IPL 2026 : సొంతగడ్డపై SRH విజయ విహారం.. ఢిల్లీని చిత్తు చేసిన హైదరాబాద్, సీజన్‌లో నాలుగో గెలుపు

IPL 2026 : ఉప్పల్ స్టేడియం వేదికగా జరిగిన ఐపీఎల్ 2026 సమరంలో సన్‌రైజర్స్ హైదరాబాద్ (SRH) మరోసారి తన ప్రతాపాన్ని చాటింది. ఢిల్లీ క్యాపిటల్స్‌తో జరిగిన హోరాహోరీ పోరులో ఆరెంజ్ ఆర్మీ 47 పరుగుల తేడాతో ఘనవిజయం సాధించింది. ఈ విజయంతో హైదరాబాద్ ఈ సీజన్‌లో నాలుగో విజయాన్ని నమోదు చేయడమే కాకుండా, సొంత గడ్డపై వరుసగా మూడో గెలుపును అందుకుని హ్యాట్రిక్ కొట్టింది. అభిషేక్ శర్మ వీరోచిత సెంచరీ, ఇషాన్ మలింగ అద్భుతమైన బౌలింగ్ ఈ మ్యాచ్‌కు హైలైట్‌గా నిలిచాయి.

టాస్ గెలిచిన హైదరాబాద్ మొదట బ్యాటింగ్‌ ఎంచుకుని నిర్ణీత 20 ఓవర్లలో కేవలం 2 వికెట్ల నష్టానికి 242 పరుగుల భారీ స్కోరు సాధించింది. ఓపెనర్ అభిషేక్ శర్మ ఆరంభం నుంచే ఢిల్లీ బౌలర్లపై విరుచుకుపడ్డాడు. కళ్లు చెదిరే ఫోర్లు, సిక్సర్లతో విరుచుకుపడి అద్భుతమైన సెంచరీని నమోదు చేశాడు. ఉప్పల్ స్టేడియం నలుమూలలా బంతిని తరలిస్తూ స్టేడియంలోని ప్రేక్షకులను ఉర్రూతలూగించాడు. ఈ భారీ స్కోరుతో సన్‌రైజర్స్ జట్టు మ్యాచ్‌పై తొలి ఇన్నింగ్స్‌లోనే పట్టు బిగించింది.

243 పరుగుల భారీ లక్ష్యంతో బరిలోకి దిగిన ఢిల్లీ క్యాపిటల్స్‌కు ఆరంభంలోనే గట్టి షాక్ తగిలింది. పథుమ్ నిస్సంక (8) తక్కువ పరుగులకే వెనుదిరిగాడు. అయితే నితీష్ రాణా (57), కేఎల్ రాహుల్ (37) రెండో వికెట్‌కు 86 పరుగుల భాగస్వామ్యంతో జట్టును ఆదుకున్నారు. ఒకానొక దశలో 9 ఓవర్లలోనే 100 పరుగులు పూర్తి చేసి ఢిల్లీ విజయం దిశగా వెళ్తున్నట్లు కనిపించింది. కానీ కేఎల్ రాహుల్ అవుట్ కావడంతో ఢిల్లీ ఇన్నింగ్స్ తలకిందులైంది. నితీష్ రాణా కూడా అవుట్ కావడంతో కష్టాల్లో పడింది.

ఢిల్లీ విజయానికి ఆశలు రేపిన నితీష్ రాణా, డేవిడ్ మిల్లర్లను ఇషాన్ మలింగ వరుస బంతుల్లో అవుట్ చేసి మ్యాచ్‌ను మలుపు తిప్పాడు. మిల్లర్ గోల్డెన్ డక్‌గా వెనుదిరగడం ఢిల్లీ ఆశలపై నీళ్లు చల్లింది. ట్రిస్టన్ స్టబ్స్ (27), సమీర్ రిజ్వీ (27) కొద్దిసేపు ప్రతిఘటించినా, వారి భాగస్వామ్యం కేవలం ఓటమి అంతరాన్ని మాత్రమే తగ్గించగలిగింది. ఇషాన్ మలింగ తన వేగంతో, యార్కర్లతో 4 వికెట్లు పడగొట్టి ఢిల్లీ నడ్డి విరిచాడు. మరోవైపు హర్ష్ దూబే కూడా 3 వికెట్లు తీసి తన వంతు సహకారం అందించాడు.

ఢిల్లీ క్యాపిటల్స్ చివరికి 20 ఓవర్లలో 9 వికెట్లు కోల్పోయి 195 పరుగులకే పరిమితమైంది. దీంతో హైదరాబాద్ 47 పరుగుల తేడాతో ఘన విజయాన్ని సొంతం చేసుకుంది. సొంత మైదానంలో వరుసగా మూడో గెలుపు సాధించడంతో హైదరాబాద్ ఫ్యాన్స్ ఖుషీ అవుతున్నారు. ఈ విజయంతో పాయింట్ల పట్టికలో హైదరాబాద్ తన స్థానాన్ని మరింత పటిష్టం చేసుకుంది. ఆల్‌రౌండర్ ప్రదర్శనతో ఆకట్టుకున్న ఆరెంజ్ ఆర్మీ, రాబోయే మ్యాచ్‌లలోనూ ఇదే ఊపును కొనసాగించాలని భావిస్తోంది.