IPL 2026 : ముంబైకి సొంత గడ్డపై షాక్.. పంజాబ్ పంజాకు కుప్పకూలిన హార్దిక్ సేన.. వరుసగా 4వ ఓటమి

IPL 2026 : ఐపీఎల్ 2026లో ముంబై ఇండియన్స్ కష్టాలు ముగియడం లేదు. సొంత గడ్డ వాంఖడే స్టేడియంలో పంజాబ్ కింగ్స్‌తో జరిగిన మ్యాచ్‌లో ముంబై ఘోర పరాజయాన్ని చవిచూసింది. క్వింటన్ డికాక్ అద్భుత సెంచరీతో ముంబై భారీ స్కోరు సాధించినప్పటికీ, పంజాబ్ కింగ్స్ బ్యాటర్ల ధాటికి అది ఇసుక తిన్నెలా కరిగిపోయింది. ప్రభసిమ్రాన్ సింగ్, కెప్టెన్ శ్రేయస్ అయ్యర్ మెరుపు ఇన్నింగ్స్‌లతో పంజాబ్ 7 వికెట్ల తేడాతో ఘనవిజయం సాధించి, పాయింట్ల పట్టికలో అగ్రస్థానానికి చేరుకుంది.

టాస్ గెలిచిన పంజాబ్ కెప్టెన్ శ్రేయస్ అయ్యర్ ముందుగా ముంబైని బ్యాటింగ్‌కు ఆహ్వానించాడు. ఆరంభంలోనే అర్ష్‌దీప్ సింగ్ దెబ్బకు రికెల్టన్ (2), సూర్యకుమార్ యాదవ్ (0) పెవిలియన్ చేరారు. అయితే, ఓపెనర్ క్వింటన్ డికాక్ తన పాత ఫామ్‌ను గుర్తుచేస్తూ 60 బంతుల్లో 112 పరుగులు సాధించాడు. నమన్ ధీర్ (50) తో కలిసి సెంచరీ భాగస్వామ్యం నెలకొల్పాడు. ఒక దశలో ముంబై 210 దాటుతుందని అనిపించినా, మిడిల్ ఆర్డర్ విఫలం కావడంతో 20 ఓవర్లలో 195 పరుగులకు పరిమితమైంది. హార్దిక్ పాండ్యా (14), రదర్‌ఫోర్డ్ (1) నిరాశపరిచారు.

196 పరుగుల భారీ లక్ష్యాన్ని పంజాబ్ కింగ్స్ చాలా సులభంగా ఛేదించింది. ఓపెనర్ ప్రియాన్ష్ ఆర్య (15) త్వరగానే అవుట్ అయినా, ప్రభసిమ్రాన్ సింగ్ ఆకాశమే హద్దుగా చెలరేగిపోయాడు. కేవలం 39 బంతుల్లో 80 పరుగులు చేసి అజేయంగా నిలిచాడు. అతనికి కెప్టెన్ శ్రేయస్ అయ్యర్ (35 బంతుల్లో 66) తోడవ్వడంతో ముంబై బౌలర్లు చేతులెత్తేశారు. వీరిద్దరి మధ్య జరిగిన భారీ భాగస్వామ్యం ముంబైని మ్యాచ్ నుంచి పూర్తిగా తప్పించింది. పంజాబ్ మరో 3.3 ఓవర్లు మిగిలి ఉండగానే లక్ష్యాన్ని చేరుకోవడం విశేషం.

ఈ విజయంతో పంజాబ్ కింగ్స్ పాయింట్ల పట్టికలో అగ్రస్థానానికి చేరుకుంది. ఆడిన 5 మ్యాచుల్లో 4 విజయాలు, ఒక మ్యాచ్ వర్షం వల్ల రద్దు కావడంతో మొత్తం 9 పాయింట్లతో అగ్రపథాన నిలిచింది. ఇప్పటివరకు పంజాబ్ ఈ సీజన్‌లో ఒక్క మ్యాచ్ కూడా ఓడిపోలేదు. మరోవైపు ముంబై ఇండియన్స్ కథ పూర్తి భిన్నంగా ఉంది. మొదటి మ్యాచ్ గెలిచిన తర్వాత వరుసగా నాలుగు మ్యాచుల్లో ఓడిపోయి పాయింట్ల పట్టికలో అట్టడుగున నిలిచింది.

ముంబై బౌలింగ్‌లో పదును పూర్తిగా తగ్గిందని ఈ మ్యాచ్ నిరూపించింది. జస్ప్రీత్ బుమ్రా, దీపక్ చాహర్, హార్దిక్ పాండ్యా వంటి ప్రధాన బౌలర్లు వికెట్లు తీయలేకపోయారు. గజన్‌ఫర్ 2 వికెట్లు, షార్దూల్ ఠాకూర్ 1 వికెట్ తీసినప్పటికీ పంజాబ్ పరుగుల ప్రవాహాన్ని ఆపలేకపోయారు. ఫీల్డింగ్‌లో కూడా ముంబై ఆటగాళ్లు తడబడటం పంజాబ్‌కు కలిసొచ్చింది.