Shreyas Iyer: కళ్లు చెదిరే క్యాచ్ పట్టిన శ్రేయస్ అయ్యర్.. నోరెళ్లబెట్టి చూసి సూర్యకుమార్, రోహిత్

Shreyas Iyer: ఐపీఎల్ 2026లో భాగంగా ముంబై ఇండియన్స్, పంజాబ్ కింగ్స్ మధ్య జరిగిన పోరులో ఒక అద్భుత దృశ్యం ఆవిష్కృతమైంది. పంజాబ్ కెప్టెన్ శ్రేయస్ అయ్యర్ బౌండరీ లైన్ దగ్గర చేసిన విన్యాసం చూసి క్రికెట్ ప్రపంచం నోరెళ్లబెట్టింది. ముంబై డగౌట్ ముందే, రోహిత్ శర్మ, సూర్యకుమార్ యాదవ్ కళ్ల ముందే శ్రేయస్ ఒక అసాధ్యమైన క్యాచ్‌ను సుసాధ్యం చేసి మ్యాచ్ స్వరూపాన్నే మార్చేశాడు.

ముంబై ఇన్నింగ్స్ 18వ ఓవర్‌లో మార్కో యాన్సెన్ బౌలింగ్ చేస్తున్నాడు. అప్పటికే సెటిల్ అయిన హార్దిక్ పాండ్యా భారీ సిక్సర్ కోసం బ్యాట్ ఝుళిపించాడు. బంతి గాల్లోకి లేచి నేరుగా లాంగ్ ఆన్ బౌండరీ వైపు దూసుకెళ్లింది. ఇది సిక్సర్ అవ్వడం ఖాయం అనుకుంటున్న తరుణంలో అక్కడ ఫీల్డింగ్ చేస్తున్న శ్రేయస్ అయ్యర్ ఒక్కసారిగా గాల్లోకి ఎగిరాడు. బంతిని అందుకున్న అయ్యర్, తాను బౌండరీ అవతల పడిపోతున్నానని మైక్రో సెకన్లలో గ్రహించి బంతిని తెలివిగా లోపలికి విసిరాడు. అక్కడే ఉన్న జేవియర్ బార్ట్లెట్ ఆ బంతిని అందుకుని క్యాచ్ పూర్తి చేశాడు.

ఈ అద్భుతమైన క్యాచ్ సరిగ్గా ముంబై ఇండియన్స్ డగౌట్‌కు కేవలం ఒక మీటరు దూరంలోనే జరిగింది. అక్కడే కూర్చున్న రోహిత్ శర్మ, సూర్యకుమార్ యాదవ్ తమ కళ్ల ముందే జరిగిన ఈ మ్యాజిక్‌ను చూసి అవాక్కయ్యారు. హార్దిక్ పాండ్యా (14) అవుట్ కావడంతో ముంబై భారీ స్కోరు ఆశలపై నీళ్లు చల్లినట్లయింది. ఒకవేళ ఆ క్యాచ్ పట్టకపోయి ఉంటే ముంబై స్కోరు 210 దాటేది, కానీ శ్రేయస్ పుణ్యమా అని ముంబై 195 పరుగుల వద్దే ఆగిపోయింది.

SHREYAS IYER, WHAT HAVE YOU DONE!! 🤯

🎥 One of the best catches you would see in the #TATAIPL history 🔥🔥

Updates ▶️ https://t.co/Fn2dxJ4zYR#KhelBindaas | #MIvPBKS | @PunjabKingsIPL pic.twitter.com/6EKgHR82cL

— IndianPremierLeague (@IPL) April 16, 2026

అప్పటివరకు పంజాబ్ ఫీల్డింగ్ అంతంతమాత్రంగానే ఉంది. క్యాచ్‌లు వదిలేయడం, మిస్ ఫీల్డ్ చేయడం వంటి తప్పులతో పంజాబ్ బౌలర్లకు చుక్కలు కనిపించాయి. కానీ కెప్టెన్ శ్రేయస్ అయ్యర్ తన అద్భుత ఫీల్డింగ్‌తో జట్టులో కొత్త ఉత్సాహాన్ని నింపాడు. "నేను ఉన్నాను.. కష్టమైన క్యాచ్‌లైనా పట్టగలను" అని తన చేతలతో నిరూపించి, పంజాబ్ బౌలర్లకు అండగా నిలిచాడు.

శ్రేయస్ అయ్యర్ కేవలం క్యాచ్ పట్టడమే కాదు, పంజాబ్ బ్యాటింగ్‌లో కూడా కెప్టెన్ ఇన్నింగ్స్ ఆడి జట్టును గెలిపించాడు. కానీ మ్యాచ్ మొత్తానికి హైలైట్ మాత్రం ఆ క్యాచ్ అనే చెప్పాలి. ఐపీఎల్ 2026 సీజన్ లోనే అత్యుత్తమ క్యాచ్‌లలో ఒకటిగా ఇది నిలిచిపోనుంది. ముంబై ఫ్యాన్స్ కూడా శ్రేయస్ సమయస్ఫూర్తిని చూసి ప్రశంసించకుండా ఉండలేకపోయారు.