ఫాస్ట్ బౌలింగ్‌లో టీమిండియాకు ఢోకా లేదు.. పోటీ ఎంతున్నా నాకు నో ప్రాబ్లం..!

2027 ODI World Cup: భారత క్రికెట్ జట్టు (Team India) పేస్ విభాగంలో ప్రపంచకప్ స్థానాల కోసం పోటీ ఆసక్తికరంగా మారుతోంది. 2027 వన్డే ప్రపంచకప్‌కు ఏడాది మాత్రమే ఉండటంతో సెలెక్టర్లకు వేగ బౌలర్లలో ఎంపిక సవాల్‌గా మారనుంది. ఈ పోటీలో ఉన్న ప్రసిద్ధ్ కృష్ణ (Prasidh Krishna) మాత్రం పరిస్థితిని సానుకూలంగా చూస్తున్నాడు. జట్టులో ప్రతి ఆటగాడికి తన బాధ్యతపై స్పష్టత ఉండటం, ఒకరితో ఒకరు మాట్లాడుకోవడం వల్ల తన బౌలింగ్ మెరుగుపడుతోందని చెప్పాడు. ఈ ఏడాది వన్డేల్లో అతడి గణాంకాలు కూడా ఆకట్టుకుంటున్నాయి. ఎనిమిది మ్యాచ్‌ల్లో 15 వికెట్లు తీశాడు. 26.53 సగటుతో బౌలింగ్ చేసిన అతడికి ఒకసారి ఐదు వికెట్ల ప్రదర్శన కూడా ఉంది. ఈ ఏడాది వన్డేల్లో భారత్ తరఫున అత్యధిక వికెట్లు తీసిన బౌలర్‌గా ప్రసిద్ధ్ కొనసాగుతున్నాడు.

వెస్టిండీస్‌తో జరిగిన తొలి వన్డేలోనూ ప్రసిద్ధ్ తన పాత్రను సమర్థంగా పోషించాడు. పది ఓవర్లలో 60 పరుగులు ఇచ్చి రెండు వికెట్లు పడగొట్టాడు. కైసీ కార్తీ, రోస్టన్ చేజ్ అతడి బౌలింగ్‌లో పెవిలియన్ చేరారు.

2021లో వన్డే అరంగేట్రం చేసిన ప్రసిద్ధ్ ఇప్పటివరకు 29 మ్యాచ్‌లు ఆడి 52 వికెట్లు సాధించాడు. జస్‌ప్రీత్ బుమ్రా (Jasprit Bumrah) గైర్హాజరీలో వన్డే పేస్ విభాగంలో అతడికి కీలక బాధ్యత లభిస్తోంది.

గుజరాత్ టైటాన్స్ (Gujarat Titans)లో గర్నూర్ బ్రార్‌తో కలిసి రెండేళ్లు ఆడటం కూడా ఉపయోగపడుతోందని ప్రసిద్ధ్ చెప్పాడు. ఇద్దరికీ ఒకరి బలాలు, బలహీనతలపై అవగాహన ఉండటంతో మ్యాచ్‌ల సమయంలో పరస్పరం మాట్లాడుకుంటూ సహాయం చేసుకుంటున్నామని వివరించాడు.

ప్రపంచకప్ బెర్త్ కోసం బుమ్రాతో పాటు మహ్మద్ సిరాజ్ (Mohammed Siraj), అర్ష్‌దీప్ సింగ్ (Arshdeep Singh), గర్నూర్ బ్రార్, హార్దిక్ పాండ్యా (Hardik Pandya), నితీశ్ కుమార్ రెడ్డి (Nitish Kumar Reddy), హర్షిత్ రాణా (Harshit Rana) వంటి పేర్లు కూడా పోటీలో ఉన్నాయి. ఈ పోటీ జట్టుకు మేలు చేస్తుందని ప్రసిద్ధ్ అభిప్రాయపడ్డాడు. నెట్స్‌లో ఒకరినొకరు మెరుగ్గా రాణించేందుకు ప్రోత్సహించుకోవడం వల్ల ఫాస్ట్ బౌలింగ్ విభాగం బలంగా ఉందని చెప్పాడు.

వెస్టిండీస్‌పై విరాట్ కోహ్లీ (Virat Kohli) 88 బంతుల్లో 139 పరుగులతో అజేయ శతకం సాధించడంపైనా ప్రసిద్ధ్ స్పందించాడు. అతడి బ్యాటింగ్ చూసి తాము ఆశ్చర్యపోయామని, కోహ్లీ ఇలాంటి ఇన్నింగ్స్ ఆడటం ఎంతో ఆనందంగా అనిపించిందని చెప్పాడు.

ఆ మ్యాచ్‌లో భారత్ 298 పరుగుల లక్ష్యాన్ని 48.3 ఓవర్లలో రెండు వికెట్లు మాత్రమే కోల్పోయి ఛేదించింది. కోహ్లీ, శుభ్‌మన్ గిల్ (Shubman Gill) కలిసి 151 పరుగుల భాగస్వామ్యం నెలకొల్పారు. గిల్ 110 పరుగులు చేయగా, కోహ్లీ 139తో అజేయంగా నిలిచాడు.