Shreyas Iyer: లక్ష్మణ్‌ సర్ మీరు సూపర్.. మీవల్లే ఇదంతా.. శ్రేయస్ అయ్యర్ ఎమోషనల్!

Shreyas Iyer: శ్రేయస్‌ అయ్యర్‌ కెప్టెన్‌గా బాధ్యతలు చేపట్టాక వరుసగా ఐర్లాండ్, ఇంగ్లండ్ సిరీస్‌లను టీమిండియా కోల్పోయింది. హెడ్ కోచ్ గౌతమ్‌ గంభీర్‌తో పాటు సంజు శాంసన్, అక్షర్ పటేల్, అర్ష్‌దీప్‌ సింగ్, హర్షిత్ రాణా, వరుణ్ చక్రవర్తి అందుబాటులో లేకపోయినా.. జింబాబ్వేతో మూడు టీ20ల సిరీస్‌ను భారత్ క్లీన్‌స్వీప్ చేసింది. దీంతో ఎట్టకేలకు సర్పంచ్ సాబ్ సిరీస్‌ విజయం అందుకొన్నాడు. తాత్కాలిక కోచ్ వీవీఎస్‌ లక్ష్మణ్ మార్గదర్శకంలో శ్రేయస్‌ సేన అద్భుతంగా రాణించింది. ఈ సందర్భంగా లక్ష్మణ్‌కు సర్పంచ్ సాబ్ ప్రత్యేకంగా కృతజ్ఞతలు తెలిపాడు. బీసీసీఐ విడుదల చేసిన డ్రెస్సింగ్‌రూమ్ వీడియోలో శ్రేయస్‌ మాట్లాడుతూ.. లక్ష్మణ్ సర్ ఇచ్చిన ప్రోత్సాహం, మార్గదర్శకత్వమే జట్టు విజయానికి కీలక కారణమని పేర్కొన్నాడు.

జింబాబ్వేతో ఆదివారం జరిగిన మూడో టీ20లో 35 పరుగుల తేడాతో విజయం సాధించిన భారత్.. సిరీస్‌ను 3-0తో కైవసం చేసుకుంది. ఈ సిరీస్‌లో కీలక ఆటగాళ్లు లేకపోయినా.. యువ ఆటగాళ్లతో కూడిన భారత జట్టు అన్ని విభాగాల్లో ఆధిపత్యం చెలాయించింది. జింబాబ్వేకు ఏమాత్రం అవకాశం ఇవ్వకుండా వరుసగా మూడు మ్యాచ్‌లు గెలిచి సత్తా చాటింది. సిరీస్ పూర్తయిన సందర్భంగా డ్రెస్సింగ్‌రూమ్‌లో ఆటగాళ్లను ఉద్దేశించి వీవీఎస్ లక్ష్మణ్ మాట్లాడుతూ.. శ్రేయస్ అయ్యర్ ప్రత్యేక అభినందనలకు అర్హుడని చెప్పాడు. 'ఈ విజయాలకు శ్రేయస్ పూర్తి అర్హుడు. ఇంగ్లండ్ పర్యటనలో కెప్టెన్‌గా కఠిన పరిస్థితులను ఎదుర్కొన్నప్పటికీ.. ఈ సిరీస్‌కు జట్టుతో చేరిన తొలి రోజు నుంచే అతడు ఎంతో ఆత్మవిశ్వాసంతో కనిపించాడు. కొత్త ఆటగాళ్లతో కూడిన జట్టును అద్భుతంగా నడిపిస్తూ ప్రతి ఒక్కరినీ ప్రోత్సహించాడు. ఈ సిరీస్ విజయానికి శ్రేయస్ నాయకత్వం ప్రధాన కారణం' అని లక్ష్మణ్ ప్రశంసించాడు.

కోచ్ లక్ష్మణ్ మాటలకు కెప్టెన్ శ్రేయస్ అయ్యర్ కూడా స్పందిస్తూ ప్రత్యేకంగా ధన్యవాదాలు తెలిపాడు. 'ఈ సిరీస్‌లో క్యాచ్‌లు వదిలేయడం మినహా మిగతా అన్ని విభాగాల్లో మేము బాగా ఆడాం. దాదాపు తప్పుల్లేమీ చేయలేదు. ఆటగాళ్లతో పాటు సపోర్ట్ స్టాఫ్ కూడా అద్భుతంగా పనిచేశారు. ముఖ్యంగా వీవీఎస్ సర్ ప్రతి రోజు మాకు ఇచ్చిన ప్రేరణ, చెప్పిన సూచనలు మైదానంలో ఎంతో ఉపయోగపడ్డాయి. మీరు చెప్పిన ప్రతి మాటతో మేము అనుసంధానమయ్యాం. అందుకు మీకు హృదయపూర్వక ధన్యవాదాలు' అని శ్రేయస్ ఎమోషనల్ అయ్యాడు.

రెగ్యులర్ హెడ్ కోచ్ గౌతమ్ గంభీర్ విశ్రాంతి తీసుకోవడంతో జింబాబ్వే సిరీస్‌కు వీవీఎస్ లక్ష్మణ్ తాత్కాలిక హెడ్ కోచ్‌గా బాధ్యతలు నిర్వహించాడు. బెంగళూరులోని బీసీసీఐ సెంటర్ ఆఫ్ ఎక్సలెన్స్ అధిపతిగా ఉన్న లక్ష్మణ్.. అవసరమైన సందర్భాల్లో భారత జట్టుకు తాత్కాలిక కోచ్‌గా సేవలందిస్తుంటాడు. జింబాబ్వే పర్యటనలో యువ ఆటగాళ్లను సమర్థంగా నడిపించిన లక్ష్మణ్ మార్గదర్శకత్వంలో భారత్ సిరీస్‌ను క్లీన్‌స్వీప్ చేసి విజయవంతంగా ముగించింది. లక్ష్మణ్ మార్గదర్శకత్వంపై ప్రశంసల వర్షం కురుస్తోంది.