లార్డ్స్‌లో ‘హిట్‌మ్యాన్’ విశ్వరూపం.. సచిన్, కోహ్లీకి సాధ్యంకాని అరుదైన రికార్డులో రోహిత్!

Rohit Sharma Lords Century: విమర్శలు వెల్లువెత్తిన వేళ, కెరీర్ ముగిసిపోయిందన్న అనుమానాలు వ్యక్తమైన తరుణంలో.. భారత మాజీ కెప్టెన్ రోహిత్ శర్మ లార్డ్స్ వేదికగా సింహంలా గర్జించాడు. ఇంగ్లాండ్‌తో జరిగిన ఉత్కంఠభరిత మూడో వన్డేలో ఆకాశమే హద్దుగా చెలరేగి, సచిన్ టెండూల్కర్, విరాట్ కోహ్లీ వంటి దిగ్గజాలకు సైతం సాధ్యంకాని ఒక అద్వితీయమైన చారిత్రాత్మక రికార్డును తన ఖాతాలో వేసుకున్నాడు.

విమర్శకుల నోళ్లు మూయించిన రికార్డు శతకం..

గత కొన్ని మ్యాచ్‌లుగా సరైన ఫామ్ లేక ఇబ్బంది పడుతున్న రోహిత్ శర్మపై విమర్శకులు తీవ్రస్థాయిలో విరుచుకుపడ్డారు. వన్డే జట్టులో అతని స్థానంపైనే ప్రశ్నలు తలెత్తాయి. ఇంగ్లాండ్ సిరీస్ ముగిసిన తర్వాత అతడిని జట్టు నుంచి తొలగిస్తారనే ఊహాగానాలు కూడా బలంగా వినిపించాయి. వాటన్నింటికీ తనదైన శైలిలో సమాధానమిచ్చాడు ఈ ముప్పై తొమ్మిదేళ్ల దిగ్గజ బ్యాటర్. 388 పరుగుల భారీ లక్ష్య ఛేదనలో ఒత్తిడిని చిత్తు చేస్తూ, కేవలం 84 బంతుల్లోనే తన కెరీర్‌లో 34వ వన్డే సెంచరీని నమోదు చేసి విమర్శకుల నోళ్లు మూయించాడు.

లార్డ్స్ మైదానంలో తొలి భారత ఆటగాడిగా..

క్రికెట్ మక్కాగా భావించే చారిత్రాత్మక లార్డ్స్ మైదానంలో ఇప్పటివరకు ఎంతో మంది భారతీయ మహామహులు టెస్టుల్లో శతకాలు బాదారు కానీ, వన్డే ఫార్మాట్‌లో మాత్రం ఎవరికీ సెంచరీ సాధ్యం కాలేదు. సచిన్ టెండూల్కర్, విరాట్ కోహ్లీ, సౌరవ్ గంగూలీ వంటి దిగ్గజాల వల్ల కాని ఈ ఘనతను రోహిత్ శర్మ సాధించి చూపించాడు. లార్డ్స్ వన్డే పిచ్‌పై సెంచరీ సాధించిన మొట్టమొదటి భారతీయ బ్యాటర్‌గా రోహిత్ సరికొత్త చరిత్ర సృష్టించాడు. ఇంతకుముందు 2004లో సౌరవ్ గంగూలీ చేసిన 90 పరుగులే ఇక్కడ భారతీయుడి అత్యధిక వన్డే స్కోరుగా ఉండేది. ఆ ఇరవై ఏళ్ల రికార్డును హిట్‌మ్యాన్ బద్దలు కొట్టాడు.

రికార్డుల వేటలో దూకుడు..

ఈ ఇన్నింగ్స్‌తో రోహిత్ కేవలం సెంచరీ మాత్రమే చేయలేదు, ఎన్నో అరుదైన మైలురాళ్లను అధిగమించాడు. వన్డే క్రికెట్ చరిత్రలో లార్డ్స్ మైదానంలో శతకం బాదిన అత్యంత వయస్కుడైన ఆటగాడిగా (39 ఏళ్ల 80 రోజులు) రోహిత్ నిలిచాడు. ఆ రికార్డుతో శ్రీలంక దిగ్గజం కుమార్ సంగక్కరను పక్కకు నెట్టేశాడు. అంతేకాకుండా, విదేశీ గడ్డపై ఒకే దేశంలో అత్యధిక వన్డే సెంచరీలు చేసిన ఆటగాడిగా సచిన్ టెండూల్కర్ (యూఏఈలో 7) రికార్డును దాటి, ఇంగ్లాండ్ గడ్డపై 8వ సెంచరీతో అగ్రస్థానానికి చేరుకున్నాడు. భారత్ తరఫున అంతర్జాతీయ క్రికెట్‌లో అత్యధిక వయసులో సెంచరీ చేసిన రెండో ఆటగాడిగా కూడా నిలిచాడు.

ఇంగ్లాండ్‌తో వీడని బంధం..

ఇంగ్లాండ్ గడ్డపై రోహిత్ శర్మకు ఉన్న రికార్డులు చూస్తే మైండ్ బ్లాక్ అవ్వాల్సిందే. అక్కడ ఆడిన 30 వన్డేల్లో 66.16 సగటుతో ఏకంగా 1588 పరుగులు సాధించాడు. అందులో 8 అద్భుత శతకాలు ఉన్నాయి. ఇంగ్లాండ్‌లో అత్యధిక వన్డే పరుగులు చేసిన ఏకైక విదేశీ బ్యాటర్ రోహిత్ శర్మ మాత్రమే కావడం విశేషం.