వైభవ్ కంటే అతనే తోపు.. ఓపెనర్ గా ఫస్ట్ ఛాయిస్: అజింక్య రహానే

India vs Afghanistan T20: భారత టీ20 జట్టు ఓపెనింగ్ స్థానంపై మాజీ బ్యాటర్ అజింక్య రహానే తన యూట్యూబ్ ఛానెల్ వేదికగా కీలక విశ్లేషణ చేశారు. యువ సంచలనం వైభవ్ సూర్యవంశీ స్థానంలో సంజు శాంసన్‌ను ఇన్నింగ్స్ ఆరంభించేందుకు ఎంపిక చేయాలని ఆయన యాజమాన్యానికి సూచించారు.

వరల్డ్ కప్ హీరోకు మరో అవకాశం..

భారత్ గెలిచిన టీ20 వరల్డ్ కప్‌లో సంజు శాంసన్ 'ప్లేయర్ ఆఫ్ ది సిరీస్' అవార్డు గెలుచుకుని కీలక పాత్ర పోషించాడని రహానే గుర్తుచేశారు. రెండు మూడు ఇన్నింగ్స్‌లలో విఫలమైనంత మాత్రాన శాంసన్‌ను పక్కన పెట్టడం సరికాదని, మ్యాచ్ విన్నరైన అతనికి మరో అవకాశం కల్పించాలని స్పష్టం చేశారు.

టాప్ ఆర్డర్ కూర్పుపై స్పష్టత..

వరల్డ్ కప్ విజయంలో భాగస్వాములైన సంజు శాంసన్, అభిషేక్ శర్మ, ఇషాన్ కిషన్‌లతో కూడిన టాప్-3 స్థానాలనే జట్టులో కొనసాగించాలని రహానే పేర్కొన్నారు. ప్రస్తుతం ఉన్న పరిస్థితుల్లో ఈ ముగ్గురి ప్రదర్శనే భారత బ్యాటింగ్‌కు బలమైన పునాదిగా నిలుస్తుందని ఆయన అభిప్రాయపడ్డారు.

యువ సంచలనం వైభవ్ భవిష్యత్తు..

ఇటీవల ఇంగ్లండ్‌తో జరిగిన అరంగేట్రం సిరీస్‌లో 14, 13, 15 పరుగులతో తడబడిన వైభవ్ సూర్యవంశీ, ఆ తర్వాత జింబాబ్వే సిరీస్‌లో 3 మ్యాచ్‌లలో 151 పరుగులు చేసి 'ప్లేయర్ ఆఫ్ ది సిరీస్' సాధించాడు. అయితే వైభవ్‌కు భవిష్యత్తులో పుష్కలంగా అవకాశాలు వస్తాయని, ప్రస్తుతానికి శాంసన్‌కే ప్రాధాన్యం ఇవ్వాలని రహానే పేర్కొన్నారు.

అఫ్గానిస్థాన్ సిరీస్‌తో రీఎంట్రీ..

తాజాగా అఫ్గానిస్థాన్‌తో జరగనున్న టీ20 సిరీస్‌కు సంజు శాంసన్‌ను భారత జట్టులోకి తిరిగి ఎంపిక చేయడంపై రహానే హర్షం వ్యక్తం చేశారు. రాబోయే సిరీస్‌లో సంజు పునరాగమనం జట్టు బ్యాటింగ్ లైనప్‌కు మరింత బలాన్ని చేకూరుస్తుందని వివరించారు.