Asif Khan Doping Test: డోపింగ్‌ టెస్ట్‌లో అడ్డంగా బుక్కయిన క్రికెటర్.. 15 నెలల నిషేధం.. ఎవరంటే?

Asif Khan Doping Test: యూఏఈ క్రికెట్ జట్టుకు భారీ ఎదురుదెబ్బ తగిలింది. ఆ జట్టు అనుభవజ్ఞుడైన బ్యాటర్ ఆసిఫ్ ఖాన్‌పై అంతర్జాతీయ క్రికెట్ మండలి (ICC) 15 నెలల నిషేధం విధించింది. డోపింగ్ నిబంధనలను ఉల్లంఘించినట్లు తేలడంతో ఈ చర్య తీసుకున్నట్లు ఐసీసీ వెల్లడించింది. 36 ఏళ్ల ఆసిఫ్ ఖాన్ తనపై వచ్చిన అభియోగాన్ని అంగీకరించి శిక్షకు సమ్మతించాడు.

అసలేం జరిగింది?

2025 సెప్టెంబర్ 8న ఆసిఫ్ ఖాన్‌కు పోటీకి వెలుపల డోపింగ్ పరీక్ష నిర్వహించారు. ఆ పరీక్షలో నిషేధిత పదార్థమైన మెస్టెరోలోన్ మెటాబొలైట్ ఉన్నట్లు నిర్ధారణ అయింది. ఇది యాంటీ-డోపింగ్ నిబంధనల ప్రకారం నిషేధిత పదార్థాల జాబితాలో ఉంది.

ఈ ఉల్లంఘనకు సంబంధించి ఐసీసీ యాంటీ-డోపింగ్ కోడ్‌లోని ఆర్టికల్ 2.1ను ఆసిఫ్ ఉల్లంఘించినట్లు ఐసీసీ తెలిపింది. ప్రపంచ యాంటీ-డోపింగ్ ఏజెన్సీ (WADA), ఐసీసీతో జరిగిన కేస్ రిజల్యూషన్ ఒప్పందంలో భాగంగా ఆసిఫ్ తన శిక్షను అంగీకరించాడు.

డిసెంబర్ వరకు నిషేధం..

ఆసిఫ్ ఖాన్‌పై నిషేధాన్ని 2025 సెప్టెంబర్ 8 నుంచే అమల్లోకి వచ్చినట్లుగా పరిగణించారు. ఈ నిషేధం 2026 డిసెంబర్ 7 వరకు కొనసాగుతుంది.

అయితే అక్టోబర్ 8 నుంచి ఆసిఫ్‌కు జట్టుతో కలిసి శిక్షణ తీసుకునేందుకు అనుమతి ఉంటుంది. క్లబ్ లేదా ఐసీసీ సభ్య సంస్థకు చెందిన సదుపాయాలను కూడా ఉపయోగించుకోవచ్చు. కానీ అధికారిక పోటీ మ్యాచ్‌లో మాత్రం డిసెంబర్ 8, 2026 నుంచి మాత్రమే పాల్గొనే అవకాశం ఉంటుంది.

94 అంతర్జాతీయ మ్యాచ్‌లు ఆడిన ఆసిఫ్..

ఆసిఫ్ ఖాన్ 2022లో యూఏఈ తరపున అంతర్జాతీయ అరంగేట్రం చేశాడు. ఇప్పటివరకు 38 వన్డేలు, 56 టీ20 అంతర్జాతీయ మ్యాచ్‌లు కలిపి మొత్తం 94 మ్యాచ్‌లు ఆడాడు.

38 వన్డేల్లో 38.48 సగటుతో 1,270 పరుగులు చేశాడు. ఇందులో మూడు శతకాలు, ఏడు అర్ధ శతకాలు ఉన్నాయి. టీ20ల్లో 138 స్ట్రైక్‌రేట్‌తో 1,302 పరుగులు సాధించాడు.

పాకిస్థాన్‌లో పుట్టి.. UAE తరపున..

ఆసిఫ్ ఖాన్ పాకిస్థాన్‌లో జన్మించాడు. 2017లో యూఏఈకి వెళ్లాడు. అంతకుముందు పాకిస్థాన్ దేశవాళీ క్రికెట్‌లో 32 ఫస్ట్‌క్లాస్ మ్యాచ్‌లు ఆడాడు. అనంతరం యూఏఈ జట్టులో చోటు సంపాదించి అంతర్జాతీయ క్రికెట్‌లో తనదైన ముద్ర వేశాడు.

ఇప్పుడు డోపింగ్ కేసులో 15 నెలల నిషేధం ఎదుర్కొంటుండటంతో యూఏఈ జట్టుకు అతని సేవలు కొంతకాలం దూరం కానున్నాయి. అలాగే నిబంధనల ప్రకారం నిషేధం అమల్లోకి వచ్చిన తర్వాత ప్రారంభమైన కాలానికి సంబంధించిన అతని వ్యక్తిగత ఫలితాలను కూడా అనర్హంగా ప్రకటించినట్లు ఐసీసీ తెలిపింది.