Cricket: 2027 వ‌ర‌ల్డ్ క‌ప్ కోసం టీమిండియా మాస్ట‌ర్ ప్లాన్‌.. భారీ మార్పులు త‌ప్ప‌వా.?

Cricket: 2027 వన్డే వరల్డ్ కప్ కోసం భారత జట్టు ఇప్పటి నుంచే ప్రణాళికలు రూపొందిస్తోంది. ఈ క్రమంలో జట్టులో కొన్ని కీలక మార్పులు జరగొచ్చని సమాచారం వెలువడింది. ముఖ్యంగా వికెట్ కీపర్ స్థానం విషయంలో పెద్ద నిర్ణయం తీసుకునే అవకాశం కనిపిస్తోంది.

ప్రమాదంలో రిషభ్ పంత్ స్థానం.?

టీమిండియా వికెట్ కీపర్‌గా ఉన్న రిషభ్ పంత్ స్థానం ఇప్పుడు అనిశ్చితిలో పడింది. 2024 ఆగస్టు తర్వాత ఆయన వన్డే మ్యాచ్‌లు ఆడలేదు. ఇక IPL 2026లో కూడా పంత్ ఫామ్‌లో లేరు. ఇప్పటివరకు 8 మ్యాచ్‌లలో కేవలం 189 పరుగులు మాత్రమే చేశారు. ఈ ప్రదర్శనతో సెలెక్టర్లు అసంతృప్తిగా ఉన్నారని సమాచారం.

సంజూ సామ్‌సన్‌కు అవకాశం పెరుగుతుందా?

మీడియా రిపోర్టుల ప్రకారం, సెలెక్టర్లు రాబోయే వన్డే సిరీస్‌లలో సంజూ సామ్‌సన్‌కు అవకాశం ఇవ్వాలని ఆలోచిస్తున్నారు. ప్రస్తుతం కేఎల్ రాహుల్ ప్రధాన వికెట్ కీపర్‌గా కొనసాగుతున్నాడు. పంత్ బ్యాకప్‌గా ఉన్నా, ఇప్పుడు ఆ స్థానం సామ్‌సన్‌కు వెళ్లే అవకాశం ఉంది. ఇది నిజమైతే, పంత్‌కు టీమ్‌లో చోటు కోల్పోయే పరిస్థితి రావచ్చు.

సంజూ సామ్‌సన్ అద్భుత ఫామ్

టీ20 వరల్డ్ కప్ 2026లో మొదట్లో అవకాశాలు తక్కువగా ఉన్నా, సంజూ సామ్‌సన్ వచ్చిన అవకాశాన్ని బాగా ఉపయోగించుకున్నాడు. వరుసగా మూడు మ్యాచ్‌ల్లో హాఫ్ సెంచ‌రీలు చేసి జట్టుకు విజయం అందించాడు.

అలాగే IPL 2026లో కూడా సామ్‌సన్ మంచి ప్రదర్శన చేస్తున్నాడు. 8 మ్యాచ్‌లలో 304 పరుగులు చేశాడు. ఇందులో ఇప్ప‌టికే 2 సెంచరీలు ఉన్నాయి. ఈ ఫామ్ వల్ల సెలెక్టర్ల దృష్టి ఆయనపై పడింది.

2027 వరల్డ్ కప్ దృష్టిలో టీమ్ ఇండియా వ్యూహం

2027 వరల్డ్ కప్‌కు ముందు భారత జట్టు సుమారు 20 వన్డే మ్యాచ్‌లు ఆడనుంది. ఈ మ్యాచ్‌లతోనే తుది జట్టును సిద్ధం చేయాలని మేనేజ్‌మెంట్ భావిస్తోంది. అలాగే రోహిత్ శర్మ, విరాట్ కోహ్లీ లాంటి సీనియర్ ఆటగాళ్లు కూడా ఆ వరల్డ్ కప్‌లో ఆడే అవకాశాలు ఎక్కువగా ఉన్నాయి. ఇలాంటి సమయంలో యువ ఆటగాళ్లకు అవకాశం ఇవ్వడం, ఫామ్‌లో ఉన్నవారిని ఎంపిక చేయడం వంటి నిర్ణయాలు తీసుకునే దిశగా బీసీసీఐ అడుగులు వేస్తోంది.