Vaibhav Sooryavanshi : 15 ఏళ్లకే కోట్లలో సంపాదన.. వైభవ్ సూర్యవంశీ ఎంత ఇన్‌కమ్ టాక్స్ కట్టాలో తెలుసా?

Vaibhav Sooryavanshi : ఐపీఎల్‌లో తన అద్భుతమైన బ్యాటింగ్‌తో దేశవ్యాప్తంగా గుర్తింపు తెచ్చుకున్న 15 ఏళ్ల యంగ్ క్రికెటర్ వైభవ్ సూర్యవంశీ ఇప్పుడు భారత క్రికెట్‌లో సంచలనంగా మారాడు. చిన్న వయసులోనే అతను ఐపీఎల్ కాంట్రాక్టులు, బ్రాండ్ ఎండార్స్‌మెంట్ల ద్వారా కోట్ల రూపాయలు సంపాదిస్తున్నాడు. అయితే, ఇంత తక్కువ వయసు ఉన్న మైనర్ కట్టవలసిన ఆదాయపు పన్ను పై ప్రస్తుతం సోషల్ మీడియాలో పెద్ద ఎత్తున చర్చ నడుస్తోంది. మైనర్లకు పన్ను మినహాయింపు ఉంటుందా లేదా వారి ఆదాయంపై కూడా పన్ను విధిస్తారా అనే ప్రశ్నలపై ఆదాయపు పన్ను చట్టంలో స్పష్టమైన నిబంధనలు ఉన్నాయి.

క్లబ్బింగ్ ఆఫ్ ఇన్‌కమ్ అంటే ఏమిటి?

సాధారణంగా భారత ఆదాయపు పన్ను చట్టం ప్రకారం.. ఒక మైనర్ బిడ్డకు వచ్చే ఆదాయాన్ని వారి తల్లిదండ్రుల ఆదాయానికి జోడిస్తారు. దీన్నే ఐటీ భాషలో క్లబ్బింగ్ ఆఫ్ ఇన్‌కమ్ అని పిలుస్తారు. ఈ నియమం ప్రకారం, ఆ అదనపు ఆదాయంపై తల్లిదండ్రులు తమ టాక్స్ స్లాబ్ రేట్ల ప్రకారం పన్ను చెల్లించాల్సి ఉంటుంది. అయితే, ఈ నిబంధనకు ఆదాయపు పన్ను శాఖ కొన్ని ముఖ్యమైన మినహాయింపులను ఇచ్చింది. మైనర్ పిల్లలు తమ సొంత ప్రతిభ, ప్రత్యేక నైపుణ్యం లేదా శారీరక శ్రమ ద్వారా డబ్బు సంపాదిస్తే, ఆ ఆదాయాన్ని తల్లిదండ్రుల ఖాతాలో కలపరు.

వైభవ్ సూర్యవంశీకి ఏ రూల్ వర్తిస్తుంది?

యంగ్ సెన్సేషన్ వైభవ్ సూర్యవంశీ సంపాదన పూర్తిగా అతని క్రికెట్ నైపుణ్యం, ఆటతీరు, వ్యక్తిగత ప్రతిభపై ఆధారపడి వస్తోంది. కాబట్టి, ఆదాయపు పన్ను నిబంధనల ప్రకారం అతని సంపాదనను స్వతంత్ర ఆదాయంగానే పరిగణిస్తారు. అంటే అతని సంపాదన క్లబ్బింగ్ ఆఫ్ ఇన్‌కమ్ పరిధిలోకి రాదు. అలాగని అతనికి పన్ను నుంచి పూర్తిగా మినహాయింపు ఉంటుందని అనుకుంటే పొరపాటే. అతని వార్షిక ఆదాయం గనుక ఐటీ శాఖ నిర్దేశించిన కనీస పన్ను పరిధి కంటే ఎక్కువగా ఉంటే, కచ్చితంగా నిబంధనల ప్రకారం టాక్స్ కట్టాల్సిందే.

మైనర్ తరఫున ఐటీఆర్ ఎవరు ఫైల్ చేయాలి?

వైభవ్ సూర్యవంశీ ఇంకా మైనర్ (18 ఏళ్ల లోపు) కాబట్టి, అతను నేరుగా చట్టపరమైన ఒప్పందాలు లేదా ఐటీ రిటర్న్స్ దాఖలు చేయలేడు. అందువల్ల, అతని పేరు మీద ఇన్‌కమ్ టాక్స్ రిటర్న్స్‎ను అతని తల్లిదండ్రులు లేదా చట్టపరమైన సంరక్షకులు దాఖలు చేయాల్సి ఉంటుంది. ఈ రిటర్న్స్‌లో వైభవ్‌కు క్రికెట్ మ్యాచ్‌ల ద్వారా వచ్చిన ఫీజు, బ్రాండ్ అడ్వర్టైజ్‌మెంట్లు, అవార్డుల రూపంలో వచ్చిన నగదు బహుమతులు, ఇతర మార్గాల ద్వారా వచ్చిన ప్రతి రూపాయి వివరాలను పొందుపరచాల్సి ఉంటుంది.

గడిచిన రెండు ఐపీఎల్ సీజన్లలో వైభవ్ సూర్యవంశీ ప్రదర్శన క్రికెట్ ప్రపంచాన్ని ఆశ్చర్యపరిచింది. అతనిలోని అసాధారణ ప్రతిభను గుర్తించిన సెలక్టర్లు ఏకంగా భారత జట్టులో ఆడే అవకాశం కల్పించారు. టీమిండియా చీఫ్ సెలక్టర్ అజిత్ అగార్కర్ సైతం వైభవ్ ఆటతీరును ప్రశంసించారు. తన అద్భుతమైన ప్రదర్శనతో సెలక్టర్లు తనను ఎంపిక చేసుకునేలా వైభవ్ బలవంతం చేశాడని అగార్కర్ పేర్కొన్నారు. ఇంత చిన్న వయసులోనే లభించిన ఈ అద్భుత విజయం, ఆర్థిక ఎదుగుదల అతన్ని భారత క్రికెట్‌లో ఒక లీడర్‌గా నిలబెడుతోంది.