IPL: ఐపీఎల్‌లో అత్యంత వ‌య‌సున్న ఆట‌గాళ్లే వీళ్లే.. 43 ఏళ్ల‌లోనూ మ్యాజిక్

IPL: సాధార‌ణంగా ఐపీఎల్ అంటే యువ ఆటగాళ్ల హవా ఎక్కువగా క‌నిపిస్తుంది. ఫిట్‌నెస్‌, వేగం, అగ్రెసివ్ ఆట ఇక్కడ చాలా ముఖ్యం. అయితే వయసు కేవలం సంఖ్య మాత్రమే అని నిరూపించిన కొంతమంది సీనియర్ క్రికెటర్లు కూడా ఐపీఎల్ చరిత్రలో ప్రత్యేక గుర్తింపు సంపాదించారు. 40 ఏళ్లు దాటిన తర్వాత కూడా అద్భుత ప్రదర్శనలతో అభిమానులను అలరించారు.

బ్రాడ్ హాగ్.. IPLలో అత్యంత వయసైన ఆటగాడు

బ్రాడ్ హాగ్ ఐపీఎల్ చరిత్రలో అత్యంత ఎక్కువ వయసులో మ్యాచ్ ఆడిన క్రికెటర్‌గా నిలిచాడు. ఆస్ట్రేలియాకు చెందిన ఈ మాజీ స్పిన్నర్ 45 సంవత్సరాలు 92 రోజుల వయసులో తన చివరి ఐపీఎల్ మ్యాచ్ ఆడాడు. అతను కోల్‌క‌తా నైట్ రైడ‌ర్స్ తరఫున 2016 సీజన్‌లో చివరి మ్యాచ్ ఆడాడు. అంతకుముందు రాజ‌స్థాన్ రాయ‌ల్స్ జట్టుకూ ప్రాతినిధ్యం వహించాడు. మొత్తం 21 మ్యాచ్‌ల్లో 23 వికెట్లు తీసి తన స్పిన్ మాయ చూపించాడు. ముఖ్యంగా అతని ఫిట్‌నెస్‌, ఎనర్జీ యువ ఆటగాళ్లకే ప్రేరణగా నిలిచాయి.

ప్ర‌వీణ్ తాంబే కథ ఎంతో ప్రత్యేకం

ప్ర‌వీణ్ తాంబే పేరు ఐపీఎల్ చరిత్రలో ప్రత్యేకంగా నిలిచిపోతుంది. ఎందుకంటే ఆయన 41 ఏళ్ల వయసులో ఐపీఎల్‌లో అరంగేట్రం చేశాడు. ఇది ఇప్పటికీ అరుదైన రికార్డుగా చెప్పుకుంటారు. రాజస్థాన్ రాయల్స్‌, గుజ‌రాత్ ల‌య‌న్స్ జట్లకు ఆడిన ఈ లెగ్ స్పిన్నర్ 44 సంవత్సరాలు 219 రోజుల వయసులో తన చివరి మ్యాచ్ ఆడాడు. మొత్తం 33 మ్యాచ్‌ల్లో 28 వికెట్లు పడగొట్టాడు. 2014లో కోల్‌కతాపై సాధించిన హ్యాట్రిక్ ఇప్పటికీ అభిమానులకు గుర్తుంది. అతని జీవిత కథ ఆధారంగా వచ్చిన కౌన్ ప్రవీణ్ తాంబే సినిమా కూడా మంచి ఆదరణ పొందింది. ఆలస్యంగా అవకాశాలు వచ్చినా పట్టుదలతో ఎలా ఎదగవచ్చో తాంబే నిరూపించాడు.

43 ఏళ్ల వయసులోనూ ధోనీ క్రేజ్ తగ్గలేదు

మ‌హీంద్ర సింగ్ ధోని ప్రస్తుతం ఐపీఎల్‌లో కొనసాగుతున్న అత్యంత వయసైన ఆటగాడు. 43 ఏళ్ల వయసులో కూడా చెన్నై జట్టుకు కీలక ఆటగాడిగా కొనసాగుతున్నాడు. 2025 సీజన్‌లో కెప్టెన్‌గా జట్టును నడిపించిన ధోనీ పలు రికార్డులు కూడా సృష్టించాడు. ఐపీఎల్ చరిత్రలో అత్యంత వయసైన కెప్టెన్‌గా నిలిచాడు. అంతేకాదు, ఎక్కువ వయసులో “ప్లేయర్ ఆఫ్ ది మ్యాచ్” అవార్డు అందుకున్న ఆటగాడిగానూ రికార్డు సాధించాడు. అతని ఫిట్‌నెస్‌, కూల్ మైండ్‌, మ్యాచ్ ఫినిషింగ్ స్టైల్ ఇప్పటికీ అభిమానులను ఆకట్టుకుంటూనే ఉన్నాయి. అయితే ఈ సీజ‌న్‌కు మాత్రం ధోని దూరంగా ఉన్నారు.

మురళీధరన్‌, ఇమ్రాన్ తాహిర్ కూడా ప్రత్యేకమే

ముత్త‌య్య ముర‌ళీధ‌ర‌న్ కూడా 42 ఏళ్ల వయసు వరకు ఐపీఎల్‌లో ఆడాడు. రాయ‌ల్ ఛాలెంజ‌ర్స్ బెంగ‌ళూరు, చెన్నై సూప‌ర్ కింగ్స్‌, కొచ్చి టస్కర్స్ కేరళ జట్లకు ప్రాతినిధ్యం వహించాడు. తన అనుభవంతో ఎన్నో కీలక వికెట్లు సాధించాడు. అలాగే ఇమ్రాన్ తాహిర్ కూడా 42 ఏళ్ల వరకు ఐపీఎల్‌లో తన స్పిన్ మాయ కొనసాగించాడు. ముఖ్యంగా 2019 సీజన్‌లో అద్భుత ప్రదర్శనతో 26 వికెట్లు తీసి అందరినీ ఆశ్చర్యపరిచాడు. ఈ ఆటగాళ్లు వయసు పెరిగినా క్రీడపై ఉన్న అంకితభావం, క్రమశిక్షణ ఉంటే ఎంతకాలమైనా అత్యున్నత స్థాయిలో రాణించవచ్చని నిరూపించారు.