Pat Cummins : టీ20ల్లో 200 వికెట్ల మైలురాయి.. ఐపీఎల్‌లో నంబర్ 1 కెప్టెన్‌గా రికార్డ్ సృష్టించిన ప్యాట్ కమిన్స్

Pat Cummins : సన్‌రైజర్స్ హైదరాబాద్ కెప్టెన్ ప్యాట్ కమిన్స్ ఐపీఎల్ 2026లో తన అద్భుతమైన ఫామ్‌ను కొనసాగిస్తున్నాడు. కేవలం కెప్టెన్సీలోనే కాదు, బౌలింగ్‌లోనూ జట్టును ముందుండి నడిపిస్తున్నాడు. తాజాగా చెన్నై సూపర్ కింగ్స్‌తో జరిగిన హై-వోల్టేజ్ మ్యాచ్‌లో కమిన్స్ నిప్పులు చెరిగే బంతులతో చెన్నై బ్యాటర్లను బెంబేలెత్తించాడు. 4 ఓవర్లలో కేవలం 28 పరుగులు మాత్రమే ఇచ్చి 3 కీలక వికెట్లు పడగొట్టాడు. ఈ క్రమంలోనే తన కెరీర్‌లో రెండు అరుదైన రికార్డులను తన ఖాతాలో వేసుకున్నాడు.

చెన్నై కెప్టెన్ రుతురాజ్ గైక్వాడ్‌ను అవుట్ చేయగానే, ప్యాట్ కమిన్స్ టీ20 క్రికెట్‌లో 200 వికెట్ల అరుదైన మైలురాయిని చేరుకున్నాడు. ఇప్పటివరకు 177 మ్యాచ్‌లు ఆడిన కమిన్స్, దాదాపు 8.2 ఎకానమీతో ఈ ఘనత సాధించాడు. తన కెరీర్‌లో మూడు సార్లు 4 వికెట్ల హాల్‌ను కూడా నమోదు చేశాడు. ఒక ఫాస్ట్ బౌలర్‌గా అంతర్జాతీయ క్రికెట్‌తో పాటు వివిధ లీగ్‌లలో రాణిస్తూ ఈ స్థాయికి చేరుకోవడం అతని నిలకడకు నిదర్శనం.

ఐపీఎల్ చరిత్రలో ఒక ఫాస్ట్ బౌలింగ్ కెప్టెన్‌గా అత్యధిక వికెట్లు తీసిన ఆటగాడిగా కమిన్స్ చరిత్ర సృష్టించాడు. కెప్టెన్ హోదాలో ఇప్పటివరకు 41 వికెట్లు తీసి, టీమిండియా స్టార్ హార్దిక్ పాండ్యా (40 వికెట్లు)ను వెనక్కి నెట్టేశాడు. ఓవరాల్‌గా చూస్తే స్పిన్ దిగ్గజం షేన్ వార్న్ (57 వికెట్లు) అగ్రస్థానంలో ఉండగా, ప్రస్తుతం ఆడుతున్న బౌలర్లలో మాత్రం కమిన్సే టాప్.

ఈ సీజన్‌లో కమిన్స్ వేసిన అత్యుత్తమ స్పెల్ ఇదే కావడం విశేషం. చెన్నై బ్యాటర్లు సంజూ శామ్సన్, కార్తీక్ శర్మ, రుతురాజ్ గైక్వాడ్ వంటి కీలక వికెట్లను తీసి చెన్నైని 180 పరుగులకే కట్టడి చేయడంలో ప్రధాన పాత్ర పోషించాడు. ఈ సీజన్‌లో ఇప్పటివరకు 6 మ్యాచ్‌లు ఆడిన ఆయన 8.1 ఎకానమీతో 8 వికెట్లు పడగొట్టాడు. పిచ్ స్లోగా ఉన్నప్పటికీ, తన వేరియేషన్లతో బ్యాటర్లను బోల్తా కొట్టించడంలో కమిన్స్ సక్సెస్ అయ్యాడు.

చెన్నైపై కేవలం కమిన్స్ మాత్రమే కాకుండా, మిగిలిన బౌలర్లు కూడా చక్కగా సహకరించారు. ఇషాన్ మలింగ 4 ఓవర్లలో 26 పరుగులు ఇచ్చి ఒక వికెట్ తీయగా.. సాకిబ్ హుస్సేన్ 2 వికెట్లు, ప్రఫుల్ హింగే ఒక వికెట్ పడగొట్టారు. బౌలర్లందరూ కట్టుదిట్టంగా బౌలింగ్ చేయడంతో చెన్నై భారీ స్కోరు సాధించలేకపోయింది. కమిన్స్ నాయకత్వంలో హైదరాబాద్ బౌలింగ్ విభాగం ఈ సీజన్‌లో అత్యంత ప్రమాదకరంగా కనిపిస్తోంది.