

కోచ్ ఫ్లెమింగ్ కీలక వ్యాఖ్యలు

ఫ్లెమింగ్ మాట్లాడుతూ.. “ధోనీ ఆడాలని చాలా ఆసక్తిగా ఉన్నాడు. కానీ ఆయ‌న‌కు అయిన కాలి గాయం చాలా సున్నితమైనది. ఎక్కువ ఒత్తిడి పెడితే గాయం మళ్లీ ముదురుతుంది. అలా జరిగితే మొత్తం టోర్నమెంట్ మిస్ అయ్యే ప్రమాదం ఉంది” అని చెప్పారు. మరో ముఖ్య విషయం ఏమిటంటే, ధోనీ తిరిగి ఆడే నిర్ణయం పూర్తిగా ఆయనదేనని కోచ్ స్పష్టం చేశారు. టీమ్ సపోర్ట్ స్టాఫ్ ఆయన ప్రోగ్రెస్‌ను గమనిస్తూనే ఉందని చెప్పారు.

ప్రాక్టీస్ కొనసాగిస్తున్న ధోనీ

మైదానంలోకి రాకపోయినా, ధోనీ ప్రాక్టీస్ మాత్రం ఆపలేదు. నెట్స్‌లో బ్యాటింగ్ ప్రాక్టీస్ చేస్తూ కనిపిస్తున్నారు. కోచ్‌ల నుంచి వచ్చే బంతులను ఎదుర్కొంటున్నారు. ఫిజియో పర్యవేక్షణలో రన్నింగ్ కూడా చేస్తున్నారు. ఇటీవల ముంబై మ్యాచ్ ముందు వాంఖడే స్టేడియంలో ఆయన వికెట్ కీపింగ్ గ్లోవ్స్ వేసుకుని ప్రాక్టీస్ చేసినట్లు కూడా కనిపించింది.