టీమిండియా వద్దంది.. ఇంగ్లాండ్ రమ్మంది.. కౌంటీ బరిలోకి టీమిండియా స్టాప్ బౌలర్..!

Mukesh Kumar: భారత ఫాస్ట్ బౌలర్ ముకేశ్ కుమార్ ఇంగ్లిష్ దేశవాళీ క్రికెట్ టోర్నమెంట్‌లో అడుగుపెట్టేందుకు రంగం సిద్ధమైంది. కౌంటీ ఛాంపియన్‌షిప్ 2026 సీజన్ ముగింపు దశకు చేరిన సమయంలో నాటింగ్‌హామ్‌షైర్ జట్టు ఆయనతో స్వల్పకాలిక ఒప్పందం కుదుర్చుకుంది.

చివరి రెండు కీలక మ్యాచ్‌లలో ఈ పేసర్ బరిలోకి దిగనున్నారు. అంతర్జాతీయ స్థాయిలో మూడు ఫార్మాట్లలో కలిపి భారత్‌కు 26 మ్యాచ్‌లలో ప్రాతినిధ్యం వహించిన ముకేశ్, మొత్తం 32 వికెట్లు తీశారు. అందులో మూడు టెస్టు మ్యాచ్‌లు కూడా ఉన్నాయి. బీహార్‌కు చెందిన ఈ బౌలర్ ఫస్ట్ క్లాస్ కెరీర్‌లో 21.79 సగటుతో ఏకంగా 233 వికెట్లు పడగొట్టడం విశేషం. ట్రెంట్ బ్రిడ్జ్ కేంద్రంగా నడిచే ఈ క్లబ్‌తో ఒప్పందం చేసుకోవడం ద్వారా, తొలిసారి భారత దేశం వెలుపల ఒక క్లబ్‌కు ఆయన ఆడబోతున్నారు.

భారత దేశవాళీ క్రికెట్‌లో బెంగాల్ (Bengal) జట్టుకు ఆడుతున్న ముకేశ్, ఇండియన్ ప్రీమియర్ లీగ్ (Indian Premier League) పోటీల్లో గత నాలుగు సీజన్లుగా ఢిల్లీ క్యాపిటల్స్ (Delhi Capitals) జట్టులో కొనసాగుతున్నారు. సుదీర్ఘ ఫార్మాట్‌లో 10 సార్లు ఐదు వికెట్ల ప్రదర్శన నమోదు చేసిన ఈ సీమర్, 2024 రంజీ ట్రోఫీ (Ranji Trophy) సమయంలో బిహార్‌పై 50 పరుగులిచ్చి 10 వికెట్లు కూల్చి కెరీర్ బెస్ట్ గణాంకాలు నమోదు చేశారు. టెస్టు క్రికెట్‌లోనూ సౌతాఫ్రికాతో 2024 కేప్‌టౌన్ టెస్టు తొలి ఇన్నింగ్స్‌లో ఒక్క పరుగు కూడా ఇవ్వకుండా 2 వికెట్లు తీసి ప్రత్యర్థిని 55 పరుగులకే కుప్పకూల్చడంలో తనవంతు పాత్ర పోషించారు.

ఇటీవల దులీప్ ట్రోఫీ (Duleep Trophy) ఫైనల్ గెలిచిన ఈస్ట్ జోన్ జట్టులో కీలక పాత్ర పోషించి మంచి ఫామ్‌లో ఉండటం ముకేశ్‌కు కలిసివచ్చింది. నాటింగ్‌హామ్‌షైర్ ప్రధాన కోచ్ పీటర్ మూర్స్ (Peter Moores) ఆయన రాకను స్వాగతిస్తూ, పూర్తి మ్యాచ్ ఫిట్‌నెస్‌తో ఉన్న నాణ్యమైన పేసర్ సీజన్ కీలక సమయంలో జట్టులో చేరడం ఎంతో బలమని పేర్కొన్నారు.

ఇంగ్లండ్ పరిస్థితుల్లో కొత్త జట్టుతో కలవడం మంచి సవాల్ అని, క్లబ్ విజయం కోసం పూర్తిస్థాయిలో శ్రమిస్తానని ముకేశ్ కుమార్ స్పష్టం చేశారు.