Cricket: క్రికెట్ ప్ర‌పంచంలో షాకింగ్ ఘ‌ట‌న‌.. మ‌హిళ‌లు స్నానం చేస్తుండా వీడియో రికార్డ్ చేస్తూ ప‌ట్ట‌బ‌డ్డ క్రికెట‌ర్లు

Cricket: ఇది నిజంగా క్రీడా ప్రపంచాన్ని షాక్‌కు గురి చేసిన ఘటన. ఆటగాళ్లు మైదానంలో ప్రతిభ చూపాల్సిన సమయంలో ఇలా అసభ్యకరంగా ప్రవర్తించడం తీవ్ర విమర్శలకు దారి తీసింది. ఇంత‌కీ ఏం జ‌రిగింది.? ఈ దుశ్చ‌ర్య‌కు పాల్ప‌డ్డది ఎవ‌రో ఇప్పుడు తెలుసుకుందాం.

మహిళల వీడియోలు రికార్డ్ చేస్తూ పట్టుబడ్డ యువ క్రికెటర్లు

శ్రీలంకలోని నరాహెన్‌పిట ప్రాంతంలో ఉన్న ఒక హోటల్‌లో ఈ సంఘటన జరిగింది. శ్రీలంక అండర్-19 జట్టుకు చెందిన ఇద్దరు క్రికెటర్లు, మహిళలు స్నానం చేస్తున్న సమయంలో దొంగచాటుగా వీడియోలు తీస్తూ పట్టుబడ్డారు. హోటల్‌లో ఒక ప్రొఫెషనల్ కాన్ఫరెన్స్ కోసం వచ్చిన పలువురు మహిళా డాక్టర్లు అక్కడే బస చేశారు.

బాత్రూమ్‌లో రంధ్రాల ద్వారా వీడియోలు

బాధిత మహిళలు ఇచ్చిన ఫిర్యాదు ప్రకారం, బాత్రూమ్‌లో చిన్న రంధ్రాలు, ఓపెన్ స్పేస్‌లను ఉపయోగించి ఈ యువ ఆటగాళ్లు మొబైల్ ఫోన్లతో వీడియోలు రికార్డ్ చేశారు. ఈ విషయం బయటపడడంతో వెంటనే పోలీసులకు సమాచారం అందింది. పోలీసులు కేసు నమోదు చేసి దర్యాప్తు ప్రారంభించారు.

అరెస్ట్, బెయిల్ – తదుపరి విచారణ

ఈ ఇద్దరు ఆటగాళ్లను పోలీసులు అరెస్ట్ చేసి మేజిస్ట్రేట్ కోర్టులో హాజరుపరిచారు. కోర్టు వారికి ఒక్కొక్కరికి 5 లక్షల శ్రీలంక రూపాయల వ్యక్తిగత బెయిల్ మంజూరు చేసింది. ఈ కేసుకు సంబంధించిన తదుపరి విచారణ మే 25న జరగనుంది. అలాగే, ఈ వీడియోలు ఎక్కడైనా ఇంటర్నెట్‌లో షేర్ చేశారా లేదా అన్న కోణంలో కూడా పోలీసులు విచారణ చేస్తున్నారు. వారు కొంతమంది పురుషుల వీడియోలు కూడా రికార్డ్ చేసినట్లు తెలుస్తోంది.

శ్రీలంక క్రికెట్‌లో వరుస వివాదాలు

ఇటీవల కాలంలో శ్రీలంక క్రికెట్‌పై వివాదాలు తగ్గడం లేదు. ఇటీవలే క్రికెట్ బోర్డు మాజీ అధ్యక్షుడు శమ్మీ సిల్వా సహా పలువురు అధికారులు రాజీనామా చేశారు. ప్రస్తుతం బోర్డు వ్యవహారాలు కేంద్ర ప్రభుత్వం పర్యవేక్షణలో ఉన్నాయి. 9 సభ్యుల ట్రాన్స్‌ఫార్మేషన్ కమిటీని ఏర్పాటు చేసి, మాజీ క్రికెటర్ కుమార సంగక్కరను కూడా అందులో భాగం చేశారు.

ఇదే కాకుండా, గతంలో కూడా ఇలాంటి ఘటనలు చోటుచేసుకున్నాయి. 2022 టీ20 వరల్డ్ కప్ సమయంలో ఆల్‌రౌండర్ దనుష్క గుణతిలకపై అత్యాచార ఆరోపణలు వచ్చాయి. అలాగే మాజీ ఆటగాడు తిలకరత్నే దిల్షాన్ కూడా లైంగిక వేధింపుల ఆరోపణల్లో ఇరుక్కొన్నారు.