టీ20 ప్ర‌పంచ‌క‌ప్‌లో మ్యాచ్ ఫిక్స్ జ‌రిగిందా.? ఆ మ్యాచ్‌పై నీలి మేఘాలు

T20 World cup: టీ20 ప్రపంచ కప్ 2026 ముగిసి దాదాపు నెలన్నర గడిచినా, ఒక మ్యాచ్ మాత్రం ఇంకా వివాదాల మధ్యనే నిలిచిపోయింది. గ్రూప్ స్టేజ్‌లో కెనడా-న్యూజిలాండ్ మధ్య జరిగిన పోరు ఇప్పుడు ఫిక్సింగ్ అనుమానాలతో మళ్లీ వార్తల్లోకి వచ్చింది. ఈ ఆరోపణలను సీరియస్‌గా తీసుకున్న ఐసీసీ యాంటీ కరప్షన్ యూనిట్ విచారణ ప్రారంభించింది.

ఐసీసీ మెన్స్ టీ20 వ‌ర‌ల్డ్ క‌ప్ 2026లో భారత్ ఛాంపియన్‌గా నిలిచిన విష‌యం తెలిసిందే. ఫైనల్లో న్యూజిలాండ్‌పై గెలిచి టీమిండియా వరుసగా రెండోసారి కప్ అందుకుంది. అయితే టోర్నీ మొత్తం ముగిసిన తర్వాత కూడా కెనడా-న్యూజిలాండ్ మ్యాచ్ గురించే ఎక్కువగా చర్చ జరుగుతోంది. కారణం ఆ మ్యాచ్‌పై వచ్చిన ఫిక్సింగ్ ఆరోపణలు.

చెపాక్ మ్యాచ్‌పై అనుమానాల మేఘం

గ్రూప్ దశలో చెపాక్ స్టేడియంలో కెనడా, న్యూజిలాండ్ తలపడ్డాయి. ఈ మ్యాచ్‌లో కివీస్ ఘన విజయం సాధించి సూపర్ 8 దశలోకి అడుగుపెట్టింది. అయితే ఆ విజయం సహజమా? అనే సందేహాలు ఇప్పుడు వ్యక్తమవుతున్నాయి. కెనడా బోర్డు స్థాయిలోనే మ్యాచ్ ఫలితంపై ప్రభావం చూపే చర్యలు జరిగాయని ఒక డాక్యుమెంటరీ ఆరోపించింది.

విచార‌ణ‌కు దిగిన ఐసీసీ

ఈ ఆరోపణలను పరిగణనలోకి తీసుకున్న ఇంట‌ర్నేష‌న‌ల్ క్రికెట్ కౌన్సిల్ అవినీతి నిరోధక విభాగం రెండు ప్రత్యేక బృందాలతో దర్యాప్తు ప్రారంభించింది. ఈ విచారణలో మ్యాచ్‌కు సంబంధించిన ప్రతి అంశాన్ని సమగ్రంగా పరిశీలిస్తున్నారు. అధికారికంగా ఫలితాలు వెలువడే వరకు ఎలాంటి నిర్ణయం ప్రకటించబోమని ఐసీసీ తాత్కాలిక అధికారి ఆండ్రూ ఎప్‌గ్రేవ్ తెలిపారు.

ఐదో ఓవర్ ఎందుకు అనుమానాస్పదం?

కెనడా కెప్టెన్ దిల్ప్రీత్ బజ్వా వేసిన ఐదో ఓవర్ ఈ వివాదానికి కేంద్రబిందువైంది. మ్యాచ్ ప్రారంభంలో కివీస్ కష్టాల్లో ఉండగా, ఆ ఓవర్‌లో ఒక్కసారిగా 15 పరుగులు రావడం గమనార్హం. ఆ ఓవర్‌లో నో బాల్, వైడ్ ఉండటం కూడా అనుమానాలకు కారణమైంది. కెనడా ఇన్వెస్టిగేటివ్ ప్రోగ్రామ్ “ది ఫిఫ్త్ ఎస్టేట్” ఈ విషయాన్ని బయటకు తీసుకొచ్చింది. మ్యాచ్ దిశ ఆ ఓవర్ తర్వాత పూర్తిగా మారిపోయిందని ఆరోపణలు ఉన్నాయి.

జట్టు ఎంపికపై కూడా దర్యాప్తు

ఈ వ్యవహారంలో కేవలం మ్యాచ్ మాత్రమే కాకుండా, జట్టు ఎంపిక కూడా అనుమానాస్పదంగా మారింది. మాజీ కోచ్ ఖుర్రమ్ చోహాన్ పాత్రపై కూడా విచారణ జరిగే అవకాశం ఉంది. టోర్నీకి కొన్ని వారాల ముందు కెప్టెన్ మార్పు, ఆటగాళ్ల ఎంపికలో ఒత్తిళ్లు వంటి అంశాలు ఇప్పుడు పరిశీలనలో ఉన్నాయి.

మ్యాచ్ ఎలా సాగింది?

మొదట బ్యాటింగ్ చేసిన కెనడా 20 ఓవర్లలో 173 పరుగులు చేసింది. ఓపెనర్ యువరాజ్ సమ్రా అద్భుతంగా ఆడి శతకం సాధించాడు. కానీ లక్ష్య ఛేదనలో న్యూజిలాండ్ జట్టు కేవలం 15.1 ఓవర్లలోనే విజయం సాధించింది. గ్లెన్ ఫిలిప్స్, రచిన్ రవీంద్ర దూకుడు బ్యాటింగ్‌తో మ్యాచ్‌ను ఏకపక్షంగా మలిచారు. ఈ మొత్తం ఘటనపై ఐసీసీ విచారణ పూర్తయ్యే వరకు స్పష్టత రాకపోయినా, క్రికెట్‌లో పారదర్శకతపై మరోసారి చర్చ మొదలైంది.