Smriti Mandhana: భారత మహిళా క్రికెట్‌లో నవ శకం..కెప్టెన్‌గా లేడీ కోహ్లీ!

Indian women cricket team: భారత మహిళా క్రికెట్ చరిత్రలో ఒక నూతన అధ్యాయం మొదలైంది. ఇప్పటివరకు అద్భుతమైన బ్యాటింగ్‌తో కోట్లాది మంది అభిమానుల మనసులు గెలుచుకున్న స్టార్ ఓపెనర్ స్మృతి మంధాన .. ఇప్పుడు భారత మహిళా క్రికెట్ జట్ల నూతన పూర్తి స్థాయి కెప్టెన్‌గా పగ్గాలు చేపట్టారు.

గత కొంతకాలంగా తన దూకుడైన బ్యాటింగ్‌తో పాటు అద్భుత నాయకత్వ లక్షణాలతో జట్టు విజయాల్లో కీలక పాత్ర పోషిస్తున్న హర్మన్‌ప్రీత్ కౌర్.. అన్ని ఫార్మాట్ల కెప్టెన్సీ బాధ్యతల నుంచి స్వచ్ఛందంగా తప్పుకున్నారు. ఆమె సేవల పట్ల బీసీసీఐ ప్రత్యేకంగా ప్రశంసలు కురిపిస్తూ, నూతన నాయకురాలిగా స్మృతి మంధాన పేరును అధికారికంగా ప్రకటించింది. స్మృతి మంధానకు కెప్టెన్సీ బాధ్యతలు కొత్తేమీ కాదు. గతంలో ఆమె హర్మన్‌ప్రీత్‌కు వైస్ కెప్టెన్‌గా వ్యవహరించడంతో పాటు, పలు సందర్భాల్లో 18 టీ20లు, 4 వన్డేలకు తాత్కాలిక కెప్టెన్‌గా జట్టును విజయవంతంగా నడిపించారు.

అంతేకాకుండా, మహిళల ప్రీమియర్ లీగ్ టోర్నీలో రాయల్ ఛాలెంజర్స్ బెంగళూరు జట్టును 2024, 2026 సంవత్సరాల్లో ఛాంపియన్లుగా నిలపడంలో మంధాన నాయకత్వ ప్రతిభ అసాధారణమైనది. ట్యాక్టికల్ మాస్టర్‌మైండ్‌గా, ప్రశాంతమైన మైండ్‌సెట్‌తో ఆమె సాధించిన ఈ ఘనతలే ఇప్పుడు ఆమెను భారత జట్టు పూర్తి స్థాయి సారథిగా కూర్చోబెట్టేలా చేశాయి.

స్మృతి మంధాన పూర్తి స్థాయి కెప్టెన్‌గా తన ప్రయాణాన్ని అత్యంత ఉత్సాహంగా ప్రారంభించనున్నారు. వచ్చే అక్టోబర్ 16 నుంచి జింబాబ్వేతో జరగనున్న వైట్-బాల్ సిరీస్‌తో మంధాన తన తొలి అసైన్‌మెంట్‌ను చేపట్టబోతున్నారు. ఆమె సారథ్యంలో టీమిండియా సరికొత్త రికార్డులను సృష్టించాలని, ప్రపంచ వేదికపై తిరుగులేని శక్తిగా ఎదగాలని కోట్లాది మంది భారత క్రికెట్ అభిమానులు ఆశిస్తున్నారు.